Ang “classroom” sang kalabanan nga estudyante subong amo na ang ila balay. Kon amo sini ang imo kahimtangan, ano ang pinakamaayo mo nga mahimo? Ari ang pila ka panugda. a

•  Lima ka panugda nga makabulig sa imo

•  Ang siling sang iban

•   Maghimo sing iskedyul. Tinguhai nga masunod mo gid ang imo iskedyul pareho sang ginahimo mo sang nagaeskwela ka sa eskwelahan. Magpain sing tion para sa pagtuon, mga ulubrahon sa balay, kag iban pa nga importante nga mga butang. Puede mo bag-uhon ang imo iskedyul depende sa kahimtangan.

   Prinsipio sa Biblia: “Himua ninyo ang tanan . . . sa mahim-ong nga paagi.”—1 Corinto 14:40, footnote.

   “Pamensara nga daw ara ka lang sa eskwelahan. Dapat mo himuon ang kada butang suno sa iskedyul.”—Katie.

   Pamensara ini: Ngaa maayo gid kon isulat mo ang imo iskedyul kag ibutang ini sa lugar nga madali mo makita?

•   Disiplinaha ang imo kaugalingon. Samtang naga-mature ka, marealisar mo nga dapat mo himuon ang imo ulubrahon bisan pa kon kaisa natamad ka. Indi magpabuyan-buyan!

   Prinsipio sa Biblia: “Magmapisan kamo, indi kamo mangin uyaya sa inyo hilikuton.”—Roma 12:11, footnote.

   “Mabudlay gid disiplinahon ang kaugalingon. Hapos lang mangita balibad kag maghambal nga, ‘Karon lang ko matuon a.’ Dayon, karon indi ka naman magtuon asta nga wala ka na gid makatuon.”—Alexandra.

   Pamensara ini: Paano ang regular nga pagtuon sa pareho nga lugar kag oras kada adlaw makabulig sa akon nga madisiplina pa gid ang akon kaugalingon?

•   Mangita sing lugar nga puede ka makatuon. Ihanda ang tanan mo nga galamiton. Himua nga komportable ang lugar nga imo napilian, pero indi pagpasobrahi kay imbes nga makatuon, basi matulugan ka. Kon wala sing lugar, basi puede ka makatuon sa inyo kusina ukon sa imo kuarto.

   Prinsipio sa Biblia: “Ang mga plano sang mapisan pat-od nga magamadinalag-on.”—Hulubaton 21:5.

   “Ipahigad anay ang bola, ang imo cellphone, kag ang gitara. Kinahanglan wala sing makatublag sa imo samtang nagatuon ka.”—Elizabeth.

   Pamensara ini: Ano ang puede mo himuon para makapokus ka sa pagtuon sa lugar nga imo napilian?

•   Tun-i nga magpokus. Magkonsentrar sa kon ano ang dapat mo himuon, kag indi na maghimo sing iban pa nga butang. Kon dunganon mo ang mga ulubrahon, daku ang tsansa nga magsala ka kag mas madugay mo ini matapos.

   Prinsipio sa Biblia: “[Gamita] sing maayo [ang] inyo tion.”—Efeso 5:16.

   “Kon ara sa tupad ko ang akon cellphone, indi ko gid malikawan nga gamiton ini bisan indi man kinahanglanon kag ginaubos sini ang akon tion.”—Olivia.

   Pamensara ini: Ano ang mahimo mo para mas makapokus ka sa imo ginaobra?

•   Magpulupahuway. Maglakat-lakat, mag-bike ukon mag-exercise. Makaparelaks man kon himuon mo ang mga butang nga nanamian mo. “Pero tapusa anay ang ulubrahon mo,” siling sang libro nga School Power. “Mas manami magpahuway kon natapos mo na ang tanan mo nga ulubrahon.”

   Prinsipio sa Biblia: “Mas maayo pa ang diutay nga pahuway sangsa tuman nga pagpangabudlay kag paglagas sa hangin.”—Manugwali 4:6.

   “Makatuon ka kon paano magtokar sang instrumento ukon mag-paint sa eskwelahan. Ulihi na ang tanan sang narealisar ko nga magamit ko gali ini. Maayo gid kon may kalingawan ka samtang nagaeskwela.”—Taylor.

   Pamensara ini: Ano ang puede mo himuon para mangin tawhay ang imo pensar antes ka magbalik tuon?