YAM 1
Tswj Nws Tus Kheej
TUS UAS TSWJ NWS TUS KHEEJ COJ LI CAS?
Tus uas tswj nws tus kheej yuav coj li no:
-
Txawj rub lub siab ntev tos tej uas nws ntshaw.
-
Tswj nws lub siab kom txhob ua phem.
-
Thaum ua haujlwm yeem tuaj tog hnyav.
-
Paub xam pom lwm tus.
UA CAS TSIM NYOG TSWJ YUS TUS KHEEJ?
Tus menyuam uas txawj tswj nws tus kheej yuav tsis qaug yoojyim thaum luag haub ntxias. Nws paub tswj nws lub siab kom txhob ntshaw tej yam uas lomzem ib vuag dua xwb. Tiamsis cov uas tsis paub tswj lawv tus kheej yuav zoo li no:
-
Muaj lub siab heev siab ceev.
-
Muaj tus mob nyuaj siab.
-
Quav yeeb tshuaj dej caw.
-
Lam tau lam noj tej yam tsis zoo rau lub cev.
Luag tau tshawb nrhiav txog tej menyuam uas txawj tswj lawv tus kheej. Lawv pom tias thaum cov menyuam ntawd tiav niam tiav txiv lawv tsis muaj mob npaum luag tej, lawv txawj txuag nyiaj dua, thiab lawv coj cai tshaj cov. Ib tug xibhwb qhia ntawv thiaj pom tias “yog koj yim tswj koj tus kheej, yim zoo xwb.”—Angela Duckworth, ib tug xibhwb hauv University of Pennsylvania.
QHIA MENYUAM TSWJ LAWV TUS KHEEJ
Koj hais li cas ces ua li ntawd.
VAJLUGKUB TEJ HAUV PAUS NTSIAB LUS: “Yog koj lees ua yam twg ces cia li ua yam ntawd. Yog koj ho hais tias tsis ua ces txhob ua xwb.”—Mathai 5:37, NW.
Tej thaum menyuam yuav ntaug tes ntaug taw quaj da luam tab meeg sawvdaws kom tau raws li lawv lub siab nyiam. Yog cov niam txiv ua ywj hlo menyuam siab ces lawv yuav ua li ntawd txhua zaus.
Tiamsis yog leej niam leej txiv hais taus ua taus, tsis ywj menyuam siab ces menyuam yuav pom tias ua neeg nyob tsis yog luag yuav ua raws li yus lub siab nyiam tas li. Ib tug ntsuam xyuas txog kev tu metub menyuam hais li no: “Coob leej xav tias yus yuav tsum tau txhua yam raws li yus lub siab ntshaw yus thiaj zoo siab, tiamsis tsis muaj tseeb li ntawd. Cov uas paub tswj lawv tus kheej zoo siab dua. Yog peb qhia menyuam kom ua raws li lawv lub siab ntshaw xwb, menyuam yuav xav yuam kev tias txhua tus yuav tsum tiam nws.”—Dr. David Walsh. *
Yog koj tsis pub koj tus menyuam ua yam twg txhob thim lus. Thaum nws tiav hluas yog luag yaum nws mus haus yeeb haus tshuaj, ua plees ua yi lossis lwm yam kev phem nws thiaj txawj tswj nws tus kheej kom txhob mus ua tej ntawd.
Qhia tias tus ua zoo yuav tau zoo, tus ua phem yuav tau phem.
VAJLUGKUB TEJ HAUV PAUS NTSIAB LUS: “Leejtwg tseb yam twg nws kuj yuav sau yam ntawd.”—Kalatia 6:7.
Koj tus menyuam yuav tsum to taub tias yog nws tsis paub tswj nws tus kheej, nws yuav ntsib kev nyuaj siab. Piv txwv li no, yog menyuam siab luv luv ces lwm cov yuav tsis xav nrog nws ua ke. Tiamsis yog nws paub tswj nws tus kheej thaum luag thab nws lossis paub rub lub siab ntev, tsis txiav luag lus ces luag yuav xav nrog nws ua ke dua. Pab koj tus menyuam pom tias yog nws xyaum tswj nws tus kheej li no, nws yuav tau lub neej zoo dua.
Qhia tias yam twg tseem ceeb dua.
VAJLUGKUB TEJ HAUV PAUS NTSIAB LUS: “Xam pom tias yam twg tsim txiaj [lossis tseem ceeb] kawg nkaus.”—Filipi 1:10.
Zoo rau menyuam paub tias yam twg tseem ceeb dua, nws thiaj ua yam ntawd ua ntej. Nws yuav tau xyaum tswj nws tus kheej thiaj ua tau li ntawd. Yog nws xyaum tiag nws yuav tswj tau nws lub siab tsis mus ua phem. Tsis tas li ntawd xwb, yuav pab kom nws ceev tau nws lub siab los ua yam tseem ceeb txawm tsis lomzem pes tsawg, zoo li kawm ntawv tas mam mus ua si.
Ua ib tug qauv zoo.
VAJLUGKUB TEJ HAUV PAUS NTSIAB LUS: “Kuv twb ua qauv tseg rau nej lawm kom nej thiaj ua ib yam nkaus li kuv ua rau nej thiab.”—Yauhas 13:15.
Koj tus menyuam yuav ntsia ntsoov koj seb koj coj li cas. Thaum muaj tej yam meem txom koj, koj puas chim sai? Thaum koj tus menyuam tawv ncauj tsis mloog lus, koj puas cem nws npau taws vog? Los koj ua lub siab txias maj mam hais nws? Koj yuav tsum tswj koj tus kheej koj tus menyuam thiaj pom tias thaum yus coj tus yees, muaj kev sib haum xeeb nrog luag dua.
^ nqe 20 Cov lus no nyob rau hauv phau ntawv hu ua No: Why Kids—of All Ages—Need to Hear It and Ways Parents Can Say It (Vim Li Cas Niam Txiv Yuav Tau Cheem Menyuam Tsis Hais Tus Hlob Tus Yau).
