“Anom pa lang ka tuig ang amon bata nga babayi sang gin-istoryahan namon upod sa iya ang parte sa ilimnon. Nakibot gid kami kay damo na sia sing nabal-an.”—Alexander.

•  Ang dapat mo mahibaluan

•  Ang puede mo himuon

•  Ang ginasiling sang Biblia parte sa ilimnon

 Importante nga istoryahon ang mga bata parte sa ilimnon. Indi paghulata nga magtin-edyer ang imo bata. “Tani gin-istorya namon sing mas temprano ang amon bata parte sa husto nga paggamit sang ilimnon,” siling ni Khamit, nga taga-Russia. “Natun-an ko ini sa mabudlay nga paagi kay natukiban ko nga nagsugod na sia sa pag-inom sang 13 pa lang ang edad niya.”

 Ngaa dapat ka mabalaka?

•   Ang mga klasmeyt, pasayod, kag TV makaimpluwensia sa pagtamod sang imo bata parte sa ilimnon.

•   Suno sa Centers for Disease Control and Prevention sa United States, ang nagainom sang 11 porsiento sang naubos nga ilimnon sa United States mga menor de edad.

 Amo kon ngaa ginarekomendar sang mga opisyal para sa maayo nga panglawas nga tudluan sang mga ginikanan ang ila kabataan samtang bata pa parte sa indi maayo nga epekto sang ilimnon. Paano mo ini himuon?

 Handai ang posible nga mga pamangkot sang imo bata. Masami nga mausisaon ang mga bata, kag mas labi na gid ang mga pamatan-on. Gani, maayo nga handaan mo ang sabat sa ila posible nga mga pamangkot. Halimbawa:

•   Kon mamangkot ang imo bata kon ano ang sabor sang ilimnon, mahimo ka magsiling nga ang sabor sang alak daw maaslom nga juice kag ang beer mapait.

•   Kon gusto sang imo bata nga tilawan ang ilimnon, mahimo ka magsiling nga maisog ang ilimnon kag indi maayo ang epekto sini sa mga bata. Sambita ang mga epekto: Ang ilimnon makaparelaks, pero kon masobrahan, mahimo maglingin ang imo ulo, magmaoy ka, kag makahambal sing mga butang nga hinulsulan mo sa ulihi.—Hulubaton 23:29-35.

 Hibalua ang parte sa ilimnon. Ang Biblia nagasiling: “Ang tawo nga maalamon nagahunahuna sing maayo antes sia maghulag.” (Hulubaton 13:16) Hibalua kon ano ang epekto sang pag-inom, pati na ang mga kasuguan kag mga limitasyon nga ginapatuman sa inyo pungsod. Makabulig ini para mangin handa ka sa pagbulig sa imo bata.

 Indi na paghulata nga mamangkot ang imo bata. “Mahimo ginapalibugan sang mga bata ang parte sa pag-inom,” siling ni Mark, isa ka amay nga taga-Britain. “Ginpamangkot ko ang akon bata nga lalaki nga walo ka tuig kon husto bala ukon sala ang pag-inom. Relaks lang ang amon pag-istoryahanay kag indi tama ka pormal para mapabutyag niya sing maayo ang iya opinyon.”

 Mas indi malipatan sang imo bata kon istoryahan ninyo sing pila ka beses ang parte sa ilimnon. Depende sa edad sang imo bata, ilakip sa inyo pag-istoryahanay ang iban pa nga topiko pareho sang paghalong kon naga-drayb kag parte sa sex.

 Mangin halimbawa. Ang mga bata pareho sa espongha. Ginasuyop ukon ginasunod nila ang bisan ano sa palibot nila. Ginapakita sang research nga ang mga ginikanan amo ang may pinakadaku nga impluwensia sa ila kabataan. Buot silingon nga kon nagainom ka para lang marelaks ka ukon maghaganhagan ang imo stress, mahimo pensaron sang imo bata nga ang solusyon sa mga problema amo ang pag-inom. Gani mangin maayo nga halimbawa. Indi magpasobra sa pag-inom.