Phau Vajlugkub tsis yog ib phau ntawv uas qhia txog kev kho mob tiam sis kuj muaj tej lus uas pab tau cov puas siab puas ntsws.

Cov neeg tsis muaj mob yeej tsis mus cuag kws kho mob, cov uas muaj mob thiaj mus xwb.​—MATHAIS 9:12.

Phau Vajlugkub hais tias yog peb muaj mob, peb kuj mus cuag tau kws kho mob. Coob leej ntau tus uas muaj tus mob puas siab puas ntsws twb nrhiav tau kev pab thaum lawv mus ntsib kws kho mob lawm.

Yog peb xyaum khiav los sis xyaum ua li ub li no yuav muaj nqis rau peb lub cev.​—1 TIMAUTES 4:8

Yog peb siv sij hawm los ua ub ua no, yuav pab kom peb noj qab nyob zoo. Peb yuav tsum niaj hnub noj zaub noj mov kom zoo, mus dhia, thiab pw kom txaus.

Kev zoo siab ua hauv tshuaj kuab muaj tsuas rau koj lub cev. Kev ntxhov siab ua rau koj lub neej tsaus ntuj nti.​—PAJLUG 17:22.

Yog peb nyeem tej nqe Vajlugkub uas txhawb tau peb thiab muaj tej hom phiaj uas peb ncav cuag tau, ces yuav pab kom peb muaj  kev zoo siab. Yog peb muaj kev cia siab thiab xav mus rau qhov zoo, kuj yuav pab peb nyiaj taus tus mob puas siab puas ntsws.

Tus neeg txawj ntse paub txo hwj chim.​—PAJLUG 11:2.

Peb ua tsis tau txhua yam peb ib leeg xwb, peb yuav tau nrhiav kev pab ntawm lwm tus. Peb yuav tau qhia rau peb tsev neeg thiab peb cov phooj ywg tias peb xav tau kev pab li cas, lawv thiaj paub pab. Txawm lawv yuav pab li cas los cia li txaus siab thiab ua lawv tsaug.

Paj Ntsais a muaj tus mob ib sij chim ib sij zoo siab. Nws hais tias: “Kuv pom tias kuv coj txawv lawm, kuv thiaj li mus ntsib kws kho mob. Thaum kuv paub tias kuv muaj tus mob zoo li cas lawm, kuv thiaj li paub nrhiav kev pab.”

Petus muaj tus mob nyuaj siab. Nws hais tias: “Qhov uas kuv nrog kuv poj niam nyeem Vajlugkub txhua txhua hnub, pab tau kuv xav txog qhov zoo. Muaj tej hnub nyuaj rau kuv heev los, kuv kuj nyeem tau tej nqe Vajlugkub uas pab tau kuv.”

Ntsuab muaj tus mob tsis nqhis mov. Nws hais tias: “Thaum kuv muaj kuv tus mob, kuv txaj muag qhia rau lwm tus paub. Tiam sis muaj ib tug phooj ywg zoo to taub kuv thiab ua tib zoo mloog seb kuv nyuaj siab li cas. Nws pab kom kuv xav qhov zoo thiab pab kom kuv nkag siab tias tsis yog kuv ib leeg xwb thiaj muaj tus mob no.”

Timautes muaj tus mob xav nraim yuav tsum ua ib yam dab tsi tas li xwb. Nws hais tias: “Phau Vajlugkub pab kom kuv txawj luj kuv tus kheej thaum hais txog ua hauj lwm thiab so. Tej lus hauv phau Vajlugkub yeej pab tau kuv.”