Basaha ang natabo kay Karina, kag imadyina nga natabo man ini sa imo. Ano ang himuon mo kon ara ka sa lugar niya?

 Karina: “Madasig ang akon pagpadalagan sang salakyan sang nagapakadto ako sa eskwelahan, gani gintiketan ako sang pulis. Naglalain gid ako! Nanugid ako kay Mama, kag ginsilingan niya ako nga isugid ini kay Papa. Pero, indi ko gusto.”

1.  Opsyon A: Hipsan na lang kag tani indi na mabal-an ni Papa.

2.  Opsyon B: Isugid kay Papa ang natabo.

 Ayhan daw mahapos himuon ang Opsyon A. Kay man, mahimo pensaron ni Mama mo nga nanugid ka na kay Papa mo. Pero may maayo nga mga rason kon ngaa dapat mo isugid ang imo mga sala—bisan ano pa ini.

1.  1. Bangod amo ini ang husto. Parte sa talaksan sang mga Cristiano, ang Biblia nagasiling: “Luyag namon maggawi sing bunayag sa tanan nga butang.”​—Hebreo 13:18.

    “Ginatinguhaan ko gid nga mangin honest kag responsable sa akon mga ginahimo​—kag mag-aku gilayon kon may sala ako.”​—Alexis.

2.  2. Bangod masami nga ginapatawad ang mga nagaaku sang ila sala. Ang Biblia nagasiling: “Ang nagatabon sang iya mga paglalis indi mag-uswag, apang ang bisan sin-o nga nagatu-ad kag nagabiya magaagum sing kalooy.”​—Hulubaton 28:13.

    “Kinahanglan ang kaisog sa pag-aku sang sala, pero kon himuon mo ini labi ka nga saligan sang mga tawo. Makita nila nga honest ka. Kon akuon mo ang imo sala, ang malain ginabuslan mo sing maayo.”​—Richard.

3.  3. Labi sa tanan, bangod nagapahamuot ini kay Jehova nga Dios. Ang Biblia nagasiling: “Ginakangil-aran ni Jehova ang mga malimbungon, apang nagapakig-abyan Sia sing suod sa mga matarong.”​—Hulubaton 3:​32, NW.

    “Sang nakahimo ako sing mabug-at nga sala, narealisar ko nga kinahanglan ko ini isugid. Indi gid ako pagpakamaayuhon ni Jehova kon indi ko pagsundon ang iya pamaagi.”​—Rachel.

 Paano gin-atubang ni Karina ang iya sala? Gintinguhaan niya nga taguon kay Papa niya ang natabo. Pero, wala niya ini natago asta san-o. “Pagligad sang mga isa ka tuig,” siling ni Karina, “ginatan-aw ni Papa ang mga papeles sang insurance namon sang natalupangdan niya nga may rekord nga gintiketan ako. Naglala lang ang sitwasyon—bisan si Mama naakig kay wala ko sia gintuman!”

 Leksion: Si Karina nagsiling: “Ang pagtago sang sala magapalala lang sa sitwasyon. Atubangon mo man ini gihapon sa ulihi!”

 Ang tanan makahimo sing sala. (Roma 3:​23; 1 Juan 1:8) Subong sang natun-an naton, ginapakita mo nga mapainubuson kag hamtong ka kon akuon mo ini—kag himuon ini sa gilayon.

 Dayon, magtuon sa imo nga sala. Makapasubo nga may mga tin-edyer nga wala makahimo sini. Ayhan pareho sila kay Priscilla. Sia nagsiling: “Sang una, grabe gid ang akon kasubo kon makasala ako. Manubo ang panan-aw ko sa akon kaugalingon, gani kon makasala ako daw indi ko ini madala. Nagalalain gid ako kay pamatyag ko wala na ako sing paglaum.”

 Amo man bala sini ang imo ginabatyag kon kaisa? Kon amo, dumduma: Ang pagpokus sa imo nahimo nga mga sala daw pareho sa pagtan-aw sa rearview mirror samtang nagadrayb. Kon himuon mo ini, magabatyag ka lang nga wala sing pulos kag madulaan ka sing kusog sa pag-atubang sang mga kabudlayan.

 Sa baylo, mangin balanse.

 “Dumduma ang imo mga sala, kag magtuon sa sini para indi mo na ini pagsuliton. Pero, likawi man nga magpokus sa sini para indi ka maluyahan.”​—Elliot.

 “Ginakabig ko ang akon mga sala subong mga eksperiensia nga nagatudlo sa akon sang mga leksion para mangin mas maayo ako nga tawo, kag sang dapat ko himuon kon matabo ini liwat. Mas maayo ini kay nagabulig ini sa akon nga maghamtong.”​—Vera.