Lukas Sau 22:1-71
-
Cov pov thawj hlob tuav tswv yim tua Yexus (1-6)
-
Npaj ua Kev Cai Hla Dhau zaum kawg (7-13)
-
Ua tus Tswv Pluas Hmo (14-20)
-
‘Tus ntxeev siab nrog kuv zaum ua ke’ (21-23)
-
Sib cav seb tus twg yog tus loj dua ntais (24-27)
-
Yexus cog lus txog ib lub nceeg vaj (28-30)
-
Yexus qhia tias Petus yuav tsis lees nws (31-34)
-
Npaj kom txhij, thiab ob rab ntaj (35-38)
-
Yexus thov Vajtswv saum Roob Txiv Aulib (39-46)
-
Lawv ntes Yexus (47-53)
-
Petus tsis lees Yexus (54-62)
-
Thuam Yexus (63-65)
-
Hais plaub hauv Xahenrees (66-71)
22 Hnub ua Kev Cai Noj Ncuav Tsis Xyaw Keeb* uas hu ua Kev Cai Hla Dhau twb los yuav txog.
2 Cov pov thawj hlob thiab cov xib hwb* txawm nrhiav kev los ntes Yexus twj ywm* coj mus tua pov tseg, vim lawv ntshai cov tib neeg.
3 Xatas txawm tshoov Yudas Ikhali-aus uas yog ib tug ntawm Yexus 12 tug tub txib.
4 Yudas thiaj tawm mus nrog cov pov thawj hlob thiab cov thawj zov lub tuam tsev tham seb yuav muab Yexus cob rau lawv li cas.
5 Lawv zoo siab heev thiab txaus siab muab nyiaj rau nws.
6 Yudas pom zoo li ntawd ces nws txawm nrhiav kev nrhw seb lub sij hawm twg zoo muab Yexus cob rau lawv, kom tsis muaj neeg pom.
7 Thaum txog hnub ua Kev Cai Noj Ncuav Tsis Xyaw Keeb uas yog hnub tua tsiaj ua Kev Cai Hla Dhau,
8 Yexus thiaj txib Petus thiab Yauhas nkawd tias, “Cia li mus npaj pluas hmo ua Kev Cai Hla Dhau rau peb noj.”
9 Nkawd thiaj nug Yexus tias, “Koj xav kom wb mus npaj rau qhov twg?”
10 Yexus teb nkawd tias, “Thaum neb mus txog hauv lub nroog, yuav muaj ib tug yawg kwv ib hub dej tuaj ntsib neb. Cia li raws nws qab mus hauv tsev
11 thiab hais rau tus tswv tsev tias, ‘Xib Hwb hais tias, “Chav tos txais qhua nyob qhov twg? Kuv yuav nrog kuv cov thwj tim noj pluas hmo ua Kev Cai Hla Dhau.”’
12 Ces tus yawg ntawd yuav coj neb mus rau ib chav uas dav heev nyob txheej saud muaj rooj tog txhij txhua. Neb cia li npaj rau qhov ntawd.”
13 Nkawd txawm mus thiab pom muaj raws li Yexus tau hais ces nkawd thiaj npaj ua Kev Cai Hla Dhau.
14 Thaum txog sij hawm, Yexus txawm nrog nws cov tub txib los zaum ntawm rooj mov.
15 Ces Yexus hais rau lawv tias, “Kuv xav xav nrog nej noj pluas hmo ua Kev Cai Hla Dhau no ua ntej kuv raug tsim txom.
16 Rau qhov kuv qhia rau nej tias kuv yuav tsis nrog nej noj li no mus txog thaum Vajtswv lub Nceeg Vaj* los kav es txhua yam no muaj tiav lawd.”
17 Thaum Yexus txais lub khob, nws ua Vajtswv tsaug thiab hais tias, “Cia li txais lub khob no mus rau nej sawv daws haus
18 rau qhov kuv qhia rau nej tias txij no mus kuv yuav tsis nrog nej haus cov cawv txiv hmab no mus txog thaum Vajtswv lub Nceeg Vaj* los kav.”
19 Thiab Yexus muab ib lub ncuav los. Nws ua Vajtswv tsaug tas thiab muab ntais cev rau lawv hais tias, “Lub ncuav no piv txog kuv lub cev uas muab txhiv nej. Cia li ua li no kom nej nco ntsoov kuv.”
20 Thaum lawv noj pluas hmo tas, nws kuj muab lub khob los ua ib yam li ntawd hais tias, “Lub khob no piv txog lo lus cog tseg tshiab uas muaj kuv cov ntshav ua lub hom thawj nias rau uas yuav muab nchuav los cawm nej.
21 “Tiam sis tus uas ntxeev siab rau kuv twb nrog kuv zaum ua ke ntawm rooj mov.
22 Yeej yuav muaj tiav raws li txhua yam uas tau sau tseg txog neeg Leej Tub. Tiam sis tus uas ntxeev siab rau neeg Leej Tub yuav txom nyem lauj!”
23 Ces lawv txawm sib nug zom zaws tias lawv tus twg yog tus yuav ua li ntawd.
24 Tsis tas li ntawd, lawv kuj sib cav npau taws vog tias lawv tus twg yog tus loj dua ntais.
25 Yexus thiaj hais rau lawv tias, “Lwm haiv neeg tej vaj ntxwv tsuas kav ywj siab xwb, thiab cov uas muaj hwj chim kav muab lawv tus kheej hu ua cov uas tsob hwb luag.*
26 Tiam sis nej tsis txhob ua li ntawd. Nej tus twg yog tus loj dua ntais tus ntawd yuav tsum ua tus yau dua ntais, thiab tus twg ua tus ntaus thawj tus ntawd yuav tsum ua tus tub qhe.
27 Tus twg yog tus loj dua, tus zaum ntawm rooj mov los yog tus thiab zaub thiab mov?* Yog tus zaum ntawm rooj mov los sad? Tiam sis kuv zoo ib yam li tus thiab zaub thiab mov* rau nej.
28 “Nej yog cov uas nrog nraim kuv thaum kuv raug kev txom nyem.
29 Yog li, kuv cog lus rau nej tias nej yuav tau kav hauv ib lub nceeg vaj,* ib yam li kuv Leej Txiv tau cog lus rau kuv lawd.
30 Hauv kuv lub Nceeg Vaj,* nej yuav tau nrog kuv noj kuv haus saum kuv lub rooj. Thiab nej yuav tau zaum saum tej rooj vaj ntxwv txiav txim rau 12 xeem Ixayees.
31 “Ximoos’o Ximoos! Xatas xav muab nej txhua tus tshau ib yam li tshau tej hmoov mog.*
32 Kuv twb taij thov Vajtswv pab kom koj tsis txhob tso kev ntseeg tseg. Thaum koj txoj kev ntseeg loj lawd tig los txhawb koj cov kwv tij.”
33 Petus teb tias, “Tus Tswv, txawm koj yuav raug kaw thiab raug tua los kuv yeem nrog koj tuag ua ke.”
34 Tiam sis Yexus teb tias, “Petus, kuv hais rau koj tias hnub no thaum qaib tsis tau qua, koj yuav tsis lees paub kuv peb zaug.”
35 Yexus kuj hais rau lawv tias, “Thaum kuv txib nej mus tshaj tawm, nej tsis nqa hnab nyiaj, hnab thoob puab, thiab tsis nqa khau, los nej tsis tu ncua ib yam dab tsi li puas yog?” Lawv teb tias, “Yog!”
36 Ces Yexus txawm hais rau lawv tias, “Tiam sis nim no tus uas muaj hnab nyiaj thiab hnab thoob puab, cia li nqa nrog nws mus. Tus uas tsis muaj ntaj, cia li muab nws lub tsho* muag mus yuav ib rab.
37 Vajtswv Txoj Lus hais tias, ‘Luag yuav suav tias nws yog ib tug neeg muaj txim thiab.’ Kuv qhia nej tias cov lus no yog hais txog kuv ntag. Tej uas sau tseg txog kuv tab tom yuav muaj tiav.”
38 Ces lawv hais tias, “Tus Tswv, saib! Peb muaj ob rab ntaj.” Yexus teb tias, “Ob rab ces tau lawm.”
39 Yexus txawm sawv kev mus rau saum lub Roob Txiv Aulib ib yam li nws ib txwm mus, cov thwj tim kuj nrog nws mus thiab.
40 Thaum lawv mus txog saud, Yexus hais rau lawv tias, “Yeej meem thov Vajtswv, kev txhaum thiaj ntxias tsis tau nej.”
41 Yexus txawm mus ob peb ruam* tom ntej, thiab txhos caug ntua thov Vajtswv
42 hais tias, “Kuv Txiv’e, yog koj pom zoo no, thov tshem lub khob no ntawm kuv mus. Txawm li cas los, thov kom muaj raws li koj pom zoo, tsis yog li kuv pom zoo.”
43 Ces txawm muaj ib tug tub txib saum ntuj tshwm los txhawb nws lub zog.
44 Tiam sis Yexus nyuaj siab kawg nkaus li, nws thiaj yim huab mob siab thov Vajtswv ntxiv, ua rau nws tej hws zoo li ntshav nrog rau hauv pem teb.
45 Thaum Yexus thov Vajtswv tas, nws rov mus tom cov thwj tim. Ua ciav lawv tsaug zog tas vim lawv nyuaj siab kawg li.
46 Yexus thiaj hais rau lawv tias, “Ua cas nej tsaug zog ua luaj? Cia li sawv tsees, yeej meem thov Vajtswv, kev txhaum thiaj ntxias tsis tau nej.”
47 Ua ciav thaum Yexus tab tom hais lus txawm muaj ib pab neeg coob coob tuaj txog ntawd. Yudas uas yog ib tug ntawm 12 tug tub txib yog tus coj lawv tuaj. Yudas txawm txav zog los nwj kiag Yexus.
48 Yexus thiaj nug tias, “Yudas, koj nwj kuv li no yog koj ntxeev siab rau neeg Leej Tub lod?”
49 Thaum cov uas nyob ntawd pom tias yuav muaj xwm, lawv txawm hais tias, “Tus Tswv peb rho ntaj los tua lawv po?”
50 Ib tug txawm siv rho hlo ntaj los tib ntag tus tuam pov thawj hlob tus tub qhe sab nplooj ntseg xis tu nrho.
51 Yexus thiaj txwv tias, “Tsum kiag.” Yexus cev loo tes mus kov kiag tus tub qhe sab pob ntseg ces txawm zoo hlo.
52 Ces Yexus hais rau cov pov thawj hlob, thiab cov thawj zov lub tuam tsev, thiab cov txwj laus uas tuaj ntes nws tias, “Nej nqa ntaj nqa qws tuaj ntes tub sab lod?
53 Kuv niaj hnub nrog nej hauv lub tuam tsev, ua cas nej ho tsis ntes kuv? Tiam sis txog nej lub sij hawm thiab txog caij rau txoj kev tsaus ntuj kav lawm.”
54 Ces lawv thiaj ntes kiag Yexus cab nws mus rau tom tus tuam pov thawj hlob lub tsev. Tiam sis Petus maj mam raws qab deb tsawv.
55 Thaum ntawd, cov tib neeg rauv ib cub tawg hauv tus tuam pov thawj hlob lub loog thiab lawv zaum nte taws. Petus kuj los nrog lawv zaum thiab.
56 Muaj ib tug ntxhais qhev pom Petus zaum nte taws, nws thiaj ntsia ntsoov Petus thiab hais tias, “Tus yawg no twb nrog Yexus thiab sad?”
57 Tiam sis Petus tsis lees li. Nws hais tias, “Tus ntxhais, kuv tsis paub nws.”
58 Ib pliag tom qab ntawd, muaj dua ib tug ho pom Petus thiab hais tias, “Koj yog lawv ib tug thiab.” Tiam sis Petus teb ntua tias, “Yawg, kuv tsis yog.”
59 Ib teev tom qab ntawd, muaj dua ib tug yawg hais tawv tawv tias, “Tus no yeej yog lawv ib tug kawg! Nws twb yog neeg Kalilais!”
60 Tiam sis Petus teb tias, “Yawg, xyov koj hais koj dab tsi.” Thaum Petus tab tom teb nws, qaib txawm qua kiag.
61 Tam sim ntawd Yexus* txawm tig hlo los ntsia Petus, ua rau Petus nco dheev txog Yexus* cov lus tias, “Hnub no thaum qaib tsis tau qua, koj yuav tsis lees kuv peb zaug.”
62 Petus thiaj tawm mus quaj tu siab nrho sab nraud.
63 Cov neeg zov Yexus txawm thuam thiab ntaus nws.
64 Lawv npog nws ntsej muag thiab hais tas hais thiab tias, “Koj txawj cev Vajtswv lus diam, sim twv soj leej twg ntaus koj?”
65 Lawv hais ntau yam ntxiv los tawm tsam Yexus ua saib tsis taus Vajtswv kiag li.
66 Thaum kaj ntug cov txwj laus uas yog cov pov thawj hlob thiab cov xib hwb, txawm sab laj ua ke thiab coj Yexus mus rau hauv lub tsev Xahenrees. Lawv hais rau nws tias,
67 “Qhia peb seb, koj puas yog tus Khetos tiag?” Tiam sis Yexus teb tias, “Txawm kuv qhia nej los nej yeej yuav tsis ntseeg li.
68 Thiab yog kuv nug nej los nej yeej yuav tsis kam teb kuv.
69 Tiam sis txij no mus neeg Leej Tub yuav tau zaum ntawm Vajtswv sab tes xis uas muaj hwj chim.”
70 Tam sim ntawd, lawv txawm tib tsaug nug tias, “Yog li ntawd, koj yog Vajtswv tus tub lod?” Ces Yexus teb tias, “Yog li nej hais.”*
71 Lawv thiaj hais tias, “Peb tseem yuav tos pes tsawg tus tim khawv ntxiv? Peb sawv daws twb hnov tej lus uas nws hais kiag ntawd lawm.”
Cov taw ntawv
^ Mus saib Cov Lus Txhais.
^ Los sis “xib hwb qhia Vajtswv kev cai.” Mus saib Cov Lus Txhais.
^ Lawv tuav tswv yim dag kom tib neeg xav tias qhov uas lawv ntes Yexus raug cai lawm.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Los sis “cov uas saib cov pej xeem.”
^ Los sis “tus nqa zaub nqa mov.”
^ Los sis “tus nqa zaub nqa mov.”
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Mog los sis qeb yog ib hom qoob uas cov neeg nyob teb chaws Ixayees muab ua ncuav noj.
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Los sis “nws mus deb li txawb ib ncua zeb.”
^ Lus Kilis yog “tus Tswv.”
^ Lus Kilis yog “tus Tswv.”
^ Lus Kilis yog “Nej yog cov hais li ntawd.”
