MUAJ ib tug muam ntseeg npe hu ua Huab piav txog ib yam uas pab tau nws los ntseeg Yehauvas. * Nws thiaj hais tias: “Cov kwv tij nkauj muam ntseeg txoj kev siab dawb siab zoo mas raug kuv siab kawg nkaus li.” Tsis tas li ntawd, muaj dua ib tug nkauj muam ntseeg hu ua Aj. Nws hais tias: “Qhov ua rau kuv xav paub txog Yehauvas tsis yog tej uas Yehauvas Cov Tim Khawv qhia tiam sis yog tej lawv ua zoo.” Niaj hnub niam no, ob tug muam no yeej nyeem Vajlugkub thiab muab tej nqe Vajlugkub coj los ua tib zoo xav. Qhov uas pab tau nkawv tshaj yog ua siab zoo.

Luag lwm tus yuav nyob kaj siab lug yog peb ua siab dawb siab zoo rau lawv. Nyob rau hauv zaj no yuav piav txog ob lub ntsiab: txawj siv peb tus nplaig thiab xyaum ua qhov zoo. Tom qab ntawd, mam li piav seb peb ua zoo rau tus twg.

Raws li Pajlug tshooj 31, tus poj niam tsim txiaj yeej tsis hais “ib lo siab leejtwg.” (Pajlug 31:26) Nws cia txoj kev siab dawb siab zoo tswj tej yam nws ua thiab tej yam nws hais rau lwm tus. Thaum ib leeg txi yuav nrog nws tej me nyuam tham los, nws yuav tsum tswj nws tus nplaig kom tawm lus zoo. Ib txhia niam txiv yeej paub zoo tias tej lus tshawv tshawv ua rau me nyuam puas siab puas ntsws thiab tsis kam mloog nkawv lus. Yog li ntawd, thaum niam txiv ua tib zoo hais me nyuam, yuav ua rau nkawv tej me nyuam mloog nkawv lus dua.

Txawm koj yog niam thiab txiv los tsis yog, koj yeej siv tau koj tus nplaig hais tej lus zoo rau lwm tus. Nyob rau hauv Pajlug 31:26 hais tias: “Nws hais lus ntse ntsuav.” Qhov no qhia hais tias ncauj lus yuav tsum zoo thiab lub suab los yuav tsum mos. Yog li ntawd, peb yuav tsum zaum tsaws ua zoo xav hais tias, ‘Tej lus kuv hais yuav ua rau lwm tus chim siab los sis ua rau lwm tus zoo siab?’ (Pajlug 15:1) Yog li ntawd, zoo rau peb yuav tau mam xav mam hais.

Nyob rau hauv Pajlug 12:18 hais tias: “Tej lus tsis zoo chob luag siab ib yam li rab ntaj.” Yog peb xam pom hais tias tej lus peb hais yuav ua rau lwm tus ntsawv siab ces yuav pab tau peb tswj peb lub qhov ncauj. Yog peb xyaum hais lus zoo ces peb yuav tsis hais tej lus chob luag thiab tshawv tshawv rau lwm tus. (Efexus 4:31, 32) Cia peb muab tej lus mos lus muag coj los hloov tej lus iab lus daw. Yehauvas tso tau ib tug yam ntxwv zoo heev rau peb tau xyaum thaum nws nrog nws tus tub qhe Eliyas tham. Tus tub txib saum ntuj sawv cev Yehauvas hais lus “yau yau tuaj.” (1 Vajntxwv 19:12) Yog li ntawd, ua neeg siab dawb siab zoo tsis yog txawj hais lus mos lus muag xwb tiam sis yuav tsum coj zoo. Cia peb mam li mus tham txuas ntxiv.

Thaum peb hais lus zoo thiab ua zoo rau lwm tus, twb yog peb xyaum Yehauvas ntag. (Efexus 4:32; 5:1, 2) Huab piav txog Yehauvas Cov Tim Khawv txoj kev siab dawb siab zoo yam li no tias: “Thaum peb tsev tib neeg raug ntiab tawm nthawv nthav, muaj ob khub niam txiv uas yog cov ntseeg tuaj pab peb ntim peb tej khoom. Thaum lub sij hawm no, kuv twb tsis tau kawm Vajlugkub nrog lawv li.” Yog li  ntawd, lawv txoj kev siab dawb siab zoo thiaj pab tau Huab kawm Vajlugkub.

Txuas ntxiv no cia peb ho mus piav txog Aj. Yehauvas Cov Tim Khawv kuj ua siab dawb siab zoo rau nws tib yam nkaus. Nws hais tias: “Vim tib neeg pheej ua saib tsis taus kuv, kuv thiaj li tsis tso siab rau leej twg. Thaum kuv ntsib Yehauvas Cov Tim Khawv kuv xav tias, ‘Ua li cas cov neeg no pheej ua zoo zoo rau kuv?’ Tus tuaj qhia Vajlugkub rau kuv coj tau zoo zoo thiab tus tus ces kuv txawm tso siab rau nws zuj zus. Tom qab no, kuv tsuas xav txog seb yuav kawm Vajlugkub li cas lawm xwb.”

Raws li Huab thiab Aj nkawv tau hais mas yeeb vim yog Yehauvas Cov Tim Khawv tau ua zoo rau nkawv thiaj rub tau nkawv los kawm txog Yehauvas. Lawv txoj kev siab dawb siab zoo pab tau Huab thiab Aj nkawv tso siab rau Yehauvas thiab nws cov tib neeg.

Tej zaum peb yuav pom tej tug tib neeg ncauj lus zoo, hais lus luag ntxhi los twb yog nws haiv neeg yeej ib txwm yog neeg paub cai.  Coj cwj pwm zoo los sis ua neeg paub cai yeej xoos qhuas kawg li tiam sis tej zaum tsis yog nws xyaum coj raws li Vajtswv txoj kev zoo.​—Muab piv rau Tes Haujlwm 28:2.

Vajtswv lub hwj huam dawb huv thiaj pab tau kom peb xyaum Vajtswv txoj kev siab dawb siab zoo. (Kalatias 5:22, 23) Qhov no qhia tias Vajtswv lub hwj huam dawb huv pab peb, peb thiaj ua tau neeg siab dawb siab zoo. Thaum peb coj tau zoo yam li no ces twb yog peb xyaum Yehauvas thiab Yexus nkawv ntag. Tsis tas li ntawd, peb thiaj nyiam pab lwm tus ib yam li Yexus. Yog li ntawd, qhov uas peb ua siab dawb siab zoo twb yog peb nrog Yehauvas sib raug zoo thiab hlub tshua txog tej kwv tij zej zog. Txoj no thiaj yog txoj tseem kev siab dawb siab zoo tawm plaws nruab siab tuaj uas Vajtswv pom zoo.

Cov neeg peb paub thiab cov neeg ua zoo rau peb, yeej yooj yim rau peb ua zoo rov rau lawv. (2 Xamuyees 2:6) Peb yeej ris lawv txiaj ntsig kawg li. (Kaulauxais 3:15) Tiam sis yog tej tug tsis ua zoo rau peb, puas tsim nyog peb ua zoo rau nws?

Cia peb zaum tsaws xav li no: Nyob hauv Vajtswv Txoj Lus, yeej qhia mus qhia los tias Yehauvas yeej ua siab dawb siab zoo tshaj plaws. Nyob rau hauv Cov Nqe Lus Kilis yeej qhia ntau ntau zaus tias Yehauvas ua siab dawb siab zoo. Cia peb mus tham txog Yehauvas txoj kev zoo.

Yehauvas cia txhua haiv neeg muaj txoj sia ua neej nyob twb yog nws lub siab zoo. (Mathais 5:45) Txawm thaum peb tsis tau los paub Yehauvas, los nws twb ua zoo rau peb txhua leej txhua tus lawm. (Efexus 2:4, 5, 8) Xws li, nws twb tso nws tib leej Tub los txhiv noob neej lub txhoj. Tus tub txib Paulus sau hais tias “Vajtswv txojkev hlub loj kawg li,” nws thiaj tso nws tus Tub los daws neeg lub txim. (Efexus 1:7) Tsis tas li ntawd, txawm peb ua txhaum tag rov ua txhaum dua rau Yehauvas los nws ua tib zoo cob thiab qhia peb. Nws tej lus thiab tej nws cob qhia “poob ib yam li los nag tshauv.” (2 Kevcai 32:2) Muab coj los xav mas peb yeej them tsis tag tej nws ua zoo rov rau nws. Ntxiv ntawd, yog Yehauvas tsis ua siab dawb siab zoo rau peb ces peb yeej tsis muaj kev vam kev cia siab rau yav tom ntej li.​—Muab piv rau 1 Petus 1:13.

Yehauvas txoj kev siab dawb siab zoo rub tau peb los xyaum coj ib yam li nws. Cia peb tsis txhob xav hais tias yuav ua zoo rau tub no los sis tus tod, tiam sis kav tsij xyaum Yehauvas es ua zoo rau txhua leej txhua tus tas li. (1 Thexalaunikes 5:15) Yog peb ua zoo txhua lub sij hawm ces peb yuav zoo yam li lub cub tawg uas cig sov swb so rau lub caij ntuj no. Peb yuav ua rau peb tsev neeg, cov kwv tij nkauj muam ntseeg, cov neeg peb ua hauj lwm nrog, cov neeg peb kawm ntawv nrog, thiab tej neeg zej zog sov siab.

Thaum peb hais lus zoo los sis coj zoo yeej yuav txhawb tau peb tsev neeg los sis cov ntseeg nyob hauv lub koom txoos. Tej zaud yuav muaj qho tus ntseeg hauv peb lub koom txoos xav tau kev pab tu vaj tu tsev, tu tog vaj tog tsev los sis xav tau kev pab mus kav kiab kav khw. Txuas ntxiv ntawd, yog tias peb ho mus tshaj tawm txoj moo zoo es ho muaj tej tug xav tau kev pab, peb puas txaus siab hlo pab?

Cia peb xyaum Yehauvas txoj kev siab dawb siab zoo xwv tej uas peb hais thiab tej uas peb ua thiaj li ua tau dawb paug tiag tiag.