Sugod sang Hunyo 6 asta 16, 2013, minilyon ka bisita halin sa bilog nga kalibutan ang nagdugok sa pantalan sang Rouen, sa aminhan sang France, para sa pinakadaku kag pinakamatahom nga pagtilipon sang mga sakayan sa kalibutan, ang Armada.

Ining pinakamatahom kag pinakamataas nga mga sakayan sa kalibutan naglayag anay sing 120 kilometros pailaya sa Seine, ang nagalikoliko nga suba sa matahom nga lugar sang Normandy. Dayon, nag-iskala sila sa siete kilometros nga pier nga ginhimo para sa sining makalilipay nga okasyon. Sa sobra napulo ka adlaw, ang mga bisita puede makasaka sa pila sining mga 45 ka kilala nga sakayan kag matag-as nga mga barko nga nag-entra sa sini nga kapiestahan.

Ngaa madamo nga tawo nga lainlain ang edad ang nagatipon sa Armada? Suno sa nagaorganisar kag founder sini nga okasyon, ang Armada nagahatag sa ila sing kahigayunan nga “makapalapit sa sining mga ‘Higante sa Dagat’ nga nagapukaw sang aton handum.” Sa pagkamatuod, para sa kalabanan, bata man ukon tigulang, ining dalagku nga mga sakayan daw nagadala sa ila sa malayo nga mga lugar kag sa kahilwayan.

Ining linibo ka turista may kahigayunan man nga makabati sang isa pa ka sahi sang kahilwayan, nga ara sa kamatuoran sa Biblia. (Juan 8:​31, 32) Samtang nagalagaw sila sa matahom kag dumaan nga pantalan sang Rouen kag sa gutok kag makitid nga mga kalye sini, matalupangdan gid nila ang ginadispley sang mga Saksi ni Jehova sa mga kart. Kon ang mga nagalagaw kag mga seaman magpalapit sa kart, ginapakuha sila sang bisan ano nga literatura parte sa Biblia nga ginadispley, nga wala sing bayad. Madamo sa mga naglabay ang interesado gid sa artikulo sa Lalantawan nga “Kalibutan nga Wala sing Pagpasulabi—San-o?” Dayon ginaagda sila nga magtambong sa isa ka pamulongpulong base sa Biblia nga mabatian sa French, English, ukon Spanish.

Ginpasalamatan gid sang mga taga-didto ini nga hilikuton. Ang isa ka tawo, nga sang primero natingala sang nakita niya ang mga Saksi nga nagatindog sa tupad sang kart nga may mga displey, nagsiling: “Nalipay gid ako nga makita kamo sa kalye. Ginarespeto ko ang mga nagapanindugan sa ila pagpati, bisan pa lain ang akon ginapatihan.” Ang mga pamatan-on nga Saksi ginsilingan man sang duha ka may edad nga tawo: “Dapat gid ninyo ipabugal ang inyo ginahimo!”