May pagsulundan bala sa inyo balay nga nabudlayan ka magtuman? Ini nga artikulo kag worksheet makabulig sa imo nga maistorya ang imo mga ginikanan parte sa pagsulundan.

•  Ang eksakto nga pagtan-aw sa mga butang

•  Ang eksakto nga paagi sa pag-istorya sa imo mga ginikanan

•  Ang ginasiling sang iban

 Pagpati sang iban: Kon maghalin ka sa inyo balay, indi mo na kinahanglan magsunod sa pagsulundan.

 Ang matuod: Kinahanglan mo gihapon magsunod sa mga pagsulundan bisan wala ka na sa inyo. May salabton ka gihapon sa iban—ayhan sa imo amo, sa imo landlord, ukon sa gobierno. “Nagapati ako nga ang mga pamatan-on nga nabudlayan magsunod sa mga pagsulundan sa ila balay, mas mabudlayan kon magpain na sila,” siling sang 19 anyos nga si Danielle.

 Ang Biblia nagasiling: “Mangin matinumanon sa mga panguluhan kag mga awtoridad.” (Tito 3:1) Kon tinguhaan mo nga masunod ang mga pagsulundan sang imo mga ginikanan, mahanas ka nga maatubang ang iban nga sitwasyon sa kabuhi kon mangin adulto ka na.

 Ang puede mo himuon: Magpokus sa mga benepisyo sang pagsulundan. “Ang mga pagsulundan sang akon mga ginikanan nakabulig sa akon nga pilion ang akon mga abyan kag badyeton ang akon tion,” siling ni Jeremy. “Nakabulig man ini sa akon nga malikawan ang sobra nga pagtan-aw sang TV ukon paghampang sang video game kag matun-an ang paghimo sang may pulos nga mga butang nga nanamian ko gihapon himuon asta subong.”

 Pero, ano ang himuon mo kon daw indi mo maintiendihan ang pagsulundan? Halimbawa, ang pamatan-on nga si Tamara nagsiling: “Ginapasugtan ako sang akon mga ginikanan nga magkadto sa iban nga pungsod, pero sang magbalik ako diri sa balay, indi sila magsugot nga mag-drayb ako pakadto sa isa ka siudad nga mga 20 minutos lang ang distansia!”

 Kon amo man sini ang imo sitwasyon, sala bala nga istoryahon mo ang imo mga ginikanan parte sa ila pagsulundan? Indi! Dapat mo lang mabal-an kon san-o kag kon paano mo ini himuon.

 San-o. “Kon madugay mo na napamatud-an sa imo mga ginikanan nga responsable ka kag masaligan ka nila, puede mo sila maistorya kon may gusto ka ipabag-o sa pagsulundan,” siling sang tin-edyer nga si Amanda.

 Nakita ni Daria nga matuod gid ini. “Nagsugot lang si Nanay nga bag-uhon ang pagsulundan sang nakita niya nga pirme gid ako nagapati sa iya,” siling niya. Tandai nga ang pagsalig wala ginapangayo, kundi ginapangabudlayan.

 Ang Biblia nagasiling: “Tumana ang sugo sang imo amay, kag indi pagsikwaya ang instruksion sang imo iloy.” (Hulubaton 6:​20) Kon sundon mo ini, makatipon ka sing pagsalig sang imo mga ginikanan kag may basihan ka na kon mag-istorya ka sa ila.

 Paano. “Ang may respeto kag kalmado nga pag-istorya sa imo mga ginikanan mas maayo sangsa pagkumod kag pagsinggit,” siling sang pamatan-on nga si Steven.

 Ugyon man sa sina si Daria, nga ginsambit bag-o lang. “Kon makigbais ako kay Nanay, wala sing magabag-o,” siling niya. “Mas estriktuhan pa gid gani niya ang pagsulundan.”

 Ang Biblia nagasiling: “Ang buangbuang wala nagapugong sang iya balatyagon, apang ginapunggan ini sang maalamon nga tawo.” (Hulubaton 29:11) Daku gid ang benepisyo kon tun-an mo nga magpugong sang kaugalingon, indi lamang sa inyo balay kundi sa eskwelahan, sa trabaho, kag bisan diin man.

 Ang puede mo himuon: Mamensar anay antes ka maghambal. Kon magpanginit ka, mahimo nga madula ang pagsalig nga ginpangabudlayan mo. Gani, may rason gid ang Biblia sang magsiling ini nga “ang indi dali maakig nagapakita sing masangkad nga paghangop.”​—Hulubaton 14:29.

 Tip: Gamita ang worksheet nga nalakip sa sini nga artikulo sa pagbinagbinag sa mga pagsulundan. Kon kinahanglan, istoryahi ninyo ini sang imo mga ginikanan.