Lukas Sau 12:1-59
-
Cov Falixais tej keeb (1-3)
-
Ntshai Vajtswv, txhob ntshai neeg (4-7)
-
Cov uas lees paub Khetos (8-12)
-
Zaj piv txwv txog tus yawg nplua nuj ruam (13-21)
-
Tseg tsis txhob txhawj (22-34)
-
Pab nyuag yaj tsawg (32)
-
-
Nyob zov tos (35-40)
-
Tus tub txib ncaj ncees thiab tus tsis ncaj (41-48)
-
Tsis yog ua kom sib haum xeeb tiam sis sib cais (49-53)
-
Paub ntsuas lub caij nyoog (54-56)
-
Hais kom sib haum (57-59)
12 Lub sij hawm ntawd, thaum muaj txhiab txhiab leej tuaj txoos ua ke sib tsub sib nias, Yexus txawm xub hais rau nws cov thwj tim tias, “Ceev faj cov Falixais tej keeb uas yog lawv lub siab nkhaus.*
2 Tiam sis yam uas muab npog cia zoo zoo lawd yuav muab nthuav tawm los, thiab yam uas muab zais cia lawd yuav muab qhia rau sawv daws paub.
3 Yog li ntawd, tej uas nej hais twj ywm yuav muab qhia rau sawv daws hnov, thiab tej uas nej ntxhi yuav muab tshaj tawm rau sawv daws paub.
4 Cov phooj ywg’e, kuv hais rau nej tias, tsis txhob ntshai cov uas tua tau lub cev tiam sis tom qab ntawd ua tsis tau dab tsi ntxiv rau nej lawm.
5 Tiam sis kuv mam qhia tus uas tsim nyog nej ntshai. Ntshai tus uas tua tau lub cev thiab muaj hwj chim muab rhuav tshem huv si mus.* Kuv qhia rau nej tias tsim nyog ntshai tus no.
6 Tsib tug noog tsev muag tau ob lub txiaj toog xwb los tsis yog? Txawm li ntawd los, Vajtswv yeej nco ntsoov txhua tus huv si.
7 Txawm nej cov plaub hau los Vajtswv yeej paub tias muaj pes tsawg txoj. Tsis txhob poob siab, nej tseem muaj nqis dua tej noog tsev huv si.
8 “Kuv hais rau nej tias, yog leej twg lees paub kuv tab meeg sawv daws ces neeg Leej Tub yuav lees paub tus ntawd tab meeg Vajtswv cov tub txib saum ntuj.
9 Tiam sis yog leej twg tsis lees paub kuv tab meeg sawv daws ces neeg Leej Tub yuav tsis lees paub tus ntawd tab meeg Vajtswv cov tub txib saum ntuj thiab.
10 Yog leej twg hais lus tuam mom neeg Leej Tub, Vajtswv yuav zam tau. Tiam sis yog leej twg txhob txwm thuam lub hwj huam dawb huv, Vajtswv yuav zam tsis tau.
11 Thaum luag coj nej mus kom tab meeg ib zej tsoom sawv daws,* ntawm tej nom tej tswv, thiab ntawm tej thawj coj, tsis txhob txhawj tias nej yuav hais li cas los daws nej zaj los sis yuav teb li cas,
12 rau qhov lub sij hawm* ntawd lub hwj huam dawb huv mam qhia seb nej yuav hais li cas.”
13 Ces ib tug hauv pab neeg ntawd txawm hais rau Yexus tias, “Xib Hwb, thov koj hais kom kuv tus tij laug faib tej qub txeeg qub teg rau kuv thiab.”
14 Yexus thiaj teb tias, “Yawg, leej twg tsa kuv los txiav txim los sis faib qub txeeg qub teg rau neb?”
15 Ces Yexus txawm hais rau sawv daws tias, “Ceev faj tsis txhob ua siab hlob kiag li,* rau qhov txawm ib tug neeg muaj nplua mias los tej ntawd pab tsis tau kom nws tau txoj sia.”
16 Yexus thiaj ua lus piv txwv qhia lawv ntxiv tias, “Muaj ib tug yawg nplua nuj daim teb zoo qoob kawg li.
17 Nws txawm xav twj ywm hauv siab tias, ‘Kuv tsis muaj chaw ntim kuv tej qoob lawm, kuv yuav muab ntim qhov twg ne?’
18 Ces nws txawm hais tias, ‘Cia kuv ua li no, kuv yuav muab kuv tej txhab rhuav pov tseg thiab ua dua ib co kom loj tshaj no ces kuv mam sau kuv tej qoob loo thiab tej qhov txhia chaw los ntim rau hauv.
19 Thaum ntawd kuv mam hais rau kuv tus kheej tias, “Kuv twb muaj ib puas tsav yam txhij txhua los kav ntau xyoo lawm. Zaum no kuv yuav nyob noj nyob haus lawm xwb lauj.”’
20 Tiam sis Vajtswv hais rau nws tias, ‘Tus neeg ruam’e, hmo no koj txoj sia twb yuav tu. Leej twg yuav los khaws tej uas koj npaj tseg?’
21 Yeej yuav zoo li no rau tus uas khaws ntau yam muaj nqis rau nws tus kheej, tiam sis Vajtswv tsis suav tias nws nplua nuj.”
22 Yexus txawm hais rau nws cov thwj tim tias, “Twb yog li ntawd, kuv thiaj qhia nej tias, cia li tseg tsis txhob txhawj tias nej yuav muab dab tsi los noj los hnav.
23 Rau qhov txoj sia muaj nqis dua tej zaub mov thiab lub cev muaj nqis dua tej ris tsho.
24 Xav rau tej uab lag, tej noog ntawd twb tsis txawj cog tsis txawj sau qoob los cia rau hauv txhab. Tiam sis Vajtswv tseem pub rau tej noog ntawd noj. Nej yim huab muaj nqis dua tej noog ntawd los tsis yog?
25 Nej cov uas niaj hnub txhawj, puas yuav tsav tau nej txoj sia nyob ib hnub* ntxiv?
26 Yog qhov nyuag me me no nej twb ua tsis tau, ua cas nej tseem yuav mus txhawj txog lwm yam?
27 Xav rau tej paj hmab paj ntoos seb tawg li cas. Tej paj ntawd tsis txawj khwv tsis txawj ntos ntaub, tiam sis kuv qhia rau nej tias Vaj Ntxwv Xalaumoos tej tsoos zoo nkauj kawg li, los twb tsis muaj ib ce zoo nkauj cuag li ib lub nyuag paj ntawd.
28 Xav seb tej me nroj tsuag uas nyob hnub no, tag kis twb yuav muab txiav pov rau hauv cub tawg, los Vajtswv tseem tsim zoo nkauj ua luaj. Yog li, Vajtswv haj yam yuav pub kom nej muaj hnav thiab. Ua cas nej tseem tsis tso siab?
29 Yog li ntawd, cia li tseg tsis txhob txhawj tias yuav nrhiav dab tsi los noj los haus, thiab tsis txhob txhawj dhau,
30 rau qhov cov neeg tsis paub Vajtswv hauv lub qab ntuj no niaj hnub txhawj thiab khwv kom tau noj tau haus. Tiam sis nej Leej Txiv yeej paub tias nej cheem tsum tej no lawm.
31 Yog li ntawd, kav tsij txhawb Vajtswv txoj kev kav* ces Vajtswv mam li muab tej no tsav ntxiv rau nej.
32 “Pab nyuag yaj tsawg, tsis txhob ntshai rau qhov nej Leej Txiv twb txaus siab muab lub Nceeg Vaj* pub rau nej lawm.
33 Muab tej qhov txhia chaw muag pub rau cov txom nyem. Npaj tej hnab nyiaj tsis txawj ntuag uas yog tej yam muaj nqis saum ntuj siv tsis paub tas. Qhov ntawd tsis muaj tub sab nyiag thiab tsis muaj kab noj.
34 Yam uas koj saib rau nqi nyob qhov twg ces koj lub siab yuav nyob qhov ntawd.
35 “Nej cia li tu cev khov kho tos thiab taws teeb lam lug cia.
36 Nej yuav tsum zoo li cov tub qhe uas tos ntsoov tus tswv tsev mus ua tshoob rov los. Thaum nws los khob qhov rooj, lawv txawm qhib plho rau nws.
37 Thaum tus tswv tsev rov los pom cov tub qhe zov tos nws mas cov tub qhe yuav zoo siab! Kuv hais ncaj qha rau nej tias tus tswv tsev yuav hu lawv los zaum ntawm rooj mov ces nws yuav tu cev khov kho thiab zaub thiab mov* rau lawv noj.
38 Thiab txawm tus tswv tsev rov los txog lig,* tsis hais thaum ib tag hmo* los, yog nws pom cov tub qhe tseem nyob zov tos nws ces lawv yuav zoo siab!
39 Nco ntsoov tias, yog ib tug tswv tsev twg xub paub lawm tias thaum twg* tub sab yuav tuaj ces nws yeej yuav zov tos tsis pub tub sab nkag los tsev li.
40 Nej los yuav tsum zov tos ib yam li ntawd, rau qhov neeg Leej Tub yuav los rau lub sij hawm* uas nej tsis nco xav txog.”
41 Ces Petus txawm nug tias, “Tus Tswv, koj qhia zaj piv txwv no rau sawv daws los qhia rau peb xwb?”
42 Yexus teb tias, “Tus tub txib* ncaj thiab ntse* uas tus tswv tsev tsa los saib xyuas nws tej tub teg tub taws thiab faib zaub faib mov rau lawv raws caij raws nyoog tas li yog leej twg tiag?
43 Thaum tus tswv tsev rov los pom tus qhev ua hauj lwm li no mas tus qhev yuav zoo siab!
44 Kuv qhia ncaj qha rau nej tias, tus tswv tsev yuav tsa nws saib xyuas tag nrho nws tej cuab txhiaj cuab tam huv si.
45 Tiam sis yog tus qhev ntawd xav hauv nruab siab tias, ‘Tshuav ntev kuv tus tswv mam rov los,’ ces nws txawm muab lwm cov tub qhe thiab ntxhais qhev ntaus ua lwj ua liam thiab noj tsau haus qaug.
46 Nws tus tswv yuav los rau hnub uas nws tsis nco xav txog thiab teev uas nws tsis paub. Thaum ntawd, tus tswv yuav rau txim hnyav heev rau nws thiab yuav muab nws tso nrog cov uas tsis mloog lus.
47 Tus qhev ntawd yuav mag nplawm ntau nplawg vim nws twb paub tus tswv lub siab los nws tsis npaj tos thiab tsis ua raws li ntawd.
48 Tiam sis tus uas tsis paub es ho ua tau tej yam txaus nplawm los nws yuav mag nplawm tsawg. Tus uas tau txais ntau yuav tsum pub ntau. Thiab tus uas tuav hauj lwm ntau dua yeej ris lub nra hnyav dua.
49 “Kuv los zes taws rau lub ntiaj teb. Nim no twb cig raws nkaus li kuv lub siab xav lawm lauj.
50 Kuv tseem yuav tiv ib txoj kev nyuaj siab ntxiv.* Kuv yuav ntxhov siab mus txog thaum qhov ntawd tiav!
51 Nej xav tias kuv los ua kom lub ntiaj teb nyob sib haum xeeb no lod? Tsis yog. Kuv qhia rau nej tias, kuv los ua kom ntiaj teb sib cais.
52 Rau qhov txij no mus ib tse neeg uas muaj tsib leeg yuav sawv sib tawm tsam, peb leeg yuav tawm tsam ob leeg thiab ob leeg yuav tawm tsam peb leeg.
53 Txiv yuav tawm tsam tub, thiab tub yuav tawm tsam txiv. Niam yuav tawm tsam ntxhais thiab ntxhais yuav tawm tsam niam. Pog yuav tawm tsam nyab thiab nyab yuav tawm tsam pog.”
54 Yexus kuj hais rau cov neeg coob coob ntawd tias, “Thaum nej pom huab tsaus nti sab hnub poob, nej txawm hais tias, ‘Yuav los nag xob nag cua,’ ces txawm muaj li ntawd.
55 Thaum cua ntsawj sab qab teb tuaj, nej twb txawj hais tias, ‘Yuav kub heev,’ ces txawm muaj li ntawd.
56 Cov niag neeg siab nkhaus,* nej twb paub ntsuas seb lub ntiaj teb thiab tej huab cua hloov li cas, tiam sis ua cas nej ho tsis paub ntsuas tej uas muaj tshwm sim rau lub caij no?
57 Ua cas nej ho tsis paub tias yuav ua li cas thiaj ncaj?
58 Piv txwv li thaum ib tug coj koj mus kom rau ntawm tus tu plaub, thaum neb tab tom mus, cia li nrog nws hais kom sib haum ua ntej nws muab koj cob rau tus txiav txim, tsam tus txiav txim muab koj cob rau tus ceev xwm ces tus ceev xwm muab koj kaw hauv tsev loj cuj.
59 Kuv hais rau koj tias, koj yuav tsis tau tawm hauv tsev loj cuj mus txog thaum koj khee hlo koj lub nyuag nyiaj qab nas* los them.”
Cov taw ntawv
^ Los sis “cov neeg ncauj lus zoo siab phem.”
^ Lus Kilis yog “muab pov rau hauv Kehenas.” Mus saib lo lus “Kehenas” hauv Cov Lus Txhais.
^ Los sis “coj nej mus kom hauv tej tsev sab laj.”
^ Lus Kilis yog “teev.”
^ Los sis “khib.”
^ Lus Kilis yog “ib tshim.” Ib tshim ntev li 17.5 nti.
^ Lus Kilis yog “lub Nceeg Vaj.” Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Los sis “nqa zaub nqa mov.”
^ Lus Kilis yog “lub sij hawm ob.” Lub sij hawm ntawd yog thaum cuaj teev mus txog ib tag hmo.
^ Lus Kilis yog “lub sij hawm peb.” Lub sij hawm ntawd yog thaum ib tag hmo txog peb teev.
^ Lus Kilis yog “teev twg.”
^ Lus Kilis yog “teev.”
^ Yog ib tug tub qhe uas luag tsa saib xyuas tag nrho tej cuab txhiaj cuab tam thiab lwm cov tub qhe.
^ Los sis “muaj tswv yim.”
^ Lus Kilis yog “Kuv tseem yuav ua kev cai raus dej.”
^ Los sis “Cov niag neeg ncauj lus zoo siab phem.”
^ Uas yog khee hlo koj cov nyiaj los them. Lus Kilis yog “nyiaj litas.” Yuav tsum khwv li tsib feeb thiaj tau ib lub nyiaj litas.
