Baibel ai ia noho sivarai namona ta be inai: Taunimanima be tanobada ai do idia noho ela bona hanaihanai. (Salamo 37:29) Baibel ai buka maragidia 66 idia noho. Dirava ese ia idia abidadama henia taudia 40 bamona ia gaukaralaia Baibel bukadia idia torea. Mose ese lagani 3,500 gunanai Baibel ena buka ginigunadia faiv ia torea. Aposetolo Ioane ese lagani 1,900 mai kahana gunanai Baibel ena buka ginigabena ia torea. Baibel torea taudia be daika ena lalohadai idia torea? Dirava be Baibel torea taudia ida ia herevahereva. Ia ese ena lalohadai be idia edia lalona ai ia atoa. Ia ese aneru bona matahanai amo Baibel torea taudia haida ia hereva henia. (Apokalupo 1:1) Nega haida, Dirava ese Baibel torea taudia ia hereva henia, bena idia ese iena hereva idia torea. Unai dainai, Baibel ia havaraia Diravana be Iehova.—Esodo 34:27; 2 Timoteo 3:16; 2 Petero 1:20, 21 duahia.

Ita diba Baibel be Dirava ese ia havaraia, badina vaira negai do idia vara gaudia ia gwauraia hedinarai goevagoeva. Taunimanima be unai bamona idia karaia diba lasi. (Iosua 23:14) Siahu Ibounai Diravana sibona ia diba dahaka be taunimanima edia vaira negana dekenai do ia vara.—Isaia 42:9; 46:10 duahia.

Momokani, Dirava ena buka be idau momokani. Baibel bilioni momo be gado handred momo ai idia halasia vadaeni. Ena be Baibel be tanobada ena sikuli teks bukana ta lasi bona ia be buka gunana ta, to ia ese Dirava ia havaraia gaudia—tanobada bona gau momo—ia herevalaia maoromaoro. Danu, Baibel torea taudia 40 amo, ta ese ma ta  ena hereva ia hakoikoia lasi. * Ma danu, Baibel ese lalokau ia herevalaia dalana amo ita diba, ia be lalokau Diravana ese ia havaraia bukana, bona ia be mai ena siahu taunimanima edia mauri ia haidaua bona hanamoa totona. Unai dainai, taunimanima milioni momo idia abia dae, Baibel be Dirava ena Hereva.—1 Tesalonika 2:13 duahia.

Baibel ai ia noho sivarai namona ma ta be, Dirava ia ura taunimanima durua totona kara ta ia karaia. Matamana negana ai tanobada paradaisona ia boio dalana bona vaira nega ai tanobada paradaisona do ia vara lou dalana be Baibel ese ia herevalaia.—Apokalupo 21:4, 5 duahia.

Danu, Baibel ai Dirava ena taravatu, hakaua herevadia, bona sisiba idia noho. Ma danu, Baibel ai Dirava ese taunimanima ia kara henia daladia ena sivarai idia noho—unai sivaraidia amo Dirava ena kara ita dibaia. Momokani, Baibel ese oi ia durua diba, Dirava oi dibaia totona. Dirava ena turana ai oi lao dalana be Baibel ese ia hahedinaraia danu.—Salamo 19:7, 11; Iamesi 2:23; 4:8 duahia.

Inai buklet be oi do ia durua, Baibel ena anina oi lalopararalaia totona. Inai buklet be Iesu ese taunimanima ia hadibaia dalana hegeregerena ai idia torea. Iesu ese “Toretore Helagadia lalonai idia torea hereva edia anina” ia herevalaia namonamo danu.—Luka 24:27, 45 duahia.

Ena be Dirava ena sivarai namona ese gau ma haida ia hereaia, to haida ese unai sivarai namona idia abia dae lasi, bona ma haida idia dagedage. To oi lalomanoka lasi, badina mauri hanaihanai oi abia dalana be inai: Dirava oi diba be namo.—Ioane 17:3 duahia.