Lukas Sau 21:1-38
21 Yexus tsa muag ntsia, nws pom cov neeg nplua nuj los tso nyiaj rau hauv tej thawv.
2 Nws kuj pom ib tug poj ntsuam txom nyem heev los tso ob lub nyuag txiaj toog* thiab.
3 Yexus thiaj hais tias, “Kuv hais ncaj qha rau nej tias tus poj ntsuam uas txom nyem ntawd tseem tso ntau tshaj sawv daws tib si.
4 Rau qhov lwm cov tsuas tso tej nyiaj seem xwb, tiam sis tus poj ntsuam ntawd pluag heev los, nws khee hlo nws lub neej tuaj tso.”
5 Tom qab ntawd, muaj ib txhia tham txog lub tuam tsev tias ua cas luag yuav muab tej pob zeb zoo zoo thiab tej khoom muaj nqis uas pub rau Vajtswv los ua rau lub tuam tsev zoo nkauj ua luaj.
6 Yexus thiaj hais tias, “Tej uas nej pom no, muaj ib hnub tej pob zeb ntawd yuav pluam tas tib si nyias nyob nyias.”
7 Ces lawv txawm nug Yexus tias, “Xib Hwb, thaum twg mam li muaj tej no maj, thiab yuav muaj pov thawj dab tsi qhia tias tej no twb yuav tshwm los?”
8 Yexus thiaj hais tias, “Ceev faj tsis txhob cia leej twg ntxias tau nej yuam kev, rau qhov yuav muaj coob leej tuav kuv lub npe dag tias, ‘Kuv yog tus Khetos,’ thiab, ‘Lub sij hawm twb los ze lawm.’ Tsis txhob caum lawv mus.
9 Tsis tas li ntawd, thaum nej hnov txog kev tsov kev rog thiab kev kub ntxhov, tsis txhob ntshai. Vim yeej yuav muaj tej no ua ntej, tiam sis lub sim ceeb* tsis tau kawg tam sid.”
10 Ces Yexus hais rau lawv tias, “Ib haiv neeg yuav sawv tawm tsam ib haiv neeg thiab ib lub teb chaws yuav sawv tawm tsam ib lub teb chaws.
11 Yuav muaj av qeeg loj heev, thiab yuav muaj kev tshaib kev nqhis thiab kab mob kis ib qho rau ib qho. Yuav muaj tej yam txaus ntshai heev thiab yuav pom muaj txuj ci tshwm saum nruab ntug.
12 “Ua ntej tej no tshwm sim tib neeg yuav muab nej tsim txom. Luag yuav muab nej ntes mus txiav txim hauv tej tsev pe hawm thiab muab nej kaw hauv tsev loj cuj. Luag yuav coj nej mus kom ntawm tej vaj ntxwv thiab tej tswv xeev vim nej yog kuv cov thwj tim.
13 Thaum kawg nej yuav ua tau tim khawv rau luag.
14 Yog li ntawd, nej yuav tsum txiav txim siab tuag nthi li no, tsis txhob npaj tias nej yuav daws nej zaj li cas.
15 Kuv mam li pub tswv yim rau nej kom txawj teb nej cov yeeb ncuab. Tag nrho cov uas tawm tsam nej yuav cav tsis taus ib los li.
16 Tsis tas li ntawd, txawm nej niam nej txiv, nej kwv nej tij, nej tej txheeb ze, thiab tej phooj ywg kwv luag los yuav muab nej cob* rau luag, thiab luag yuav muab nej ib txhia tua pov tseg.
17 Thiab txhua leej txhua tus yuav ntxub nej vim nej yog kuv cov thwj tim.
18 Txawm li ntawd los, yuav tsis pub nej ib nyuag txoj plaub hau poob li.
19 Yog nej ua siab ntev thev ces nej yuav cawm tau nej txoj sia.
20 “Tiam sis thaum nej pom yeeb ncuab tuaj ua yeej vij nkaus Yeluxalees ces qhia tias twb yuav txog hnub uas Yeluxalees raug puas tsuaj.
21 Thaum ntawd cov nyob hauv Yudias yuav tsum khiav tawm mus rau pem tej roob. Cov nyob hauv lub nroog Yeluxalees cia li khiav, thiab cov uas nyob tom teb tsis txhob los hauv nroog,
22 rau qhov twb txog lub caij Vajtswv rau txim rau cov neeg uas nyob hauv lawm, kom thiaj muaj tiav raws li txhua lo hauv Vajtswv Txoj Lus.
23 Thaum ntawd cov poj niam uas suab me nyuam thiab cov uas muaj me nyuam mos noj mis yuav txom nyem lauj! Vim lub teb chaws yuav txom nyem heev thiab Vajtswv yuav rau txim rau cov tib neeg no.
24 Yuav muaj cov uas tuag rau hniav ntaj hniav riam, thiab cov uas raug kuav mus ua qhev rau lwm teb chaws. Yeluxalees yuav raug tej haiv neeg* tsuj mus txog lub caij uas teem tseg rau tej haiv neeg* tas lawm.
25 “Tsis tas li ntawd xwb, yuav muaj txuj ci tshwm rau lub hnub lub hli thiab tej hnub qub. Tej haiv neeg hauv ntiaj teb no yuav ntxhov siab hnyo tsis pom qab ua txoj twg vim lub suab dej hiav txwv nphau tej niag nthwv.
26 Thaum tib neeg pom tej yam uas muaj hwj chim saum nruab ntug ua zog koog, lawv tsis paub tias yuav muaj dab tsi los raug lub ntiaj teb, ua rau lawv tsaus muag yoob tas vim ntshai heev.
27 Lawv yuav pom neeg Leej Tub muaj hwj chim loj ci ntsa iab nrog huab nrog cua saum ntuj los.
28 Tiam sis thaum pib muaj tej no, cia li tsa taub hau sawv khov kho, rau qhov twb yuav txog lub sij hawm uas Vajtswv cawm nej dim.”
29 Ces Yexus txawm qhia ib zaj lus piv txwv rau lawv tias, “Cia li saib tsob txiv cev thiab txhua yam ntoo.
30 Thaum nej pom tej ceg pib hlav nplooj nej yeej paub tias twb yuav txog lub caij ntuj so.
31 Ib yam li ntawd, thaum nej pom tej no ces nej yeej paub tias Vajtswv txoj kev kav* twb los ze lawm.
32 Kuv hais ncaj qha rau nej tias yuav tsum muaj tiav raws li tej no huv si ua ntej tiam neeg no dua mus.
33 Txawm lub ntuj lub teb yuav ploj mus los, kuv tej lus yeej yuav tsis ploj ib los li.
34 “Tiam sis cia li ceev faj tsam nej lub siab qaug rau kev noj kev haus, kev quav dej quav cawv, thiab kev nyuaj siab ntxhov plawv. Nyob tsam hnub ntawd ho los rau thaum nej tsis nco ceev faj
35 ces yuav ua rooj ntxiab mag nej. Rau qhov hnub ntawd yuav los rau thaum ib tsoom neeg thoob ntiaj teb tsis nco txog.
36 Yog li ntawd, cia li ceev faj zov tos. Taij thov Vajtswv tsis tseg nej thiaj li yuav dim tej uas yuav tsum muaj tshwm sim no xwv nej thiaj sawv taus ntawm neeg Leej Tub xub ntiag.”
37 Ces thaum nruab hnub Yexus mus qhia ntawm lub tuam tsev tiam sis thaum hmo ntuj nws mus so saum lub Roob Txiv Aulib.*
38 Thiab txhua tag kis muaj tib neeg coob coob sawv ntxov tsees tuaj mloog Yexus qhia hauv lub tuam tsev.
Cov taw ntawv
^ Lus Kilis yog “ob lub nyiaj litas.” Lub nyiaj litas yog cov neeg Yudais lub txiaj toog uas me tshaj. Yus ua hauj lwm li kaum feeb xwb, twb tau ob litas ua nqi zog lawm.
^ Los sis “caij nyoog.” Mus saib Cov Lus Txhais.
^ Los sis “ntxeev siab.”
^ Yog lwm haiv neeg uas tsis yog haiv neeg Yudais.
^ Yog lwm haiv neeg uas tsis yog haiv neeg Yudais.
^ Lus Kilis yog “lub Nceeg Vaj.” Mus saib Cov Lus Txhais.
^ Uas yog mus so hauv tej zos saum roob.
