“Gani nagasiling ako sa inyo, magtuo kamo nga ang tanan nga inyo ginapangamuyo, nabaton na ninyo, kag mabaton gid ninyo ini.”—Marcos 11:24, Bag-ong Kalibutan nga Badbad.

 “Gani nagasiling ako sa inyo, ang tanan nga inyo ginapangayo sa pangamuyo, magtuo kamo nga inyo na ina nabaton, kag ini tanan ihatag gid sa inyo.”—Marcos 11:24, Maayong Balita nga Biblia.

 Sa iya ginsiling, ginapakita ni Jesus sa iya mga sumulunod nga importante gid nga may mabakod sila nga pagtuo sa gahom sang pangamuyo. Ginpasalig niya sila nga ang Dios wala lang nagapamati sa ila mga pangamuyo kundi ginasabat man niya ini. Ang tawo nga sinsero nga nagapangamuyo suno sa kabubut-on sang Dios makasigurado nga matabo gid ang iya ginapangamuyo. Daw pareho lang nga nasabat na ang iya ginpangamuyo.

 Gintudlo ni Jesus nga importante gid ang pangamuyo upod ang pagtuo. Ginpaathag niya nga ang isa nga nagapangamuyo “wala nagaduhaduha kundi nagatuo nga ini mahanabo.” (Marcos 11:23) Ngaa? Bangod ang nagaduhaduha ‘indi makalaum nga makabaton sia sang bisan ano halin kay Jehova.’ a—Santiago 1:5-8.

 Ang tawo nga may pagtuo pirme nagapangamuyo sa sarisari nga sitwasyon. (Lucas 11:9, 10; Roma 12:12) Sa sini nga paagi, ginapakita niya nga kinahanglan gid niya ang iya ginapangayo kag nagapati gid sia nga masabat sang Dios ang iya ginapangamuyo. Siempre, kabalo man sia nga mahimo lain ang sabat sang Dios sangsa iya gusto kag mahimo ihatag ini sang Dios sa lain nga tion sangsa ginapaabot niya.—Efeso 3:20; Hebreo 11:6.

 Pero, ang ginhambal ni Jesus wala nagakahulugan nga mabaton sang bisan sin-o ang bisan ano nga ginpangayo niya sa Dios paagi sa pangamuyo. Ang kaistorya ni Jesus sa sini nga teksto amo ang iya mga sumulunod, mga tawo nga may pagtuo nga nagatinguha gid nga batunon sang Dios ang ila pagsimba. Ang Biblia nagasiling nga ang mga pangamuyo nga ginapamatian ni Jehova amo lang ang mga pangamuyo nga suno sa iya kabubut-on. (1 Juan 5:14) Wala niya ginapamatian ang mga pangamuyo sang hungod nga nagabalewala sang iya mga talaksan kag nagahimo sang malain kag wala nagahinulsol. (Isaias 1:15; Miqueas 3:⁠4; Juan 9:31) Para mahibaluan mo sing dugang pa kon ano nga mga pangamuyo ang ginapamatian sang Dios, tan-awa ining malip-ot nga video.

 Sang dali na lang matapos ang iya ministeryo sa duta, ginpakita ni Jesus sa iya mga disipulo kon ano ka importante ang mabakod nga pagtuo sa Dios. Gintudlo niya ini nga leksion paagi sa isa ka ilustrasyon. Samtang nagapakadto sila sa Jerusalem, may nakita sia nga kahoy nga higuera nga may madabong nga dahon. Pero, wala ini sing bunga, gani ginsumpa niya ini. (Marcos 11:12-14) Ang madaya nga hitsura sini nga kahoy nagailustrar sa pungsod sang Israel sadto, nga kon tan-awon daw nagasimba gid sa Dios, pero ang matuod wala sila sing pagtuo. (Mateo 21:43) Pagkasunod nga aga, nalaya ang kahoy nga higuera. Ginapakita sini kon ano ang matabo sa indi madugay sa wala sing pagtuo nga mga Israelinhon.—Marcos 11:19-21.

 Pero kumbinsido si Jesus nga ang iya mga sumulunod magapakita sing pagtuo nga kinahanglan para maatubang nila ang mga kabudlayan kag mahimo nila ang dalayawon nga mga butang. (Marcos 11:22, 23) Tayming gid ining laygay ni Jesus parte sa pangamuyo kay sa indi madugay matilawan gid ang ila pagtuo. Kay man, mapatay si Jesus kag magadugang ang pagpamatok sa ila ministeryo. (Lucas 24:17-20; Binuhatan 5:17, 18, 40) Subong, masarangan man sang mga sumulunod ni Jesus ang mabudlay nga mga sitwasyon kon magtuo sila sa Dios kag sa gahom sang pangamuyo.—Santiago 2:26.

 Tan-awa ining malip-ot nga video para mahibaluan mo ang sumaryo sang libro sang Marcos.