PAMANGKOT SANG MGA PAMATAN-ON
Ngaa Dapat Ako Mag-attend sa Kingdom Hall?
Kada semana, duha ka beses nga naga-attend ang mga Saksi ni Jehova sa ila tilipunan para sa pagsimba nga ginatawag Kingdom Hall. Ano ang ginahimo nila diri, kag paano ka makabenepisyo kon mag-attend ka?
Ano ang ginahimo sa Kingdom Hall?
Ang Kingdom Hall isa ka lugar nga ang mga tawo nagatuon parte sa praktikal nga mga butang nga ginatudlo sang Biblia. Mabuligan ka diri nga:
matun-an ang kamatuoran parte sa Dios.
maintiendihan ang buot silingon sang mga nagakatabo subong sa kalibutan.
mangin mas maayo nga tawo.
makakita sing maayo gid nga mga abyan.
Kabalo ka bala? Ang tilipunan sang mga Saksi ni Jehova ginatawag nga Kingdom Hall kay ang topiko diri pirme parte sa Ginharian sang Dios.—Mateo 6:9, 10; 24:14; Lucas 4:43.
Ngaa dapat ka mag-attend?
Ang impormasyon makabulig sa imo. Ang mga prinsipio sa Biblia nga ginabinagbinag sa Kingdom Hall sang mga Saksi ni Jehova makabulig sa imo nga ‘magkuha sing kaalam.’ (Hulubaton 4:5) Buot silingon, ang Biblia makabulig sa imo sa paghimo sing maayo nga mga desisyon. Makabulig man ini sa imo nga masabat ang importante nga mga pamangkot sa kabuhi, pareho sang:
Ari ang pila sa mga halimbawa sang mga pamulongpulong nga mabatian sa amon miting kon Sabado ukon Domingo:
Ngaa Dapat Magpatuytoy sa Biblia?
Sa Diin Ka Makapangayo sing Bulig sa Tion sang Kasisit-an?
Ano ang Ginahimo sang Ginharian sang Dios sa Aton Subong?
“Ang akon klasmeyt nag-attend sa amon miting. Nagtupad sia sa amon pamilya, kag gin-share namon sa iya ang amon ginagamit nga mga libro. Pagkatapos sang miting, ginsilingan niya ako nga nanamian gid sia sa mga komento nga iya nabatian sa mga bahin nga may audience-participation. Nagsiling pa sia nga sa simbahan nila wala sing magamit nga mga tulun-an pareho sang ginagamit naton.”—Brenda.
Kabalo ka bala? Wala sing bayad ang pag-attend sa Kingdom Hall, kag wala man sing pagpangolekta.
Ang pagpakig-upod sa iban makapalig-on sa imo. Ang Biblia nagsiling nga ang isa ka rason kon ngaa dapat magtipon ang mga Cristiano amo nga ‘magpalig-unay sila sa isa kag isa.’ (Hebreo 10:24, 25) Sa kalibutan subong, ginauna sang kalabanan ang ila kaugalingon. Gani makapalig-on gid nga makaupod ang mga tawo nga ginauna ang Dios kag ang iban imbes nga ang ila kaugalingon.
“Kon kaisa kapoy gid ako. Pero kon ara na ako sa Kingdom Hall kag makaistorya sa mga tawo, naganami ang akon pamatyag. Pagpauli ko, malipayon na ako kag handa naman sa masunod nga adlaw.”—Elisa.
Kabalo ka bala? May sobra 120,000 ka kongregasyon ang mga Saksi ni Jehova sa bilog nga kalibutan, kag nagatipon sila sa sobra 60,000 ka lokasyon. Sa average, mga 1,500 ka Kingdom Hall ang ginahimo kada tuig para may tilipunan ang nagadamo nga tumalambong. a
a Para mabal-an ang lokasyon sang miting, kadtui ang “Mga Miting sang Kongregasyon sang mga Saksi ni Jehova” nga pahina kag i-click ang “Mangita sing Lokasyon nga Malapit sa Imo.”
Basi Manamian Ka Man
ANG GINASILING SANG IBAN
Paano Makabulig ang Biblia sa Akon?
Ang sabat makabulig sa imo nga makatigayon sing mas malipayon nga kabuhi.
SABAT SA MGA PAMANGKOT SA BIBLIA
Kinahanglan Gid Bala nga May Relihion Kita?
Masimba bala sang isa ka tawo ang Dios sa iya kaugalingon nga paagi?
