Kuv yug hauv ib lub zos me hu ua Acul [a·kus], hauv tebchaws Guatemala [nkua·te·ma·la]. Kuv yog neeg Ixil [i·txee], peb ncau ntawm cov neeg Maya los. Kuv paub lus Xapee, tiamsis kuv niam peb ib txwm hais lus Ixil xwb. Kuv hlob rau lub caij uas tebchaws sib tua hnyav heev. Ntsuj rog ntawd ntev li 36 xyoo diam. Lub caij ntawd cov neeg Ixil tuag coob heev.

Thaum kuv muaj 4 xyoos, kuv tus tijlaug muaj 7 xyoo. Nws mus khaws tau ib lub hoob pob los ua si. Lub hoob pob txawm tawg ua rau kuv dig muag, tiamsis raug kuv tus tijlaug tuag lawm. Tom qab ntawd lawv muab kuv xa mus nyob ib lub tsev kawm ntawv rau cov menyuam tsis pom kev, hauv lub nroog Guatemala City. Kuv mam li kawm xuas tes nyeem cov ntawv Braille [nplia]. Thaum kuv kawm ntawv cov xibhwb txwv tsis pub kuv nrog lwm cov menyuam tham lus li, ua rau kuv tu siab heev. Ib xyoos twg kuv tsuas tau rov qab mus tsev ntev li 2 lub hlis xwb. Kuv tos ntsoov lub caij uas kuv rov mus nrog kuv niam nyob. Kuv niam yog ib tug uas txawj xav, thiab hlub kuv kawg li. Tiamsis thaum kuv muaj 10 xyoo xwb, kuv niam txawm tuag lawm. Dua rhe kuv lub siab rau qhov kuv xav tias, hauv lub ntiajteb no kuv niam ib leeg thiaj hlub kuv xwb, ua cas nws ho tuag lawm thiab.

Thaum kuv muaj 11 xyoos kuv rov qab mus hauv kuv lub qub zos, mus nrog kuv ib tug tij laug thiab nws tsev neeg nyob. Lawv yeej pub rau kuv noj kuv hnav, tiamsis lawv nplig tsis tau kuv lub siab li. Tej lub sijhawm kuv quaj thov Vajtswv tias: “Ua cas kuv niam ho tuag lawm? Ua cas kuv tseem tsis pom kev thiab?” Cov neeg zej zos hais tias twb yog Vajtswv pom zoo li ntawd. Kuv thiaj xav tias Vajtswv ua tsis ncaj thiab nws tsis hlub tibneeg. Yog tias muaj kev, ces kuv twb tua kuv tus kheej lawm.

Vim kuv dig muag ntuv, kuv tsis paub tiv thaiv kuv tus kheej. Thaum kuv me, muaj neeg muab kuv txhom ob peb zaug tiamsis twb tsis muaj leejtwg quav ntsej kuv, ces kuv tsis paub qhia rau leejtwg li. Tsawg tsawg tus thiaj lam hais lus rau kuv xwb. Kuv los tsis paub nrog luag tham lus thiab ces kuv ua twm zeej nyob nyuaj siab ntsuav. Kuv yeej tsis tso siab rau leejtwg li lawm.

Thaum kuv yuav nto hluas, kuv ib tug xibhwb qhia ntawv pom kuv txom nyem heev, nws thiaj  caw Yehauvas Cov Timkhawv tuaj xyuas kuv. Muaj ob niam txiv tuaj ntsib kuv tom tsev kawm ntawv. Nkawd qhia kuv tias muaj ib hnub Vajtswv yuav tsa cov tuag sawv rov qab los, thiab cov dig muag yuav rov pom kev. (Yaxaya 35:5; Yauhas 5:28, 29) Kuv nyiam txoj xov zoo heev, tiamsis kuv tsis paub yuav nrog nkawd tham li. Txawm kuv txaj muag heev los nkawd ua siab ntev tuaj qhia Vajlugkub rau kuv tsis tseg. Nkawd hla roob hla hav, taug kev deb tshaj li 6 mais (10 kilumev), mam tuaj txog kuv lub zos.

Kuv tus tijlaug piav tias ob niam txiv ntawd tsis nplua nuj, tiamsis nkawd yeej hnav khaub ncaws du lug tuaj qhia kuv. Nkawd tseem nqa tej ub tej no tuaj pub kuv thiab. Kuv thiaj xav tias tsuas yog cov tseem Khixatia xwb, thiaj muaj siab dawb pub rau luag li ntawd.

Muaj cov ntaub ntawv Vajlugkub luam ua Braille rau kuv xuas tes nyeem, kuv thiaj kawm tau. Kuv to taub zoo txog tej uas kuv kawm, tiamsis muaj tej yam uas nyuaj rau kuv ntseeg. Kuv pheej xav tias Vajtswv tsis hlub kuv tiag, thiab yeej tsis muaj leejtwg yuav hlub kuv li. Kuv yeej to taub tias Yehauvas tsis yog tus tsim kev txom nyem, tiamsis nyuaj heev rau kuv tso siab rau Vajtswv ib yam li tus menyuam tso siab rau nws leej txiv. *

Ntev mus ntev tuaj Vajtswv Txojlus mam li pab kuv hloov. Kuv kawm tau tias Vajtswv hlub tshua cov uas raug kev txom nyem. Zoo li thaum Vajtswv pom nws haiv neeg raug tsim txom, nws hais li no: “Kuv twb pom kuv haiv neeg uas nyob hauv Iyi tebchaws txojkev txom nyem lwj siab lawm. . . . Kuv paub lawv tej kev txom nyem.” (Khiav Dim 3:7) Thaum kuv nkag siab Yehauvas txojkev hlub lawd, kuv thiaj muab kuv lub neej cob rau nws. Xyoo 1998, kuv ua kevcai raus dej los ua Yehauvas ib tug Timkhawv.

Ib xyoos tom qab kuv ua kevcai raus dej, kuv mus kawm ntawv ze lub nroog Escuintla [e·xa·kee·la]. Ib tug txwj laus pom tias nyuaj heev rau kuv mus txog cov kev sib txoos. Yuav tsum hla roob hla hav ib yam li ob niam txiv uas tuaj qhia kuv xwb. Tus txwj laus thiaj nrhiav tau ib tse neeg hauv nroog tos txais kuv mus nrog lawv nyob thiab coj kuv mus kev sib txoos. Txog tav no los, lawv tseem saib xyuas kuv ib yam li kuv yog lawv yug.

Coob leej ntau tus hauv lub koom txoos tau pab kuv heev. Lawv puavleej ua rau kuv pom tseeb tias thaum kuv los ua Yehauvas ib tug Timkhawv, kuv yeej los poo cov tseem Khixatia lawm tiag.​—Yauhas 13:34, 35.

Nimno kuv muaj chaw vam khom lawm. Yav tas los kuv saib kuv tus kheej tsis muaj nuj nqes li. Tiamsis nimno kuv lub neej muaj hauv paus hauv ntsis lawm. Kuv ua haujlwm puv ntoob rau Yehauvas, mus qhia Vajlugkub nrog kuv cov kwvtij. Twb yog kuv niaj hnub qhia qhov tseeb rau lwm tus, kuv thiaj tsis nyuaj siab tas zog tias kuv tsis pom kev. Kuv tseem tau ua ib tug txwj laus hauv lub koom txoos thiab tau cev lus qhuab qhia hauv tej koom txoos. Yav tas los cov kwvtij kuj caw kuv mus cev lus qhia hauv cov rooj sib txoos 3 hnub uas muaj txhiab txhiab tus tuaj koom.

Xyoo 2010, kuv tau mus tebchaws El Salvador [e·xa·va·dau] mus kawm lub tsev kawm ntawv hu ua Ministerial Training School (nimno hu ua Kev Kawm Rau Cov Qhia Lub Nceeg Vaj). Lub tsev kawm ntawv no cob qhia kom kuv hajyam paub leg num rau lub koom txoos. Tom qab kuv kawm tas, ua rau kuv yimhuab pom tias Yehauvas hlub thiab saib kuv rau nqe. Txawm peb zoo li cas los xij, Yehauvas cob qhia kom peb txawj tuav nws tes haujlwm.

Yexus hais tias: “Qhov uas pub rau luag ua rau yus kaj siab dua li txais luag li los.” (Tubtxib Tes Haujlwm 20:35) Nimno kuv yeej zoo siab tiag tiag. Yav tas los kuv xav tias kuv yeej pab tsis tau leejtwg li, tiamsis nimno kuv pab tau lwm tus lawm thiab.