Ang Biblia, ukon ang Balaan nga Kasulatan, nagaunod sing madamo nga maalamon nga impormasyon. Pero talupangda ang ginasiling sini: “Ang pagsulat sa bug-os nga Kasulatan gintuytuyan sang Dios.” (2 Timoteo 3:16) Madamo sing ebidensia nga nagasuporta sini. Binagbinaga ang masunod:

•   Wala gid sing may nakapamatuod nga sala ang rekord sang Biblia parte sa kasaysayan.

•   Ang mga manunulat sang Biblia bunayag nga mga tawo nga nagsulat sing tampad. Ang ila pagkatampad isa ka ebidensia nga matuod ang ila ginpanulat.

•   Isa lang ang tema nga ginapasangkad sang Biblia: ang pagbindikar sa kinamatarong sang Dios sa paggahom sa katawhan kag ang katumanan sang iya katuyuan paagi sa iya langitnon nga Ginharian.

•   Bisan linibo na ka tuig nga ginsulat ang Biblia, wala ini nagaunod sang sala nga mga pagpati sa siensia nga ginapatihan gid sang kalabanan sadto.

•   Ginapamatud-an sang mga rekord sang kasaysayan nga natuman ang mga tagna ukon prediksion, sang Biblia.