Malayo sa magahod kag masako nga siudad, may mga tawo nga sarisari ang tribo, lenguahe, kag pungsod nga nagaistar sa mga kagulangan sang Amazon sa South America. Gani sang Hulyo 2017, isa ka grupo sang 13 ka Saksi ni Jehova ang nagpanaksi sa Maroni River kag sa mga sanga sini nga mga sapa nga nagahalin sa French Guiana. Ano ang ila tuyo? Gusto nila nga isugid ang mensahe sang Biblia sa mga tawo sa pangpang sang suba.

 Isa ka bulan antes magsugod ang 12 ka adlaw nga paglakbay, nagtipon ang tanan nga mga maupod para mitingan ang ila himuon. “Gintun-an namon ang lugar kag ang kasaysayan sini, kag kon paano namon preparahan ang paglakbay,” siling ni Winsley. Ang kada isa sa maupod may suludlan nga indi masudlan sang tubig para butangan sang duyan kag muskitero. Lakip sa ila paglakbay ang duha ka beses nga pagsakay sa eroplano kag pila ka oras nga pagsakay sa baruto.

 Ano ang ginabatyag sang mga maupod? Ginbaton dayon nanday Claude kag Lisette ang imbitasyon bisan 65 anyos na sila. “Puerte ang kalipay ko, pero medyo nahadlok man,” siling ni Claude. “Madamo ako sing nabatian parte sa delikado kag batuhon nga bahin sang suba.” May ginakabalak-an man si Lisette: “Nagapalibog ako kon paano ako makapanaksi sa Amerindian nga mga lenguahe.”

 Amo man sini ang ginakabalak-an ni Mickaël nga lakip man sa grupo. “Wala kami sing nabal-an parte sa Wayana nga tribo,” siling niya, “gani nag-research ako sa Internet para matamyaw ko ang mga tawo sa ila lenguahe.”

 Si Shirley kag ang iya bana nga si Johann maupod man. Ginlista niya ang mga lenguahe sa ila kadtuan. “Nag-download kami sang mga video halin sa jw.org sa pila sini nga lenguahe kag may gindala ako nga libro nga nagaunod sang simple nga tinaga sa Wayana,” siling niya.

 Sang Martes, Hulyo 4, ang grupo nagsakay sa eroplano halin sa Saint-Laurent du Maroni pakadto sa Maripasoula, isa ka diutay nga banwa sa tungatunga sang French Guiana.

 Sa sulod sang apat ka adlaw ginbantalaan sini nga grupo ang mga pumuluyo sang mga baryo sa ilaya sang Maroni. Nagasakay sila sa de-motor nga mga baruto nga ginatawag pirogue para malab-ot ang mga tawo. “Interesado gid ang mga Amerindian parte sa mga topiko sa Biblia,” siling ni Roland, nga miembro sang grupo. “Madamo sila sing pamangkot, kag ang pila sa ila gusto nga magtuon sa Biblia.”

 Sa isa ka baryo, may naistorya sanday Johann kag Shirley nga lamharon nga mag-asawa nga may paryente nga bag-o lang naghikog. “Ginpakita namon sa ila ang video nga A Native American Finds His Creator,” sa JW Broadcasting, siling ni Johann. “Natandog gid ang lamharon nga mag-asawa sa sini nga video. Ginhatag nila ang ila e-mail kay gusto nila nga makontak namon sila.”

 Ang pinakalayo nga nakadtuan nila sa ilaya amo ang Antécume Pata. Nagpasugot ang pangulo sang baryo nga ihigot sang kapoy nga mga Saksi ang ila mga duyan sa ila komunidad. Naligo man sila sa suba nga ginapaliguan sang mga pumuluyo.

 Halin didto, nagpanakayon sila pakadto sa baryo sang Twenké, kag naabtan nila ang mga pumuluyo didto nga nagapangalisod bangod namatyan sila. “Ang ‘Grand Man,’ nga amo ang lider sang tribo, nagtugot sa amon nga libuton ang baryo kag paumpawan ang mga nasubuan,” siling ni Éric, nga isa sa nag-organisar sang paglakbay. “Nanamian gid ang lider kag ang iya pamilya sa mga teksto nga ginbasa namon halin sa Wayana nga Biblia. Ginpakita man namon ang mga video parte sa saad sang Biblia nga pagkabanhaw.”

 Ang masunod amo ang paglakbay sing tunga sa oras sakay sa eroplano pailawod halin sa Maripasoula pakadto sa gamay nga banwa sang Grand-Santi. Sang Martes kag Mierkoles, ginsugid sang grupo ang mensahe sang Biblia sa mga pumuluyo didto. Pagka-Huebes, naglakbay ang mga Saksi sa isa pa ka lugar—lima ka oras kag tunga pailawod sa Maroni River pakadto sa baryo sang Apatou.

 Isa ka adlaw antes matapos ang kampanya, ginkadtuan sang mga Saksi ang mga baryo sa kagulangan nga ginaistaran sang mga Maroon. Mga kaliwat sila sang mga ulipon halin sa Africa nga gindala sa South America sang ang ila kaingod nga pungsod nga Suriname sakop pa sang Netherlands. Gin-imbitar sang mga Saksi ang tanan nga magtambong sa miting sa kagulangan sa isa ka daku nga tolda nga ginpatindog para sa sini nga okasyon. “Nalipay gid kami kay madamo ang nagtambong,” siling ni Claude. “Sina lang nga aga namon sila gin-imbitar!” Si Karsten, nga amo pa lang makakadto sa sini nga lugar, amo ang naghatag sang pamulongpulong nga “Amo Lamang Bala Ini ang Kabuhi?” sa lenguahe nga Aukan. Gintambungan ini sang 91 ka tawo halin sa pila ka baryo.

 Sang ulihi, nagpauli na ang mga Saksi sa Saint-Laurent du Maroni. Nalipay gid sila sa maayo nga resulta sang ila pagpanaksi kay madamo ang nagbaton sang aton mga publikasyon kag nagtan-aw sang mga video.

 “Puerte gid ang akon kalipay nga nakaupod ako,” siling ni Lisette. Si Cindy nagsiling man: “Kon magbalik liwat didto, maupod gid ako. Maintiendihan mo lang ini nga kalipay kon maeksperiensiahan mo na ini!”

 Ang pila nga nag-upod gusto gid magbalik. “Gusto na namon nga magbalik!” siling ni Mickaël. Si Winsley nagsaylo sa Saint-Laurent du Maroni. Sanday Claude kag Lisette, nga mga 65 anyos na, nagsaylo sa Apatou.