Vajtswv lub Nceeg Vaj yog ib lub tseem fwv uas Vajtswv Yehauvas ua tus tsa. Phau Vajlugkub kuj muab “Vajtswv lub Nceeg Vaj” hu tias “lub Nceeg Vaj saum ntuj ceeb tsheej” vim Vajtswv lub Nceeg Vaj yuav kav saum ntuj tuaj rau hauv ntiajteb no. (Malakaus 1:14, 15; Mathais 4:17, New World Translation) Vajtswv lub Nceeg Vaj kuj thooj li neeg tej tseem fwv tiamsis zoo tshaj neeg tej tseem fwv lawm ntau npaug. Xws li:

•   Cov Ua Nom Kav. Vajtswv tau xaiv Yexus Khetos los ua Nom kav Vajtswv lub Nceeg Vaj thiab pub Yexus muaj hwjchim tshaj tag nrho tibneeg tej nom tswv, tsis tau muaj ib tug yuav muaj hwjchim npaum li no. (Mathais 28:18) Yexus siv nws lub hwjchim ua qhov zoo xwb, nws twb ua rau tibneeg pom lawm tias nws yog ib tug zoo thawj coj uas tso siab tau thiab muaj lub siab khuvleej. (Mathais 4:23; Malakaus 1:40, 41; 6:31-34; Lukas 7:11-17) Yexus tau ua raws li Vajtswv hais es xaiv qee leej ntawm txhua haiv neeg nrog nws “kav lub ntiajteb” saum ntuj ceeb tsheej tuaj.​—Tshwmsim 5:9, 10.

•   Kav Ntev Li Cas. Vajtswv lub Nceeg Vaj tsis thooj li neeg tej tseem fwv uas ib sij hloov dua ib zaug, Vajtswv lub Nceeg Vaj “yuav nyob mus tsis paub kawg li.”​—Daniyees 2:44.

•   Laj Mej Pejxeem. Txhua tus tsis hais haiv neeg twg thiab nyob tebchaws twg los yog nws ua raws li Vajtswv Txojlus, tus ntawd yeej ua tau lub Nceeg Vaj ib tug pejxeem.​—Tes Haujlwm 10:34, 35.

•   Kevcai Lij Choj. Vajtswv lub Nceeg Vaj tej kevcai tsis yog txwv kom txhob ua txhaum xwb, tiamsis yuav pab kom cov pejxeem coj tau lub neej dawb huv. Xws li, phau Vajlugkub hais tias: “‘Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.’ Nqe no thiaj yog nqe uas tseemceeb dua ntais. Thiab nqe ob uas tseemceeb hais li no hais tias: ‘Hlub koj tej kwvtij zejzog ib yam li koj hlub koj lub cev.’” (Mathais 22:37-39) Vim lub Nceeg Vaj cov pejxeem hlub Vajtswv thiab kwvtij zej zos, lawv thiaj ua zoo pab luag lwm tus.

•   Kev Kawm. Yuav tau coj zoo kawg nkaus thiaj nyob tau rau hauv Vajtswv lub Nceeg Vaj, tiamsis yuav muaj kev kawm rau cov pejxeem kom lawv coj tau raws li tej kevcai ntawd.​—Yaxayas 48:17, 18.

•   Lub Nceeg Vaj Tes Haujlwm. Vajtswv lub Nceeg Vaj tsis yog txhawb kom tus kav nplua nuj es cia pejxeem nyob txom nyem ntsuav. Tiamsis lub Nceeg Vaj yuav txhawb kom Vajtswv lub ntsiab muaj tiav, thiab kho lub ntiajteb ua ib lub vaj kaj siab rau cov uas hlub Nws tau nyob mus ib txhis raws li Nws cog tseg.​—Yaxayas 35:1, 5, 6; Mathais 6:10; Tshwmsim 21:1-4.