1. 1. XATAS UAS YOG NTXWG NYOOG. Xatas yog tus txha nqaj qaum ntawm txhua yam kev ntxub ntxaug uas peb pom niaj hnub no. Vajtswv yuav rhuav tshem Xatas thiab txhua tus uas muaj lub siab ntxub lwm leej lwm tus li nws.​—Phau Ntawv Nkauj 37:38; Loos 16:20.

2. 2. XATAS LUB QAB NTUJ PHEM. Vajtswv yuav rhuav tshem txhua yam kev lim hiam hauv lub qab ntuj no, tsis hais tej nom tswv uas tsis ncaj thiab cov thawj coj ntawm tej kev ntseeg uas qhia kom tib neeg sib ntxub. Tsis tas li ntawd, nws yuav rhuav tshem tej tub lag tub luam uas muaj lub siab hlob ntxias noj ntxias qhe.​—2 Petus 3:13.

3. 3. NOOB NEEJ TXOJ KEV TXHAUM. Phau Vajlugkub qhia tias txhua tus yog neeg txhaum. Lub txim txhaum ntawd ua rau noob neej xav txog zaj phem thiab ua tej yam phem nkaus xwb. (Loos 5:12) Tsis tas li ntawd, kuj ua rau tib neeg khaws chim thiab ntxub lwm tus. Vajtswv yuav pab peb muab lub siab ntxub ntxaug tshem tawm mus ib txhis.​—Yaxayas 54:13.

1. 1. YUAV MUAJ KEV NCAJ NCEES. Vajtswv tus uas nyob saum ntuj ceeb tsheej yuav kav lub ntiaj teb no. (Daniyees 2:44) Yuav tsis muaj kev xaiv ntsej xaiv muag. Ib haiv neeg yuav saib taus ib haiv neeg. Vajtswv yuav rhuav tshem txhua txoj kev tsis ncaj ncees uas peb raug niaj hnub niam no.​—Lukas 18:7.

2. 2. NOOB NEEJ YUAV MUAJ KEV THAJ YEEB. Yuav tsis muaj kev sib ntaus sib tua thiab kev txom nyem ntxiv li lawm. (Phau Ntawv Nkauj 46:9) Txhua tus hauv lub ntiaj teb yuav tsis txhawj tsis ntshai, vim ib leeg yuav hlub ib leeg thiab nyob sib haum xeeb.​—Phau Ntawv Nkauj 72:7.

3. 3. TIB NEEG YUAV NYOB TSO SIAB PLHUAV. Txhua tus yuav noj sib hlub haus sib ce. (Mathais 22:39) Peb yuav tsis muaj kev ntxhov siab los sis nco txog tej kev phem uas peb raug yav tas los. (Yaxayas 65:17) Thaum tsis muaj kev ntxub ntxaug lawm, txhua tus yuav muaj kev thaj yeeb thiab tau nyob kaj siab lug.​—Phau Ntawv Nkauj 37:11.

Koj puas xav nyob hauv ib lub qab ntuj uas zoo li no thiab? Tam sim no coob leej twb los kawm phau Vajlugkub thiab tso txoj kev ntxub tseg lawm. (Phau Ntawv Nkauj 37:8) Yehauvas Cov Tim Khawv tsheej plhom leej twb xyaum coj raws li Vajtswv tej lus lawm. Txawm lawv yuav yog haiv neeg twg, hais yam lus twg los lawv zoo li ib tse neeg uas txawj sib hlub thiab nyob sib haum.​—Yaxayas 2:2-4.

Yehauvas Cov Tim Khawv yuav zoo siab hlo qhia rau koj tias dab tsi pab tau lawv thev dhau kev tsis ncaj ncees thiab kev xaiv ntsej xaiv muag. Tej uas lawv qhia yuav pab tau koj muab txoj kev hlub los hloov txoj kev ntxub. Txawm lwm tus ua phem thiab ntxub koj los, koj yuav ua tau lub siab ntev rau lawv. Qhov no yuav ua rau koj muaj kev zoo siab thiab nrog lwm leej lwm tus sib raug zoo dua. Tsis tas li ntawd qhov uas zoo tshaj plaws yog, tej uas koj kawm yuav pab kom koj tau mus nyob hauv lub qab ntuj tshiab uas yuav tsis muaj kev ntxub ntxaug li lawm.​—Phau Ntawv Nkauj 37:29.