1. Yaxayas xav kom cov neeg Ixayees paub li cas?

 YAXAYAS piav txog Yehauvas tias nws yog “Vajtswv tus uas muaj kev ncaj ncees.” (Yaxayas 65:16) Tiam sis nyob rau hauv Cov Nqe Lus Henplais txhais tias Yehauvas yog “tus Vajtswv Amees.” Lo lus Amees txhais hais tias “muaj raws li ntawd” los sis “muaj tseeb tiag.” Thaum lo lus amees tshwm nrog rau Yehauvas los sis Yexus hauv phau Vajlugkub, qhia tau tias txhua yam nkawd tau hais yeej yuav muaj tseeb xwb thiaj tag. Yog li ntawd, Yaxayas xav kom cov Ixayees paub li no tias: Thaum twg Yehauvas tau hais ib yam twg tseg lawm, yeej yuav muaj raws li ntawd. Yehauvas yeej ib txwm ua raws li nws cog tseg tiag.

2. Vim li cas peb ho tso siab tau rau Yehauvas tej lus cog tseg, thiab peb yuav kawm txog cov lus nug twg?

² Peb puas tso siab tau tias tej uas Yehauvas cog tseg rau yav tom ntej yuav muaj tseeb tiag? Yuav luag tau 800 xyoo tom qab Yaxayas ua neej nyob, tus tub txib Povlauj qhia tias vim li cas peb yuav tau tso siab rau Vajtswv tej lus cog tseg. Nws hais li no tias: “Vajtswv tsis hais dag.” (Henplais 6:18) Muab ua piv txwv li no tias thaum ib tug dej cag twg nrhau tawm tuaj, yeej tsis muaj tsos qab thiab tsos daw sib txuam. Zoo tib yam li ntawd, Yehauvas yog qhov tseeb, nws thiaj tsis hais dag. Yog li ntawd, peb thiaj tso siab tau rau txhua yam uas Yehauvas hais tias yuav muaj tshwm sim rau yav tom hauv ntej. Nyob rau hauv zaj kawm no, peb yuav tham txog cov lus no:  Yehauvas tau cog lus tias nws yuav muab dab tsi rau peb yav tom ntej? Yehauvas qhia li cas xwv peb thiaj paub tias tej nws cog tseg yuav muaj tiag?

3. (1) Vajtswv cov tib neeg nyiam lo lus cog tseg twg? (Tshwmsim 21:3, 4) (2) Thaum peb qhia tib neeg txog Vajtswv lo lus cog tseg no, lawv hais li cas?

³ Nyob thoob plaws ntiaj teb, muaj ib lo lus cog tseg uas muaj nuj nqis heev rau Vajtswv cov tib neeg. (Nyeem Tshwmsim 21:3, 4.) Yehauvas cog lus tias muaj ib hnub “tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.” Thaum peb mus qhia txoj xov zoo, peb kheev muab cov nqe Vajlugkub no coj mus nplig tib neeg lub siab thiab qhia rau lawv tias lub neej hauv lub Vaj Kaj Siab yuav zoo li ntawd. Muaj ib txhia xav li cas xwb thaum peb qhia txog Vajtswv lo lus cog tseg no rau lawv? Lawv teb hais tias, “Ntshe lam hais xwb, xyov puas muaj tiag.”

4. (1) Thaum Yehauvas cog lus tias yuav muaj lub Vaj Kaj Siab, nws paub tias yuav muaj li cas rau peb tiam? (2) Tsis yog Yehauvas lam cog lus xwb, tiam sis nws tau ua dab tsi ntxiv?

⁴ Thaum Yehauvas hais kom Yauhas sau txog nws lo lus cog tseg tias yuav muaj lub Vaj Kaj Siab, Yehauvas paub ntsoov tias peb yuav muab txoj kev vam kev cia siab no mus nplig lwm tus lub siab thaum peb mus qhia txoj xov zoo. Yehauvas kuj paub tias muaj ib txhia tib neeg kuj ntseeg tsis taus tias yuav muaj “tej yam tshiab” no rau yav tom ntej. (Yaxayas 42:9; 60:2; 2 Kauleethaus 4:3, 4) Yog li ntawd, peb yuav ua li cas thiaj pab tau lwm tus thiab peb tus kheej pom tias Tshwmsim 21:3, 4 yeej yuav muaj tiag tiag? Yehauvas qhia meej tseeb tias vim li cas peb thiaj tso siab tau tias nws yuav ua raws li nws tau cog tseg. Ua li nws muab dab tsi los ua puav pheej qhia?

5. Cov nqe Vajlugkub twg qhia kom peb tso siab rau Vajtswv lo lus cog tseg, thiab cov nqe ntawd hais li cas?

⁵ Peb yeej tso siab tau rau Yehauvas lo lus cog tseg tias yuav muaj lub Vaj Kaj Siab raws li cov nqe Vajlugkub yuav hais no tias: “Tus uas zaum saum lub zwmtxwv hais rau kuv hais tias, ‘Nimno kuv yuav tsim dua ib puas tsav yam tshiab!’ Thiab nws hais dua rau kuv hais tias, ‘Koj cia li sau tej lus no cia, rau qhov tej lus no yog lus tseeb thiab tso siab tau.’ Thiab nws hais tias, ‘Tiav lawm! Kuv yog Alafas thiab yog Aumenkas, kuv yog lub hauvpaus thiab kuv yog lub ntsis.’”​—Tshwmsim 21:5, 6.

6. Vim li cas Tshwmsim 21:5, 6 ho pab tau kom peb tso siab rau Vajtswv lo lus cog tseg?

⁶ Vim li cas ob nqes Vajlugkub no ho pab tau kom peb tso siab tau rau Vajtswv lo lus cog tseg? Nyob rau ob nqes no, zoo tib yam li Yehauvas kos npe rau ntawm ib daim ntawv tseg lawm tias nws yuav ua raws li nws cog lus tseg. Peb nyeem ntawm Tshwmsim 21:3, 4 txog tej yam Vajtswv cog tseg tias nws yuav ua tiam sis nyob rau ntawm nqe 5 thiab 6, zoo yam nkaus li nws suam npe tias nws yuav ua raws li nws tej lus cog tseg ntawd rau peb. Cia peb ua tib zoo soj ntsuas cov lus Yehauvas cog tseg xwv peb thiaj li tso siab rau nws.

7. Leej twg yog tus hais lus nyob rau nqe 5, thiab vim li cas cov lus ntawd ho tshwj xeeb?

⁷ Nqe 5 pib li no hais tias: “Tus uas zaum saum lub zwm txwv hais tias.” (Tshwmsim 21:5, thawj kab) Cov lus no tshwj xeeb heev vim yog peb zaug uas Yehauvas hais lus nyob rau hauv phau Tshwmsim. Cov lus no tsis yog ib tug tub txib saum ntuj los sis Yexus hais tiam  sis yog Yehauvas hais kiag ntag! Qhov no pab tau kom peb tso siab hais tias Yehauvas “yeej tsis dag li.” (Titus 1:2) Yog li ntawd, cov lus uas hais nyob rau hauv Tshwmsim 21:5, 6 yeej yuav muaj xwb thiaj tag.

8. Vajtswv cov lus cog tseg puas yuav muaj tiag thiab vim li cas peb ho paub li ntawd? (Yaxayas 46:10)

⁸ Nyob thoob plaws phau ntawv Tshwmsim, Yehauvas kheev hais tias “saib maj” los twb yog vim nws rub kom cov tib neeg tig ntsej los mloog seb nws yuav hais txog dab tsi ntxiv. (Tshwmsim 21:5) Ua li Yehauvas yuav hais dab tsi? Nws hais txuas ntxiv tias: “Kuv tsim txhua yam dua tshiab.” Yehauvas yuav kho txhua yam tshiab rau yav tom ntej. Tej uas nws hais no nws hais yam nkaus li twb muaj tiav tag lawm.​—Nyeem Yaxayas 46:10.

9. (1) Thaum hais txog “tsim txhua yam dua tshiab,” yog hais txog dab tsi? (2) Yuav muaj li cas rau “lub ntuj qub thiab lub ntiajteb qub”?

⁹ Thaum Yehauvas hais tias “kuv tsim txhua yam dua tshiab,” nws hais txog ob yam uas nws tab tom npaj siab ua. Qhov ib, Yehauvas yuav muab lub sim ceeb niaj hnub nim no rhuav tshem tawm mus. Qhov ob, nws yuav txhim kho lub ntiaj teb dua tshiab. Nyob rau hauv Tshwmsim 21:2 hais tias: “Lub ntuj qub thiab lub ntiajteb qub twb ploj tas lawm.” “Lub ntuj qub” yog hais txog tib neeg tej nom tswv uas muaj Xatas thiab nws cov dab ua txha nqaj qaum. (Mathais 4:8,9; 1 Yauhas 5:19) Hos “lub ntiaj teb qub” yog hais txog cov tib neeg lim hiam tiam no vim nyob hauv phau Vajlugkub kheev muab tib neeg hu tias yog “ntiajteb”. (Chivkeeb 11:1; Phau Ntawv Nkauj 96:1) Yehauvas yuav tsis kho tib neeg thiab tib neeg tej nom tswv kom zoo zuj zus tuaj tiam sis nws yuav muab rhuav tshem tawm mus. Nws yuav cia kom muaj “lub ntuj tshiab thiab lub ntiajteb tshiab” uas yog tsa ib roog nom tswv tshiab los mus kav thiab cov neeg uas nyob rau thaum ntawd yuav yog cov ncaj ncees lawm xwb.

10. Yehauvas yuav tsim dab tsi tshiab?

¹⁰ Muaj ib yam ntxiv uas Yehauvas yuav ua dua tshiab. (Tshwmsim 21:5) Yehauvas yuav muab lub ntiaj teb no kho kom zoo npaum nkaus li lub vaj Edees. Txuas ntxiv ntawd, nws tseem yuav kho kom txhua tus noj qab haus huv. Cov uas lub cev tsis meej xeeb, tsis pom kev thiab tsis hnov ntsej los yuav zoo du lug thiab nws tseem yuav tsa cov neeg uas nruam sim lawm rov qab los muaj txoj sia dua.​—Yaxayas 25:8; 35:1-7.

11. Yehauvas sam hwm kom Yauhas ua dab tsi thiab vim li cas?

¹¹ Vajtswv tau hais ib yam ntxiv xwv peb thiaj tso siab rau nws. Nws hais rau Yauhas li no tias: “Cia li sau tej no cia vim tej lus no tso siab tau thiab muaj tseeb.” (Tshwmsim 21:5) Yehauvas tsis yog hais kom “sau” xwb tiam sis nws qhia tias yog vim li cas. Nws hais tias: “Vim tej lus no tso siab tau thiab muaj tseeb.” Qhov no tias peb yeej tso siab tau rau Vajtswv cov lus thiab nws cov lus yeej muaj tseeb. Peb zoo siab kawg nkaus li uas Yauhas muab Vajtswv cov lus “sau” xwv peb thiaj li tau nyeem thiab xav txog tej koob hmoov uas Vajtswv yuav pub thaum nyob rau hauv lub Vaj Kaj Siab.

12. Vim li cas Yehauvas hais tias: “Tiav lawm!”

¹² Yehauvas hais ntxiv tias: “Tiav lawm!” (Tshwmsim 21:6) Yehauvas hais zoo yam nkaus li txhua yam txog lub Vaj Kaj Siab twb muaj tiav tag lawm. Tos nws hais li no los tsis  muaj ib yam yuav txwv tau nws kom tsis txhob ua raws li nws tau teem tseg. Cia peb mus kawm dua ib yam ntxiv uas Yehauvas qhia xwv peb thiaj paub meej tseeb tias nws tej lus cog tseg yeej yuav muaj xwb xwb li thiaj tag.

13. Vim li cas Yehauvas ho hais tias: “Kuv yog Alafas thiab yog Aumenkas”?

¹³ Yehauvas ua peb zaug yog toog rau Yauhas pom. (Tshwmsim 1:8; 21:5, 6; 22:13) Txhua qhov yog toog Yehauvas hais tias: “Kuv yog Alafas thiab yog Aumenkas.” Alafas yog cov Kilis thawj tug tsiaj ntawv hos Aumenkas yog tus tsiaj ntawv xaus. Thaum Yehauvas hais tias nws yog tus “Alafas thiab yog Aumenkas,” nws xav kom peb paub tseeb tseeb tias thaum nws tau ua dab tsi lawm, nws yeej yuav ua kom tiav.

14. (1) Piav seb thaum twg Yehauvas hais “Alafas” thiab thaum twg nws yuav hais “Aumenkas.” (2) Cov lus nyob rau hauv Chivkeeb 2:1-3 qhia peb li cas?

¹⁴ Yehauvas qhia rau Adas thiab Evas nkawd tias nws lub ntsiab yog li cas rau noob neej thiab lub ntiaj teb. Nyob rau hauv phau Vajlugkub hais tias: “Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb.” (Chivkeeb 1:28) Thaum Yehauvas nyuam qhuav pib qhia txog nws lub ntsiab ces zoo yam nkaus li nws hais tias “Alafas.” Hos thaum muab lub ntiaj teb kho ua lub vaj kaj siab thiab tib neeg los nyob puv ntiaj teb ntia lawm ces yog nws lub hom phiaj xaus, thiaj zoo yam nkaus li nws hais tias “Aumenkas.” Chivkeeb 2:1-3 qhia tias hnub xya yog ib hnub uas tshwj xeeb vim thaum hnub xya xaus, Yehauvas lub ntsiab rau tib neeg  thiab lub ntiaj teb yuav muaj tiav tag nrho.​—Nyeem.

15. Vim li cas Xatas ho xav tias nws yuav txwv tau kom tsis txhob muaj Yehauvas lub ntsiab?

¹⁵ Tom qab Adas thiab Evas nkawd ua txhaum, nkawd txoj kev txhaum thiaj los puas tsuas rau nkawd tej xeeb leej xeeb ntxwv, lawv thiaj tau saws kev ploj kev tuag. (Loos 5:12) Qhov no zoo yam nkaus li Xatas txwv tau kom tsis txhob muaj Yehauvas lub ntsiab thiab kom Yehauvas ua tsis tau li nws cog tseg. Xatas xav hais tias Yehauvas yuav muab Adas thiab Evas nkawd rhuav tshem tawm mus ces mam li tsim dua ib khub txij nkawm uas tsis muaj kev txaug kev txhaum kom thiaj muaj tiav li Yehauvas lub ntsiab rau tib neeg. Tiam sis yog Vajtswv ua li ntawd ces Xatas yuav nkaug kiag hais tias Vajtswv yog ib tug dag vim nws tsis ua raws li nyob hauv Chivkeeb 1:28 tias nws xav kom Adas thiab Evas nkawd tej xeeb ntxwv huam vam mus puv nkaus ntiaj teb.

16. Vim li cas Xatas ho xav tias nws yuav nkaug tau Yehauvas tias Nws ua tsis tau li Nws cog tseg?

¹⁶ Tej zaum Xatas xav tias Yehauvas yuav cia Adas thiab Evas nkawd yug tej me tub me nyuam uas yuav muaj kev txaug kev txhaum mus li. (Tej Lus Qhia 7:20; Loos 3:23) Yog hais tias Adas thiab Evas nkawd tej tub ki yog noob txaug neeg txhaum xwb ces Xatas yuav nkaug tias Yehauvas ua tsis tau raws li Nws lub ntsiab kom tib neeg zoo tiav tiav rau hauv lub Vaj Kaj Siab.

17. Yehauvas kho qhov uas Xatas, Adas thiab Evas lawv tau tawm tsam li cas, thiab thaum xaus zoo li cas? (Saib daim duab.)

¹⁷ Xatas yeej ras tsis txog tej Yehauvas yuav ua. Yehauvas twb npaj tseg tias nws yuav kho li cas rau li cas tab txawm Xatas, Adas thiab Evas lawv ntxeev siab tawm tsam. (Phau Ntawv Nkauj 92:5) Yehauvas cia Adas thiab Evas nkawd muaj me tub me nyuam kom qhia tau tias nws yeej tsis dag. Tsis tas li ntawd, Yehauvas qhia ntxiv tias yeej tsis muaj ib yam dab tsi yuav los txwv tau nws. Nws thiaj li cia muaj ib tug “xeebntxwv” los mus cawm Adas thiab Evas nkawd tej tub ki. (Chivkeeb 3:15; 22:18) Xatas tsuas xav txog nws tus kheej xwb, nws thiaj li ras tsis txog tias yuav muaj ib tug xeeb ntxwv los muab nws txoj sia los mus this noob neej txoj vim tus nqe txhiv ntawd chiv los ntawm txoj kev hlub. (Mathais 20:28; Yauhas 3:16) Vim muaj tus nqe txhiv, thaum 1,000 xyoo uas Khetos kav xaus, tib neeg yuav tsis muaj kev txaug kev txhaum thiab ua  neej nyob raws li Yehauvas lub ntsiab. Ces thaum ntawd yuav zoo yam li Yehauvas hais tias, “Aumenkas.”

18. Yehauvas qhia peb yam twg kom peb cia siab rau nws? (Saib lub ntsiab ““ Peb Yam Kom Peb Tso Siab Rau Yehauvas.”)

¹⁸ Nyob rau hauv zaj kawm no peb tau tham tias vim li cas peb ntseeg tias lub ntiaj teb yeej yuav ua lub Vaj Kaj Siab. Kuj muaj peb yam ntxiv uas peb muab qhia tau rau lwm tus tias yeej yuav muaj tiag tiag li. Qhov ib, Yehauvas yog tus cog lus. Nyob rau hauv phau Tshwmsim hais tias: “Saib maj, kuv tsim txhua yam dua tshiab.” Yehauvas muaj tswv yim, muaj hwj chim, thiab muaj lub siab kub lug xav ua kom txhua yam tiav li nws tau cog tseg. Qhov ob, Yehauvas yeej paub ntsoov tias txhua yam nws hais yeej yuav muaj tiag tiag xwb thiaj tag. Nws thiaj li hais li no tias “tej lus no tso siab tau thiab muaj tseeb” thiab “tiav lawm!” Qhov peb, tsis muaj ib yam twg yuav txwv tau Yehauvas kom tsis txhob muaj raws li nws twb tau pib lawm. Nws hais tias: “Kuv yog Alafas thiab yog Aumenkas.” Thaum txhua yam tiav tag lawm, Xatas yuav yog tus dag thiab txwv tsis tau Yehauvas kom tsis txhob ua tau raws li Nws lub ntsiab.

19. Thaum tib neeg ua xyem xyav txog Vajtswv lo lus cog tseg txog lub Vaj Kaj Siab, koj yuav qhia li cas?

¹⁹ Nco ntsoov tias thaum koj qhia tib neeg txog tej uas Yehauvas cog tseg tias yuav muaj xwb thiaj tag ces yuav pab tau koj yim huab tso siab rau nws. Lwm zaus yog koj nyeem Yehauvas ib lo lus cog tseg twg txog lub Vaj Kaj Siab zoo li hais hauv li Tshwmsim 21:4 es tus ntawd ho teb tias, “Ntshe lam hais xwb,” ces cia li mus nyeem nqe 5 thiab 6. Qhia rau nws paub tias ob nqes no Yehauvas yog tus cog lus ces yeej yuav muaj raws li nws cog tseg xwb thiaj tag.​—Yaxayas 65:16.