Muaj coob tus tsis ruaj siab tias xyov leejtwg yog tus sau phau Vajlugkub. Tiamsis phau Vajlugkub yeej hais meej tias leejtwg yog tus sau. Xws li, muaj tej nqe Vajlugkub pib hlo hais tias “Nehemis tej lus,” “zaj yogtoog uas Vajtswv qhia . . . Yaxayas,” thiab “Yehauvas cov lus uas hais rau . . . Yau-ees.”​—Nehemis 1:1; Yaxayas 1:1; Yau-ees 1:1, New World Translation.

 Cov uas sau phau Vajlugkub feem coob hais ncaj tias tus tseem Vajtswv Yehauvas yog tus txib lawv sau, thiab cob qhia lawv. Hauv cov nqe Vajlugkub Henplais, cov cev Vajtswv lus hais tshaj li 300 tawm zaus tias, ‘Yehauvas hais li no.’ (Amaus 1:3; New World Translation, Mikhas 2:3, Nahus 1:12) Hos dua lwm cov, Vajtswv txib cov tubtxib saum ntuj los cev lus rau lawv.​—Xakhaliyas 1:7, 9.

 Phau Vajlugkub muaj kwvlam li 40 leej sau, lawv siv li 1,600 xyoo. Muaj ib txhia sau ob peb phau diam. Phau Vajlugkub muaj 66 phau nyob rau hauv. Phau Vajlugkub raug faib ua 2 ntus. Ntu 1 yog sau ua lus Henplais, uas muaj 39 phau. Tibneeg feem coob hu Ntu 1 tias Vajtswv Txojlus Phau Qub. Ntu 2 sau ua lus Kili uas muaj 27 phau. Tibneeg feem coob hu Ntu 2 tias Vajtswv Txojlus Phau Tshiab.