Sivarai Iharuana 6:1-42
6 Unai nega ai Solomona ia gwau: “Iehova be ia gwau ia be ori koremana lalonai do ia noho.+
2 Hari lau ese oi totona ruma mai hairaina lau haginia vadaeni, inai be emu noho gabuna ela bona hanaihanai.”+
3 Bena king ia giroa bona Israela taudia ibounai ia vaira henia bona idia gini noho lalonai idia ia hanamoa matamaia.+
4 Ia gwau: “Namona be Iehova, Israela ena Dirava ita hanamoa, ia ese sibona ena uduna amo egu tamana Davida ia gwauhamata henia, bona ena imana amo inai ia hagugurua, ia gwau,
5 ‘Egu taunimanima, Israela taudia be Aigupito tanona amo lau hakaudia raka-lasi dinana ai, lau ese Israela ena iduhu edia gabu ibounai amo tano ta lau abia hidi lasi, egu ladana do ia noho rumana ta idia haginia totona,+ bona tau ta lau abia hidi lasi egu taunimanima, Israela taudia ia gunalaia totona.
6 To lau ese Ierusalema lau abia hidi,+ egu ladana be unuseni ia noho, bona Davida lau abia hidi egu taunimanima, Israela taudia ia lohiaia totona.’+
7 Bona egu tamana Davida ena kudouna ai ia ura momokani, Iehova, Israela ena Dirava ena ladana totona ruma ta ia haginia.+
8 To Iehova be egu tamana Davida dekenai ia gwau, ‘Emu kudouna ai oi ura momokani egu ladana totona ruma ta oi haginia. Bona oi ura karaia karana be maoro.
9 To oi ese unai ruma do oi haginia lasi, to oi amo ia vara natuna mero ese egu ladana totona unai ruma do ia haginia.’+
10 Iehova ese ia karaia gwauhamatana ia hagugurua, badina lau ese egu tamana Davida ena gabu lau abia bona Israela ena terona latanai lau helai,+ Iehova ia gwauhamata hegeregerena.+ Bona lau ese Iehova, Israela ena Dirava ena ladana totona ruma ta lau haginia danu,
11 bona unuseniai Taravatu Maua lau atoa.+ Unai maua lalonai Iehova ese Israela taudia ida ia karaia gwaubou herevadia idia noho.”
12 Bena ia be Iehova ena boubou patana vairanai ia gini, Israela taudia ibounai edia vairana dekenai, bona ena imana ia kehoa.+
13 (Solomona ese kopa amo pata ta ia karaia bona ariara ena huanai ia atoa.+ Ena lata be 5 kiubit,* ena lababa be 5 kiubit, bona ena ataiai be 3 kiubit. Bona ia be unai pata latanai ia gini.) Bona Israela taudia ibounai vairanai ia tui diho bona ena imana ia kehoa bona guba dekenai ia abia isi,+
14 bona ia gwau: “Iehova, Israela ena Dirava e, Dirava ta be oi bamona lasi guba ai eiava tanobada ai, emu gwauhamata oi badinaia noho bona emu hesiai taudia dekenai lalokau* oi hahedinaraia, idia be mai kudouna ibounai ida emu vairanai idia raka.*+
15 Oi ese egu tamana Davida, emu hesiai tauna dekenai oi karaia gwauhamatana oi hagugurua.+ Oi sibona emu uduna amo unai gwauhamata oi karaia, bona hari dina emu imana amo unai oi hagugurua.+
16 Bona hari, Iehova, Israela ena Dirava e, oi ese egu tamana Davida, emu hesiai tauna dekenai oi karaia gwauhamatana oi badinaia. Egu tamana dekenai oi gwau: ‘Bema emu natudia memero be lau vairanai edia kara idia naria namonamo,+ lau vairanai oi karaia hegeregerena,+ lohia dagina be emu bese lalonai do ia noho hanaihanai.’
17 Bona hari, Iehova, Israela ena Dirava e, Davida emu hesiai tauna dekenai oi karaia gwauhamatana oi hamomokania.
18 “To Dirava be momokani tanobada ai taunimanima ida do ia noho, a?+ Itaia! Guba bona guba ena ataiai momokani be hegeregere lasi emu noho gabuna ai ia lao totona,+ vadaeni edena bamona inai ruma, lau haginia rumana lalonai oi noho diba?+
19 Vadaeni egu Dirava Iehova e, mani emu hesiai tauna ena guriguri bona ena noinoi hebogahisi totona oi kamonai henia, bona emu hesiai tauna ena taitai heduru totona oi kamonai henia, oibe, oi vairanai ia gwauraia gurigurina mani oi kamonai.
20 Dina bona hanuaboi ai mani emu matana amo inai ruma oi itaia noho, badina oi gwau, emu ladana be unuseniai do ia noho.+ Bona emu hesiai tauna ese inai gabu ia vaira henia bona ia gwauraia guriguri mani oi kamonai henia.
21 Bona mani emu hesiai tauna ese heduru totona ia gwauraia noinoi oi kamonai, bona emu taunimanima, Israela taudia ese inai gabu idia vaira henia bona idia noinoi neganai,+ mani emu noho gabuna guba amo do oi kamonai,+ oibe, mani oi kamonai bona edia dika oi gwauatao.+
22 “Bema tau ta be ena dekena tauna dekenai ia kara dika dainai ena dekena tauna ese ia hamaoroa gwauhamata metauna* ia karaia, bona bema unai gwauhamata dainai emu boubou patana vairanai ia mai,+
23 mani guba amo oi kamonai bona kara ta oi karaia emu hesiai taudia oi hahemaoro henia totona, kara dika tauna oi gwauraia kerere bona ia karaia kara hegeregerena ia oi panisia,+ bona kara maoromaoro tauna oi gwauraia maoromaoro bona ena kara maoromaoro hegeregerena davana oi henia.+
24 “Bona bema emu taunimanima, Israela taudia be edia inai tauna ese ia halusidia badina oi dekenai idia kara dika,+ bona oi dekenai idia giroa lou bona emu ladana idia hanamoa+ bona inai ruma ai emu vairana ai idia hedinarai bona idia guriguri+ bona emu hebogahisi totona idia noinoi,+
25 mani guba amo emu taunimanima, Israela taudia oi kamonai henia+ bona edia kara dika oi gwauatao bona idia bona edia sene taudia dekenai oi henia tanona ai idia oi hakaua giroa.+
26 “Bema idia be oi dekenai idia kara dika noho+ dainai guba ia koua bona medu ia diho lasi,+ bona inai gabu idia vaira henia bona idia guriguri bona emu ladana idia hanamoa bona idia oi hahisia dainai edia kara dika amo idia helalo-kerehai,+
27 mani emu hesiai taudia, Israela taudia be guba amo oi kamonai henia bona edia kara dika oi gwauatao, bona idia oi hadibaia dala namona dekenai idia raka totona.+ Bona emu tano, emu taunimanima dekenai oi henia tanona unai, latanai medu oi siaia.+
28 “Bema inai tano ai hitolo bada,+ eiava gorere dikana,+ eiava lai mai siahuna ia vara, tubutubu gaudia idia kakoro,+ eiava kwadi momo herea ese aniani idia ania ore,+ eiava bema edia inai taudia ese idia be edia siti ta ai idia koua hagegea+ eiava dika badana ta o gorere ia vara,+
29 bona herevana dahaka totona idia guriguri,+ bona ena be tau ta eiava Israela taudia ibounai be edia lalohisihisi bona hisihisi dainai emu hebogahisi totona dahaka noinoi herevana idia gwauraia,+ bona inai ruma idia vaira henia bona edia imana idia kehoa neganai,+
30 mani emu noho gabuna guba amo oi kamonai+ bona mani idia oi gwauatao.+ Bona ta ta ena kudouna oi diba, oi sibona be taunimanima edia kudouna oi diba momokani dainai, idia ta ta edia kara hegeregerena davana oi henia,+
31 vadaeni emu dala dekenai idia raka amo idia ese oi do idia gari henia, edia sene taudia dekenai oi henia tanona ai idia noho dinadia ibounai lalonai.
32 “Danu idau tano tauna, Israela lasi tauna be daudau tanona amo ia mai, emu ladana bada+ bona emu siahu bada dainai, bona ia mai bona inai ruma ia vaira henia bona ia guriguri,+
33 vadaeni namona be emu noho gabuna guba amo oi kamonai, bona idau tano tauna ia noia gauna oi henia, unai amo tanobada taudia ibounai be emu ladana do idia diba+ bona oi do idia gari henia, emu taunimanima Israela taudia ese idia karaia bamona, bona do idia diba emu ladana be inai ruma dekenai ia noho, lau haginia rumana unai.
34 “Bema emu taunimanima be edia inai taudia tuari henia totona idia oi siaia bona herevana edeseni idia lao,+ to bema oi abia hidi siti bona emu ladana totona lau haginia ruma idia vaira henia, bona oi idia guriguri henia,+
35 vadaeni guba amo mani edia guriguri oi kamonai bona hebogahisi totona idia gwauraia noinoi oi kamonai danu, bona idia totona hahemaoro oi karaia.+
36 “Bema idia be oi dekenai idia kara dika (badina ibounai be kara dika taudia)+ bona idia dekenai oi badu bona edia inai tauna dekenai oi rakatanidia, bona edia inai tauna ese ena tano dekenai ia abidia lao, herevana unai be kahirakahira eiava daudau,+
37 bona unai tano dekenai idia noho lalonai idia laloparara bona oi dekenai idia giroa lou bona edia inai taudia edia tano ai emu hebogahisi totona idia noinoi, idia gwau, ‘Ai be ai kara dika bona ai kerere, oibe, ai kara dika vadaeni,’+
38 bona edia inai taudia edia tano ai+ mai edia kudouna ibounai bona mauri* ibounai ida oi dekenai idia giroa lou,+ bona edia tano, edia sene taudia dekenai oi henia tano unai, bona oi abia hidi siti bona emu ladana totona lau haginia rumana idia vaira henia, bona oi dekenai idia guriguri,+
39 vadaeni mani emu noho gabuna guba amo edia guriguri oi kamonai bona emu hebogahisi totona idia gwauraia noinoi mani oi kamonai danu, bona idia totona hahemaoro oi karaia+ bona emu taunimanima edia kara dika oi gwauatao.
40 “Egu Dirava e, mani ai oi itaia bona inai gabu dekenai ai gwauraia guriguri mani oi kamonai.+
41 Bona Iehova Dirava e, mani emu laga-ani gabuna dekenai oi daekau lao,+ bona Maua danu, emu goada ia hahedinaraia maua unai. Iehova Dirava e, emu hahelaga taudia ese idia hahedinaraia oi ese taunimanima oi hamauria diba, bona oi idia badinaia taudia be emu kara namo dainai idia moale be namo.+
42 Iehova Dirava e, emu horoa tauna oi dadaraia lasi.+ Mani emu hesiai tauna Davida oi lalokau* henia dalana oi laloatao.”+
Futnout
^ Eiava “oi idia hesiai henia noho.”
^ Heberu herevana be gwauhamata metauna mai ena panisi ia herevalaia, anina be bema ta ese ena gwauhamata ia hamomokania lasi, panisi do ia abia.
