Posible ang tanan mo nga abyan nagagamit sang social media kag amo ini ang pirme nila ginaistoryahan. Basi ginasuyaan ka nila kay wala ka pa sing account. Ano ang dapat mo mabal-an? Kag ano ang puede mo himuon sa sini?

 Indi lang ikaw ang wala ginapasugtan nga maggamit sang social media. Madamo nga ginikanan ang indi gusto nga maggamit sang social media ang ila kabataan kay posible nakita nila ang epekto sini pareho sang:

•   depresyon kag iban pa nga problema sa mental health.

•   pornograpiya, sexting, kag cyberbullying.

•   paglainay sang buot sang mag-abyan bangod lang sa gamay nga rason.

 Madamo nga tin-edyer ang nag-untat sa paggamit sang social media. Para sa ila, madamo sang indi maayo nga epekto ang social media sa ila imbes nga makahatag ini sang maayo. Binagbinaga ang masunod nga matuod nga halimbawa:

•   Para kay Priscilla, daku nga tion ang ginakuha sa iya sang social media nga maggamit niya kuntani sa mas importante nga mga butang.

•   Nag-untat si Jeremy sa paggamit sang social media kay indi niya makontrol ang naga-pop up nga mga impormasyon nga indi maayo.

•   Bangod sa social media, pirme na nagapokus si Bethany sa ginahimo sang iban.

 “Maayo lang kay nagdesisyon ako nga i-delete ang akon social media nga app. Wala ko ini ginapangita, kag mas makapokus ako sa mas importante nga mga butang.”—Sierra.

 “Indi ko gusto nga maadik sa social media kag maapektuhan sa reaction sang mga tawo sa akon mga post. Indi mahapos para sa akon nga i-delete ang akon account, pero nalipay ako sang ginhimo ko ini. Mas nagtawhay na ang akon pamensaron.”—Kate.

 Tumana ang imo mga ginikanan. Ipakita sa ila nga mature ka na paagi sa pagtuman sa ila mga pagsulundan parte sa social media kag wala ka nagapangakig ukon nagareklamo sa sini.

 Prinsipio sa Biblia: “Ang buangboang nga tawo wala nagapugongpugong sang iya kaakig, pero ang maalam nga tawo mapinasensyahon kag ginapunggan niya ang iya kaakig.”—Hulubaton 29:11, Maayong Balita nga Biblia.

 Basi hambalan ka sang iban nga maggamit sang social media ukon maghimo sang account nga wala kabalo ang imo mga ginikanan. Indi gid ina insakto! Kay kon may ginasekreto ka sa imo mga ginikanan, makabatyag ka sing kulba kag makonsiensia ka. Kon mabal-an nila nga may account ka sa social media, posible akigan ka nila kag indi na sila magsalig sa imo.

 Prinsipio sa Biblia: “Luyag namon magkabuhi sing bunayag sa tanan nga butang.”—Hebreo 13:18.

 Himua ini nga imo personal nga desisyon. Pareho sa mga tin-edyer kaina, posible may ginapensar ka man nga mga rason kon ngaa untatan mo ang paggamit sang social media. Kon kumbinsido ka nga indi gid maayo para sa imo ang paggamit sang social media, untati ang paggamit sini indi bangod amo ini ang gusto sang imo mga ginikanan, kundi bangod personal mo ini nga desisyon. Kon amo sini ang himuon mo, indi ka mahuya kon pamangkuton ka sang imo mga kaedad parte sini kag posible indi ka man nila pagsuyaan.

 Ang punto: Tumana ang imo mga ginikanan, kag magpokus sa maayo nga epekto sini sa imo para ang ila desisyon mangin imo man personal nga desisyon. Ginapasugtan ka man subong sang imo mga ginikanan sa paggamit sang social media ukon wala, ang importante mabuhi ka bisan wala ang social media.