Ib tug yawg tshawb txuj ci hu ua Alees Xituvawm Dutim (Alan Stewart Duthie) sau tau ib phau ntawv ntsig txog kev txhais Vajlugkub (Bible Translations and How to Choose Between Them). Nws sau tias, “Yog yus ntseeg tias Vajtswv tshoov neeg sau phau Vajlugkub rau noob neej tiag ces kuj yog Vajtswv xav nrog peb sib txuas lus. . . . Yog yus xav coj tag nrho yus lub neej raws li yus txoj kev ntseeg ces yuav tsum muab phau Vajlugkub txhais ua yam lus uas tib neeg niaj hnub hais.”

Cov uas nyiam Vajtswv Txoj Lus kuj xav ib yam li tus yawg no hais thiab. Lawv yeej ntseeg tias “Vajtswv Txojlus txhua zaj puavleej yog Vajtswv tshoov neeg lub siab kom neeg sau. Vajtswv Txojlus yog txoj uas qhia qhov tseeb, qhuab ntuas tus uas ua txhaum, pab tau tus uas ua yuam kev, thiab qhia kom sawvdaws paub ua lub neej ncaj ncees.” (2 Timautes 3:16) Phau Vajlugkub tsis yog ib phau ntawv rau cov neeg txheej thaum ub xwb. Tiam sis yog ib phau ntawv uas “ciaj sia” thiaj daws tau tib neeg tej teeb meem hauv lub neej. (Henplais 4:12) Yuav kom tib neeg nkag siab Vajtswv Txoj Lus, yuav tsum muab txhais ua tej lus uas tib neeg niaj hnub hais kom cov uas tsis tau kawm ntaub kawm ntawv siab thiaj nkag siab.

Lub 9 Hlis tim 25, xyoo 2021, Yehauvas Cov Tim Khawv tso tawm Vajtswv Txoj Lus (Mathais–Tshwm Sim) ua lus Hmoob uas yog phau Vajtswv Txoj Lus Rau Cov Nyob Lub Qab Ntuj Tshiab. Cov uas nyiam Vajtswv Txoj Lus zoo siab tshaj plaws li. Yog ib phau Vajlugkub uas txhais tau meej thiab raug ntsiab, xwv ib tsoom Hmoob thiaj tau nyeem seb Vajtswv txoj xov yog li cas tiag. Tej zaum koj xav paub seb cov uas txhais phau Vajlugkub yog leej twg.

Phau Vajtswv Txoj Lus Rau Cov Nyob Lub Qab Ntuj Tshiab—Cov Nqe Vajlugkub Kilis yog ib phau Vajlugkub uas Hmoob tsis tau pom dua. Tiam sis lub koom haum luam ntaub ntawv Vajlugkub, Watch Tower Bible and Tract Society, twb tso tawm phau no ua lus Askiv xyoo 1950 lawm. Phau Tsom Faj Askiv lub 9 Hlis tim 15, 1950 hais tias, “Cov neeg uas pab txhais phau Vajlugkub no tau hais tias lawv tsis xav . . . kom tib neeg paub lawv tej npe li. Txawm lawv dua lawm los, txwv tsis pub qhia leej twg paub. Lub ntsiab txhais phau Vajlugkub no yog los qhuas tus tseem Vajtswv uas muaj sia zees nyob lub npe xwb.”

Tau muab phau Vajtswv Txoj Lus Rau Cov Nyob Lub Qab Ntuj Tshiab, luam ua ib phau uas muaj txhij tib si rau xyoo 1961. Txij thaum ntawd los, txawm peb tsis paub tias leej twg yog cov txhais los, peb paub tseeb tias lawv yeej hlub Vajtswv kawg li tiag. Phau uas kho dua tshiab xyoo 2013 tau hais tias, “Peb paub tias Vajtswv Txoj Lus tseem ceeb kawg nkaus li. Peb thiaj ua tib zoo muab cov lus no kho dua tshiab. Tes hauj lwm txhais Vajtswv Txoj Lus kom raug ntsiab yog ib yam tseem ceeb heev. . . . Peb lub hom phiaj yog txhais kom tau ib phau Vajlugkub raug li cov qub lus thaud uas kuj yooj yim nyeem thiab nkag siab.”

Txij thaum ntawd los txog niaj hnub no, thoob ntiaj teb twb luam tau tshaj li 240 plhom Phau Qab Ntuj Tshiab lawm. Thiab tau muab txhais ua tshaj li 200 yam lus, tej phau txhais tiav lawm, tej phau txhais txog nrab xwb. Cov uas tau nyeem phau Vajlugkub no puas nyiam thiab?

Yexus qhia kom nws cov thwj tim thov Vajtswv tias, “Peb Leej Txiv tus uas nyob saum ntuj ceeb tsheej, thov kom sawv daws hwm koj lub npe.” (Mathais 6:9) Phau Vajlugkub muaj Vajtswv lub npe Yehauvas nyob rau hauv yuav txog 7,000 zaus diam. (Khiav Dim 3:15; Phau Ntawv Nkauj 83:18) Tom qab Yexus cov tub txib dua tas lawd, lub koom txoos pib xav yuam kev li cov neeg Yudais xav, lawv thiaj tsis kam tuav Vajtswv lub npe lawm. (Tes Haujlwm 20:29, 30; 1 Timautes 4:1) Cov neeg uas theej Cov Nqe Vajlugkub Kilis thiaj pib muab Vajtswv lub npe Yehauvas rho tawm zuj zus mus es siv lub npe meej mom “Vajtswv” thiab “tus Tswv” lawm xwb.

Rooj Txhais Vajtswv Txoj Lus Phau Qab Ntuj Tshiab thiaj txiav txim tias yuav tsum tau rov qab muab Yehauvas lub npe tso rau hauv Cov Nqe Vajlugkub Kilis. a Vajtswv lub npe tshwm txog 237 zaus rau hauv. Qhov uas lawv muab kho li no tsis yog lawv kho ywj lawv siab tiam sis lawv ua tib zoo tshawb nrhiav ua ntej seb tsim nyog tso rau qhov twg. Zoo li Lukas 4:18, cov lus ntawd yog muab hauv Yaxayas 61:1 los. Lub npe Yehauvas yeej nyob hauv nqe Vajlugkub ntawd ua lus Henplais. Phau Qab Ntuj Tshiab thiaj muab Lukas 4:18 txhais tias, “Vajtswv Yehauvas lub hwj huam nrog nraim kuv. Nws xaiv kuv mus tshaj tawm txoj xov zoo rau cov neeg txom nyem.”

Qhov uas rov muab Vajtswv Yehauvas lub npe tso rau hauv nws Txoj Lus pab kom sawv daws pom tias nws thiab nws tus tub Yexus Khetos tsis yog ib tug. Zoo li hauv Mathais 22:44, ntau phau Vajlugkub muab txhais tias, “Tus Tswv hais rau kuv tus Tswv hais tias.” (Txoj Moo Zoo Uas Yog Vajtswv Txojlus Phau Txhais Tshiab) Tiam sis tus tswv yog leej twg? Cov lus no twb yog muab hauv Phau Ntawv Nkauj 110:1 los. Thaum sau ua lus Henplais yeej muaj Vajtswv lub npe nyob rau hauv. Phau Qab Ntuj Tshiab thiaj muab Mathais 22:44 txhais li no, “Vajtswv Yehauvas hais rau kuv tus Tswv tias.” Tsis yog lawv lam tso Vajtswv lub npe rau hauv kom tas kev cai xwb. (Malakaus 13:32; Yauhas 8:17, 18; 14:28) Tiam sis yuav tsum muab tso rau hauv, tib neeg thiaj paub Vajtswv lub npe lawv thiaj dim. Zoo li Tes Hauj Lwm 2:21 hais, “Txhua tus uas tuav Vajtswv lub npe Yehauvas thov thiaj yuav dim.”

Cov txhais lus ua tib zoo txhais kom thiaj raug lub ntsiab raws li cov lus Kilis thaum ub, tiam sis kuj yooj yim rau tiam neeg no nkag siab. Zoo li, hauv Tej Lus Qhia 9:10 thiab lwm nqe, phau Vajlugkub Askiv siv lo lus Henplais, Se-aus (Sheol). Lwm phau Vajlugkub Askiv kuj siv lo lus ntawd thiab. Tiam sis muaj ntau yam lus tsis paub lo lus ntawd. Tsis muaj nyob hauv lawv tej ntaub ntawv txhais lus, thiab tej txhia xav tias yog ib qho chaw tiag tiag. Yog li ntawd, thiaj txiav txim siab tias yuav muab lo lus Henplais Se-aus thiab lo lus Kilis Hedis (Hades) txhais ua “lub qhov tuag.” Lo lus “qhov tuag” to taub yooj yim dua, thiab meej raws li cov lus Henplais.

Hauv phau Vajlugkub lo lus Henplais nefe (neʹphesh) thiab lo lus Kilis xahi (psy·kheʹ) yog siv rau tib neeg, tsiaj txhu los sis txoj sia. Nyuaj txhais ob lo lus no heev. Vim li cas? Muaj ntau yam lus muab ob lo lus no txhais yuam kev ua ntsuj plig. Yog li ntawd, lub hauv paus koom haum loj thiaj tso cai rau cov txhais lus muab ob lo lus no txhais raws li lub ntsiab xwb. Zoo li hauv phau Vajlugkub Hmoob, yog nqe Vajlugkub hais txog tib neeg, tsiaj txhu thiab txoj sia ces lawv cia li hais kiag lo lus ntawd xwb. Lawv tsis tas siv lo lus nefe los sis xahi. Thaum lawv txhais ncaj qha li no ua rau tib neeg nkag siab dua.

Tam sim no tsuas tso tawm phau Mathais ua lus Hmoob xwb. Tsis ntev tom ntej no mam tso tawm Cov Nqe Vajlugkub Kilis ib phau zuj zus thiab. Ntev mus tseem yuav muab phau Vajlugkub txhais ua lus Hmoob tag nrho tib si. Ua li cov uas nyeem phau Vajlugkub Hmoob puas tso siab tau tias yuav raug ntsiab thiab meej li phau Vajlugkub Askiv?

Yeej nyeem tau tso siab lug! Vim li cas? Vim tias Pab Uas Ntaus Thawj rau Yehauvas Cov Tim Khawv ua tib zoo saib xyuas tes hauj lwm txhais lus. Lawv npaj tias tsis yog ib tug txhais xwb, tiam sis yog ib pab txhais. (Pajlug 11:14) Thoob ntiaj teb lawv thiaj xaiv tej pab los txhais phau Vajlugkub. Yehauvas Cov Tim Khawv lub hauv paus koom haum loj thiaj muaj ib chav los saib xyuas kev txhais ntaub ntawv los txhawb cov txhais lus, xwv cov uas txhais Vajlugkub ua lwm yam lus thiaj txhais tau mus ib seem. Tsis tas li ntawd, muaj cov twj koos pis tawj (Watchtower Translation System) uas tsim los pab cov txhais Vajlugkub. Cov twj no pab kom cov txhais lus pom tias lus Askiv tau muab lo lus Henplais thiab lo lus Kilis txhais li cas. Qhov no pab kom cov txhais lus nrhiav tau tej lo uas raug tib lub ntsiab. Tiam sis tes hauj lwm txhais lus tsis yog koos pis tawj txhais, yuav tsum muaj neeg los ua tes hauj lwm no. Tiam sis twb yog muaj cov twj koos pis tawj thiaj yooj yim dua rau lawv tshawb nrhiav Vajlugkub, xwv thiaj meej thiab raug ntsiab ib yam li phau Askiv.

Cia li lauj sij hawm los nyeem Vajtswv Txoj Lus (Mathais–Tshwm Sim) uas yog Vajtswv Txoj Lus Rau Cov Nyob Lub Qab Ntuj Tshiab. Tam sim no tsuas tso tawm hauv peb lub vej xaij thiab hauv lub twj JW Library xwb. Koj yuav pom tias cov npe ntawv los yeej sau hlawv hlo kom pom tseeb, thiab txhua phau ntawv yuav muaj cov ntsiab lus thaum pib kom koj paub tias phau ntawd yuav qhia li cas thiab kom yooj yim nrhiav cov nqe Vajlugkub, thiab kuj muaj cov lus txhais nyob rau tom kawg. Qhov tseem ceeb tshaj, thaum koj nyeem phau Vajlugkub no koj yuav nyeem tso siab lug rau qhov yeej txhais raws li Vajtswv lub tswv yim ua yam lus uas tib neeg niaj hnub hais.