Ang amon pagtamod sa edukasyon nabase sa mga prinsipio sa Biblia. Ang kada Saksi nagagamit sang iya nahanas sa Biblia nga konsiensia para mahibaluan kon paano niya magamit ini nga mga prinsipio pareho sang masunod. a

•  Importante ang edukasyon

•  Binagbinaga sing maayo ang edukasyon

•  Ang mataas nga edukasyon mahimo makahalit sa moral kag espirituwal

•  May Sunday school bala ang mga Saksi ni Jehova?

 Ang edukasyon makabulig sa isa nga mabaton ang “praktikal nga kaalam kag ang ikasarang sa paghunahuna sing maayo,” mga kinaiya nga ginadayaw sa Biblia. (Hulubaton 2:10, 11; 3:21, 22) Dugang pa, ginsilingan ni Jesus ang iya mga sumulunod nga itudlo sa iban ang iya mga ginsugo. (Mateo 28:19, 20) Gani, ginapalig-on namon ang amon mga miembro nga magtuon sang sarisari nga mga butang, pareho sang pagbasa, pagsulat, kag pagpakigkomunikar, b kag mangin pamilyar man sa iban nga relihion kag kultura.—1 Corinto 9:20-22; 1 Timoteo 4:13.

 Nakita man sang mga gobierno nga importante ang edukasyon kag sa masami ginapatuman nila nga dapat makatapos sa elementarya kag hayskul ang mga pamatan-on. Ginatuman namon ini nga kasuguan bilang pagsunod sa sugo sang Biblia: “Ang tagsa ka tawo dapat magpasakop sa mas mataas nga mga awtoridad,” ukon gobierno. (Roma 13:1) Ginapalig-on man namon ang amon mga kabataan nga mangin mapisan sa pag-eskwela kag himuon nila ang ila pinakamaayo, indi nga basta makapasar lang. c Kay ang Pulong sang Dios nagasiling: “Bisan ano ang ninyo ginahimo, himua ninyo sing tinagipusuon, subong nga nagaalagad kamo sa Ginoo kag indi sa tawo.”—Colosas 3:23, Ang Pulong sang Dios.

 Ang edukasyon nagabulig sa amon nga masuportahan ang amon pamilya. Ang Biblia nagasiling nga, “ang bisan sin-o nga wala nagaaman sa mga natungod sa iya, ilabi na sa mga katapo sang iya panimalay, nagapanghiwala sang pagtuo kag malain pa sa tawo nga wala sing pagtuo.” (1 Timoteo 5:8) Ang sekular nga edukasyon makabulig sa amon nga mahimo ang ginhatag sang Dios sa amon nga obligasyon nga suportahan ang amon pamilya. Ang The World Book Encyclopedia nagasiling nga ang panguna nga katuyuan sang edukasyon amo ang “pagbulig sa mga tawo nga mangin mapuslanon nga miembro sang komunidad . . . bilang mga trabahador para sa kauswagan sang ekonomiya.” Mas masuportahan sang isa nga may abilidad kag may edukasyon ang iya pamilya sangsa isa nga wala sing abilidad kag wala nakakuha sing panguna nga edukasyon.—Hulubaton 22:29.

 Lakip man sa iaman sang mga ginikanan amo ang pagbulig sa ila mga bata nga mangin handa sa kabuhi pagdaku nila. Gani, makabulig gid ang pagpaeskwela sa ila. (2 Corinto 12:14) Ginapalig-on namon ang mga ginikanan nga paeskwelahon ang ila mga bata bisan pa indi ini libre, mabudlay, ukon indi ini kinaandan sa ila kultura. d Nagahatag man kami sing praktikal nga mga panugda kon paano makabulig ang mga ginikanan sa edukasyon sang ila kabataan. e

 Ginausisa namon sing maayo ang mga pililian. Ang Biblia nagasiling: “Ang tawo nga mapinatihon, nagapati sa bisan ano nga mabatian niya, apang ang tawo nga maalamon nagabinagbinag sang tagsa niya ka tikang.” (Hulubaton 14:15) Ginasunod namon ini nga prinsipio paagi sa pag-usisa sing maayo sa mga pililian sa pagkuha sang dugang nga edukasyon (pagkatapos sang hayskul) kag ang magasto kag ang kapuslanan sang kada isa. Halimbawa, ang bokasyonal nga mga kurso makabulig gid bisan pa malip-ot lang ang panahon sa pag-eskwela.

 Mas importante ang espirituwal nga edukasyon sangsa sekular nga edukasyon. Indi pareho sa sekular nga edukasyon, ang edukasyon nga nabase sa Biblia nagatudlo sa aton parte sa Dios kag makaluwas ini sang aton kabuhi. (Juan 17:3) Nagatudlo man ini sing maayo nga pamatasan—“kon ano ang husto kag matarong kag bunayag, ang bug-os nga dalanon sang kaayo.” (Hulubaton 2:9) Si apostol Pablo nakaeskwela sa masiling naton nga unibersidad subong, pero nagsiling sia nga ‘labaw ang balor sang ihibalo tuhoy kay Cristo Jesus.’ (Filipos 3:8; Binuhatan 22:3) Amo man subong, madamo nga Saksi ni Jehova ang nagkuha sing dugang nga sekular nga edukasyon, pero nagapati sila nga mas importante ang espirituwal nga edukasyon. f

 Ang Biblia nagasiling: “Makita sang tawo nga maalamon ang katalagman kag nagapanago sia.” (Hulubaton 22:3) Nagapati ang mga Saksi ni Jehova nga ang impluwensia sang pila ka unibersidad ukon pareho sini nga mga eskwelahan mahimo makahalit sa moral kag espirituwal. Gani madamo nga Saksi ang wala na nagaeskwela ukon nagapaeskwela sang ila kabataan sa sini. Para sa ila, ini nga mga eskwelahan nagatudlo sang sala nga mga pagpati pareho sang masunod:

•   Sala nga pagpati: Ang kuarta makahatag sang kalipay kag seguridad

   Pirme gid ginasiling nga kon makakuha ka sing mataas nga edukasyon sigurado gid nga makaobra ka nga may daku nga sueldo, gani madamo nga estudyante ang nagaeskwela sa mga unibersidad para makatipon sing madamo nga kuarta. Nagapati ang pila nga ang kuarta makahatag sa ila sing kalipay kag seguridad, pero ginapakita sang Biblia nga wala sing pulos ini nga panghunahuna. (Manugwali 5:10) Labaw sa tanan, ang Biblia nagatudlo nga “ang gugma sa kuarta amo ang gamot sang tanan nga sahi sang makahalalit nga butang” kag sa masami makaguba sang pagtuo. (1 Timoteo 6:10) Ginatinguhaan gid sang mga Saksi ni Jehova nga indi sila masiod sang “limbong sang manggad.”—Mateo 13:22.

•   Sala nga pagpati: Dapat panikasugan gid sang isa ang mataas nga edukasyon para respetuhon sia ukon kilalahon sang mga tawo

   Halimbawa, si Nika Gilauri, nga primer ministro sang Georgia sadto, nagsulat parte sa pagpati sang kalabanan sa ila pungsod: “Para kilalahon ka sa Georgia dapat nakaeskwela ka gid sa unibersidad. . . . [Sang una,] ang mga pamatan-on nga wala nakakuha sing kurso ginakahuya sang ila mga pamilya.” g Pero ang Biblia nagpaandam nga indi kita dapat maghandum nga kilalahon sang kalibutan. Si Jesus nagsiling sa mga lider sang relihion sang iya panahon nga gusto gid dayawon: “Paano kamo magpati sa akon kay luyag ninyo nga himayaon kamo sang tawo?” (Juan 5:44) Ang mga unibersidad mahimo mag-impluwensia sa imo nga mangin bugalon, kag ini nga batasan ginadumtan gid sang Dios.—Hulubaton 6:16, 17; 1 Pedro 5:5.

•   Sala nga pagpati: Ang kada isa dapat maghimo sang iya kaugalingon nga pagsulundan kon ano ang husto kag sala

   Ginasunod sang mga Saksi ni Jehova ang pagsulundan sang Dios sa kon ano ang husto kag sala. (Isaias 5:20) Pero, suno sa artikulo sa Journal of Alcohol and Drug Education, madamo nga estudyante ang “nagadesisyon nga indi santu sa madugay na nila nga ginapatihan nga husto kag sala” h bangod sa pressure sang mga kaedad nila sa mga unibersidad. Ini nga obserbasyon pareho gid sa prinsipio sang Biblia: “Ang pagpakig-upod sa malain nga mga tawo nagapalain sang mapuslanon nga mga batasan.” (1 Corinto 15:33) Sa mga unibersidad, ang mga buhat nga ginakaugtan sang Dios, pareho sang pagpahubog, pagdroga, kag pag-sex sa indi asawa ukon bana, ordinaryo na lang kag ginapalig-on pa gani.—1 Corinto 6:9, 10; 2 Corinto 7:1.

•   Sala nga pagpati: Ang mataas nga edukasyon amo ang pinakamaayo nga paagi para mapauswag ang kalibutan

   Nakahibalo kami nga madamo ang nagakuha sing mataas nga edukasyon indi para magmanggaranon, kilalahon, ukon pagustuhan ang ila kaugalingon sa ilegal nga paagi, kundi para mangin maayo sila nga tawo kag pauswagon ang kalibutan. Maayo ini nga tulumuron, pero lain ang paagi sang mga Saksi ni Jehova. Pareho kay Jesus, Ginharian sang Dios lamang ang amon ginalauman para mangin maayo ang kalibutan. (Mateo 6:9, 10) Pero wala lang kami basta nga nagahulat nga solbaron sang Ginharian ang mga problema sa kalibutan. Kundi, pareho kay Jesus, ginasugid namon sa iban “ining maayong balita sang Ginharian” sa bilog nga duta, nga ginabuligan ang ginatos ka libo ka tawo kada tuig nga magbag-o sang ila kabuhi. i—Mateo 24:14.