Indi mabasa sing direkta sa Biblia ang pornograpiya, cybersex, kag iban pa nga buhat pareho sini. Pero, maathag nga ginasugid sini ang pagtamod sang Dios sa mga buhat nga nagaganyat sa mga indi mag-asawa nga mag-sex ukon sa sala nga pagtamod sa sex. Binagbinaga ini nga mga bersikulo sa Biblia:

•   “Patya ninyo ang mga bahin sang inyo lawas nga yara sa duta may kaangtanan sa pagpakighilawas, kahigkuan, kailigbon sa sekso.” (Colosas 3:5) Ang pagtan-aw sing pornograpiya wala nagapatay sang sayop nga mga handum, kundi nagapukaw sini. Nagahimo ini sa isa nga mangin mahigko sa pagtamod sang Dios.

•   “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.” (Mateo 5:​28) Ang pagtan-aw sang imoral nga seksuwal nga mga buhat nagapukaw sang malain nga panghunahuna nga nagaresulta sa malain nga mga buhat.

•   “Ang pagpakighilawas kag ang tanan nga sahi sang kahigkuan ukon kakagod indi gid paghinambitan sa tunga ninyo.” (Efeso 5:3) Indi gid naton paghinambitan ang imoral nga pag-sex para lang sa kalingawan, kag labi nga indi kita magtan-aw ukon magbasa parte sini.

•   “Dayag ang mga buhat sang unod, kag ini amo ang pagpakighilawas, kahigkuan, . . . kag mga butang nga kaangay sini. Tuhoy sini nga mga butang ginapaandaman ko kamo nga daan, kon paano nga napaandaman ko na kamo, nga ang mga nagabuhat sini nga mga butang indi makapanubli sang ginharian sang Dios.” (Galacia 5:​19-​21) Sa panan-aw sang Dios, mahigko kag imoral ang mga nagatan-aw sing pornograpiya ukon nagapakigbahin sa cybersex, phone sex, ukon sexting. Kon nagahimo kita sini nga mga butang, indi gid mahamuot sa aton ang Dios.