English New World Translation of the Christian Greek Scriptures be lagani 1950 ai idia halasia, bona New World Translation of the Holy Scriptures be lagani 1961 ai idia halasia. Unai nega amo, ­Baibel duahia taudia milioni momo ese gado 210 mai kahana ai idia hahanaia Baibel idia duahia bona namo bada idia davaria, badina idia hahanaia maoromaoro bona idia duahia neganai ia auka lasi.

To idia hanaia lagani 50 lalonai, gado be idia idau. New World Bible Translation Committee be unai ia lalopararalaia dainai, Baibel dekenai senisi haida ia karaia duahia taudia edia kudouna ia ­hamarerea totona. Unai dainai, inai Baibel matamata ena ­sitaelo bona ena hereva haida idia haidaua, ena badina haida be inai:

•   Baibel ena hereva edia anina idia hahedinaraia. Inai Baibel lalonai, Baibel ena hereva badadia haida edia anina idia gwauraia hedinarai.

  Baibel haida lalonai, idia gwau Iesu be korosi ai ia mase. Inai Baibel ese ia hahedinaraia Iesu be “hisihisi auna” ai ia mase bona “korosi” ai ia mase lasi. Siri haida hegeregere Mataio 10:38 bona Mareko 8:34 ai, “hisihisi auna” ai atoa bona futnout ai duahia tauna ai hamaoroa diksenari do ia itaia. Diksenari ai, Grik herevana stau·rosʹ bona ena anina ia noho.

  Danu, Baibel momo lalonai inai hereva “hel” idia atoa, to ai ese Mataio 18:9; Mareko 9:43 bona Iamesi 3:6 ai inai Grik gado herevana Gehena ai atoa. Unai siri ta ta ai, futnout ese duahia tauna ia hamaoroa diksenari do ia itaia. Diksenari ese Gehena ena anina ia hahedinaraia.

• Inai Baibel ena kahana haida:

  Inai Baibel lalonai futnout haida idia atoa. Idia be inai:

  “Eiava” Heberu, Aramia eiava Grik ai siri idia torea dalana ma ta, to anina be tamona.—Genese 1:2, “gaukara siahuna” ena futnout; Iosua 1:​8, “gado maragina” ena futnout.

  “Eiava reana” Siri ta idia gwauraia dalana ma ta, ena be ia maoro, to anina ma ta ia hahedinaraia.—Genese 21:6, “lau ida do idia kiri”; Sekaraia 14:21, “Kanana tauna.”

•  “Heb.,” bona “Gr.,” Heberu, Aramia eiava Grik gado amo hereva ta ta idia hahanaia, eiava unai gado gunadia edia hereva ena anina korikorina idia hahanaia.—Genese 30:22, “rogorogo”; Esodo 4:​10, “hereva haraga lasi.”

• Hereva edia anina bona heduru herevadia Ladana edia anina (Genese 3:17, “Adamu”; Esodo 15:23, “Mara”); gau edia metau bona mesament (Genese 6:15, “kiubit”); taunimanima ta ia ha­hedinaraia herevana (Genese 38:5, “ia”); Apendiks bona Diksenari edia heduru herevadia.—Genese 37: 35, “Mase Gurina”; Mataio 5:22, “Gehena.”

• Baibel ena hamatamaia kahanai inai sinado, “Baibel amo Dahaka Do Oi Dibaia?” ia noho, unai kahana ai Baibel ena hahediba hereva badadia idia noho. Baibel siri ibounai edia dokonai be “Baibel Bukadia Edia Lista,” “Baibel Indeks,” bona “Baibel Ena Diksenari.” Diksenari ese duahia tauna ia durua Baibel ai idia gaukaralaia herevadia edia anina ia lalopararalaia totona. Apendiks A ena kahana be inai: “Baibel Hahanaia Dalana Ena Taravatu,” “ Inai Baibel Ena Kahana Idauidau,” “Baibel Ita Abia Dalana,” “Dirava Ena Ladana Heberu Toretoredia Ai,” “Dirava Ena Ladana Keristani Grik Toretoredia Ai,” “Taim-lain: Iuda Bona Israela Edia Peroveta Taudia Bona King Taudia,” bona “Iesu Ena Tanobada Maurina ai Idia Vara Gaudia.” Apendiks B ai be mapu, taim-lain, bona hereva haida Baibel duahia tauna durua totona.

  Baibel ena buka ta ta be mai edia karoa ena hereva badadia, bona edia siri danu idia noho, unai ese duahia tauna ia durua Baibel buka ta ena sivarai ia lalopararalaia totona. Rau ta ta huanai be majinol referens idia noho, unai ese duahia tauna ia durua Baibel ena siri ma haida ia itaia totona.