Matigayon ang paghidait sa duta indi paagi sa gobierno sang tawo, kundi paagi sa Ginharian sang Dios nga ginagamhan ni Cristo Jesus sa langit. Talupangda ang ginasiling sang Biblia parte sa sining makalilipay nga paglaum.

1.   Pauntaton sang Dios “ang mga inaway sa bug-os nga kalibutan,” bilang pagtuman sa iya promisa nga may “paghidait sa duta sa mga tawo nga iya nahamut-an!”—Salmo 46:9; Lucas 2:14, Maayong Balita nga Biblia.

2.   Ang Ginharian sang Dios sa langit magagahom sa bug-os nga duta. (Daniel 7:14) Subong isa ka gobierno sa bilog nga kalibutan, dulaon sini ang nasyonalismo nga amo ang kabangdanan sang mga inaway.

3.   Si Jesus, nga Manuggahom sang Ginharian sang Dios, ginatawag nga “Principe sang Paghidait,” kag siguraduhon niya nga ang “paghidait walay katapusan.”—Isaias 9:6, 7.

4.   Ang mga tawo nga makiawayon indi makapuyo sa Ginharian, kay “ang iya [sang Dios] kalag nagadumut sa malauton kag sa nagahigugma sang panglugus.”—Salmo 11:5; Hulubaton 2:22.

5.   Ginatudluan sang Dios ang iya mga sakop nga magkabuhi sing mahidaiton. Gani, ginalaragway sang Biblia nga “ang ila mga espada salsalon nila nga mga punta sang arado, kag ang ila mga bangkaw nga mga galab nga inughagbas; ang pungsud indi magbayaw sing espada batok sa pungsud, kag indi na sila magtoon sing inaway.”—Isaias 2:3, 4.

 Subong pa lang, minilyon na ka Saksi ni Jehova sa bilog nga kalibutan ang nakatuon sa panudlo sang Dios nga mangin mahidaiton. (Mateo 5:9) Bisan pa nanuhaytuhay ang amon rasa kag nagapuyo kami sa sobra sa 230 ka pungsod, wala kami nagapakig-away sa amon isigkatawo.