Moi: Namo Sila. Emu ruma ai oi lau davaria dainai lau moale.

Sila: Oi mai dainai lau moale.

Moi: Vanegai lau mai neganai, hisihisi ita davaria neganai, dirava ena hemami be edena bamona, ita kikilaia. * Oi gwau oi ese nega daudau lalonai unai oi lalohadailaia, badina emu sinana be motuka aksiden amo bero ia davaria. Madi, emu sinana ia namo ia lao, a?

Sila: Io, nega haida ena hemami ia namo, nega haida ena hemami ia dika. To, hari dina ia namo sisina.

Moi: O, ia namo dainai lau moale. Madi, nega haida inai bamona hekwakwanai idia vara neganai, ita moale noho be auka.

Sila: Unai be momokani. Nega haida lau laloa inai bamona do ia hisihisi noho ela bona edena negai?

Moi: Madi emu hemami lau lalopararalaia. Oi laloatao vanegai iseda kiki ena dokona ai inai henanadai lau rakatania, bema Dirava be mai ena siahu, dahaka dainai ia ese hisihisi ia koua lasi?

Sila: Oibe, lau laloatao.

Moi: Baibel amo haere ita do tahua lasi neganai, mani vanegai ita herevalaia point haida ita laloa lou.

Sila: Namo.

Moi: Ita dibaia gauna ta be, Baibel negadiai abidadama tauna ta be Dirava ese hisihisi ia koua lasi ena badina ia laloa momo. To, Dirava be iena henanadai dainai ia gwau-henia lasi, eiava ia hamaoroa lasi ena abidadama do ia habadaia.

Sila: Oibe, unai be hereva matamatana lau dibaia.

Moi: Ita dibaia gauna ma ta be, Iehova Dirava ia ura lasi ita hisihisi. Hegeregere, Baibel ia gwau iena taunimanima be hisihisi idia davaria neganai, “ia danu ia lalometau.” * Hisihisi ita davaria lalonai, Dirava be ita dekenai ia hebogahisi karana ita diba neganai, unai ese ita ia hagoadaia momokani, ani?

Sila: Oibe.

Moi: Point ginigabena be inai, ita abia dae iseda Havaraia tauna be mai ena siahu bada, ia hegeregere hisihisi ibounai ia hadokoa totona.

Sila: Oibe, unai dainai lau daradara, Dirava be mai ena siahu bada, to dahaka dainai hisihisi ia koua lasi?

Oiemu henanadai ena haere be Baibel ena buka ginigunana Genese ai do ita davaria. Oi be Adamu, Heva bona Dirava ese ia taravatua au huahua ena sivarai oi diba, a?

Sila: Oibe, Sunday sikuli ai unai sivarai lau kamonai. Dirava ia gwau au ta ena huahua do idia ania lasi, to idia kamonai lasi bona idia ania.

Moi: Unai be maoro. To Adamu bona Heva idia do kara dika lasi neganai ia vara gauna ena sivarai mani ita itaia guna. Unai sivarai be mai anina bada, badina hisihisi ita davaria ena badina ia hahedinaraia. Ia namo bema Genese karoa 3 siri 1 ia lao 5 oi duahia?

Sila: “Vadaeni Iehova Dirava ese ia karaia uda animal ibounai amo, gaigai be vaia diba momo. Vadaeni hahine dekenai ia gwau: ‘Momokani, Dirava ia gwau uma dekenai idia noho au ibounai ena huahua do umui ania lasi, a?’ Unai neganai hahine be gaigai dekenai ia gwau: ‘Uma ai idia noho au huahua ibounai ai ania diba. To uma huanai ia gini au ena huahua totona Dirava ia gwau: “Unai au ena huahua do umui ania lasi, oibe, do umui dogoatao lasi, dika umui mase.’” Unai neganai gaigai be hahine dekenai ia gwau: ‘Lasi, do umui mase lasi. Badina Dirava ia diba unai au ena huahua umui ania dinana ai, emui matana do idia kehoa, bona umui be Dirava bamona do umui lao, namo bona dika do umui diba.’”

Moi: Tanikiu. Mani unai siri ita herevalaidia sisina. Gau ginigunana be gaigai ta ese hahine, Heva ia hereva henia. Baibel ena kahana ta ai ia hahedinaraia Hahine dekenai ia hereva gaigai be Satani Diabolo. * Satani be Heva dekenai Dirava ese ia taravatua auna totona ia henanadai. Adamu bona Heva be unai au huahua idia ania neganai, Dirava ia gwau dahaka panisi do idia abia?

Sila: Do idia mase.

Moi: Maoro. Bena gabeai ia gwauraia herevadia amo ia be Dirava ia gwauraia dika momokani. Ia gwau: “Lasi, do umui mase lasi.” Unai amo Satani ia gwau Dirava be koikoi tauna!

Sila: Guna unai hereva lau kamonai lasi.

Moi: Bona Satani ia gwau Dirava be koikoi tauna neganai, unai hepapahuahu idia hamaoromaoroa totona nega sisina ia hanaia be namo. Unai oi lalopararalaia, a?

Sila: O, lau daradara.

Moi: Reana haheitalai ta amo unai point lau hahedinaraia diba. Dina ta oi lau hamaoroa lau be goada, to oi be goada lasi. Edena dala ai egu hereva oi hakoikoia diba?

Sila: Reana, eda goada do ita tohoa

Moi: Maoro. Reana metau gauna ta do ita abia hidi bona ita itaia daika ese ia abia isi diba. So, daika be ia goada ita hamomokania totona be auka lasi.

Sila: Ok, hari emu point lau lalopararalaia.

Moi: To edena bamona bema lau gwau, lau be kara momokani tauna to oi be koikoi tauna? Egu hereva oi hakoikoia totona be auka, ani?

Sila: Io, do ia auka.

Moi: Maoro, badina kara momokani be goada karana bamona lasi, metau gauna ta amo ita tohoa diba lasi.

Sila: Maoro.

Moi: Unai hepapahuahu ita hamaoromaoroa totona nega sisina do ita hanaia, bona haida ese ita do idia itaia bona idia hamomokania oi be kara momokani tauna.

Sila: Momokani, unai be dala maorona.

Moi: Mani Genese ena sivarai ita itaia lou. Satani ia gwau iena goada ese Dirava ena goada ia hereaia, a?

Sila: Lasi, unai bamona ia hereva lasi.

Moi: Maoro, badina Dirava ese unai ia hakoikoia diba. To, Satani ia gwau ia be kara momokani tauna bona Dirava be koikoi tauna. Hegeregere, Heva dekenai ia gwau, ‘Dirava be oi dekenai ia koikoi noho, to lau be hereva momokani lau gwauraia.’

Sila: O, unai be point matamata.

Moi: Dirava be mai ena aonega bada dainai, ia diba nega sisina ia hanaia be namo unai hepapahuahu ia hamaoromaoroa totona. Dokonai do ia hedinarai goevagoeva, daika be hereva momokani ia gwauraia bona daika be ia koikoi.

Sila: To Heva ia mase neganai, unai ese ia hamomokania Dirava be hereva momokani ia gwauraia, a?

Moi: Oibe, to Satani ese Dirava dekenai ia gwauraia dika herevana ena kahana ia do noho. Mani siri 5 oi itaia. Satani ese Heva dekenai ia gwauraia herevana ma ta be dahaka?

Sila: Ia hamaoroa bema unai huahua ia ania iena mata do ia kehoa.

Moi: Oibe, bena ia be ‘Dirava bamona do ia lao, namo bona dika do ia diba.’ Unai amo Satani ia gwau Dirava be taunimanima dekenai gau namona ta ia henia lasi.

Sila: OK.

Moi: Unai be hekwakwanai badana.

Sila: Dahaka dainai unai bamona oi hereva?

Moi: Satani ena hereva ena anina be​—⁠Heva, bona taunimanima ibounai​—⁠do idia moale bema Dirava ese idia ia lohiaia lasi. Inai hepapahuahu lalonai, Iehova ia diba unai lalohadai hakoikoia dalana tamona be nega do ia henia Satani ese unai hereva ia hagugurua totona. Unai ia karaia totona, Dirava ese nega sisina ia henia Satani be tanobada do ia lohiaia. Unai dainai, tanobada ibounai lalonai hisihisi bada ita itaia. Unai ese ia hamomokania Satani be tanobada ena lohia, Dirava lasi. * To, sivarai namona ia noho.

Sila: Unai be dahaka?

Moi: Baibel ese inai mai anina bada hereva momokani rua Dirava dekenai ia hahedinaraia. Ginigunana be, hisihisi ita davaria neganai Dirava be ita ia laloa. Hegeregere, King Davida ena hereva Salamo 31:7 ai mani ita laloa. Davida ena mauri lalonai hekwakwanai momo ia davaria, to iena guriguri herevadia mani ita itaia. Ia namo unai siri oi duahia?

Sila: OK. Ia gwau: “Emu lalokau dainai do lau moale bada, badina oi ese egu hisihisi oi itaia vadaeni, bona egu lalometau oi diba.”

Moi: So, ena be Davida be hisihisi ia davaria, ia diba Dirava ese ia dekenai idia vara gaudia ibounai ia diba, bona unai ese ia hagoadaia. Oi danu, a? Ena be haida ese ita mamia hisihisi idia lalopararalaia lasi, to Dirava be idia vara gaudia ibounai ia diba karana ese oi ia hagoadaia, a?

Sila: Oibe, lau ia hagoadaia.

Moi: Mai anina bada hereva momokani iharuana be Dirava ese kara ta do ia karaia bona ita davaria hisihisi be do ia noho hanaihanai lasi. Baibel ia hadibaia kahirakahira Dirava ese Satani ena lohia dalana do ia hadikaia ore. Idia vara gau dikadia ibounai do ia hanamoa, oi bona emu sisina ese umui davaria hisihisi danu. Ia namo bema vaira wiki lau mai bona dahaka dainai oi abia dae diba Dirava ese kahirakahira hisihisi ibounai do ia haorea ita herevalaia? *

Sila: Oibe, ia namo.