Ano ang Ginasiling sang Biblia Parte sa Euthanasia?

I-PLAY

Ang sabat sang Biblia

Wala sing ginasiling ang Biblia parte sa euthanasia. a Pero ang ginasiling sini parte sa kabuhi kag kamatayon makabulig sa aton para mangin balanse ang aton pagtamod. Ginadilian sang Biblia ang pagpatay, pero wala ini naghatag sing kasuguan nga himuon ang tanan para palawigon ang kabuhi sang isa nga tagumatayon na.

Suno sa Biblia, ang Dios amo ang aton Manunuga, “ang tuburan sang kabuhi.” (Salmo 36:9; Binuhatan 17:28) Para sa Dios, importante gid kabuhi. Gani, naakig gid ang Dios sa pagpatay sa iban kag pagpanginmatay. (Exodo 20:13; 1 Juan 3:15) Isa pa, ginapakita sang Biblia nga dapat kita maghalong para proteksionan ang aton kabuhi kag ang kabuhi sang iban. (Deuteronomio 22:8) Maathag nga gusto sang Dios nga apresyahon naton ang regalo nga kabuhi.

Ano abi kon ang isa may malala na gid nga balatian?

Wala ginapalig-on sang Biblia ang pagpatay sa isa bisan pa tagumatayon na sia. Makita ini sa natabo kay Hari Saul sang Israel. Sang grabe gid ang iya mga pilas bangod sa inaway, ginpangabay niya ang iya alagad nga patyon na lang sia. (1 Samuel 31:3, 4) Wala nagtuman ang iya alagad. Pero, may tawo sang ulihi nga nagsiling nga sia kuno ang naghimo sang ginpangabay ni Saul. Ini nga tawo ginsentensiahan ni David nga nakasala sa dugo. Ginpakita ni David nga para sa Dios importante ang kabuhi.—2 Samuel 1:6-16.

Dapat bala himuon ang tanan para palawigon ang kabuhi?

Kon tagumatayon na ang isa, wala ginasiling sang Biblia nga dapat palawigon ang kabuhi, kundi ginatudluan kita sini nga mangin balanse sa aton pagtamod. Ang kamatayon kaaway naton. Amo ini ang aton padulungan kay makasasala kita. (Roma 5:12; 1 Corinto 15:26) Bisan pa indi naton gusto mapatay, indi naton dapat kahadlukan ang kamatayon kay nagpromisa ang Dios nga banhawon niya ang mga patay. (Juan 6:39, 40) Ang tawo nga nagapabalor sa kabuhi nagapangita sing pinakamaayo nga paagi sang pagbulong. Pero indi buot silingon sini nga dapat mangita sing paagi sang pagbulong para palawigon ang pag-antos kon tagumatayon na gid man ang isa.

Ang mga naghikog bala indi na mapatawad?

Wala nagsiling ang Biblia nga ang paghikog isa sa mga sala nga indi na mapatawad. Bisan pa mabug-at gid nga sala ang paghikog, b nahibaluan gid sang Dios ang aton sitwasyon pati na kon bala may balatian kita sa hunahuna, grabe ang stress, ukon may sulundon sa pamilya nga mahimo magresulta sa paghikog. (Salmo 103:13, 14) Ang Biblia nagahatag sing paumpaw sa mga nagaantos. Isa pa, ang Biblia nagsiling nga “may pagkabanhaw sang mga matarong kag mga indi matarong.” (Binuhatan 24:15) Ginapakita sini nga may paglaum nga mabanhaw ang mga tawo nga nakahimo sing mabug-at nga sala pareho sang paghikog.

a Ang euthanasia, ukon mercy killing, amo ang “pagpatay sa isa nga may malala nga balatian ukon grabe nga pilas para matapos na ang iya pag-antos.” (Merriam-Webster Learner’s Dictionary) Kon magbulig ang doktor para tapuson ang kabuhi sang isa, ginatawag ini nga physician-assisted suicide.

b Ang pila ka tawo nga ginsambit sa Biblia nga naghikog wala nagahimo sang kabubut-on sang Dios.—2 Samuel 17:23; 1 Hari 16:18; Mateo 27:3-5.