Dirava ena Basileia (Kingdom) be guba gavamani ta. Unai gavamani ese tanobada gavamani ibounai edia gabu do ia abia. Bona unai gavamani ese Dirava ena ura guba ai bona tanobada ai do ia karaia. Dirava ese ena gavamani, o Basileia, be unai bamona do ia gaukaralaia—unai be sivarai namona. Kahirakahira, Dirava ena Basileia ese taunimanima edia ura gaudia ibounai do ia havaraia, bona tanobada besedia ibounai do ia hatamonaia.—Daniela 2:44; Mataio 6:9, 10; 24:14 duahia.

Iehova ese ena Natuna, Iesu Keriso, ia abia hidi Dirava ena Basileia ena King ai ia lao totona.—Apokalupo 11:15 duahia.

Dirava ena Natuna be King maorona, badina ia be mai ena hebogahisi bona hereva momokani sibona ia badinaia. (Ioane 1:14) Danu, Iesu ena siahu be hegeregere momokani, taunimanima ia durua totona. Ia be mase amo ia toreisi lou murinai, guba dekenai ia daekau. Unuseniai, ia be Iehova ena idibana kahanai ia helai, bona unai nega amo ia naria noho ela bona Dirava ese siahu do henia, ia lohia matamaia totona. (Heberu 10:12, 13) Kahirakahira, Iesu ese unai siahu do ia gaukaralaia, bena guba amo tanobada do ia lohiaia.—Daniela 7:13, 14 duahia.

Grup ta ladana, “helaga taudia” be Iesu ida guba ai do idia lohia. (Daniela 7:27) Iehova ese ia abia hidi helaga taudia ginigunadia be, Iesu idia abidadama henia aposetolo taudia. Unai nega amo ema bona hari, Dirava ese helaga taudia ma  haida, Ia idia abidadama henia tatau bona hahine unai, ia abia hidi noho. Iesu hegeregerena, idia danu be lauma tauanina ai idia toreisi lou.—Ioane 14:1-3; 1 Korinto 15:42-44 duahia.

Taunimanima hida be guba dekenai do idia lao? Iesu ia gwau, “seri maragi.” (Luka 12:32) Idia ibounai be 144,000. Idia be Iesu ida tanobada do idia lohiaia.—Apokalupo 14:1 duahia.

Dirava ena Basileia be lagani 1914 ai ia lohia matamaia. * Iesu ese King dagina ia abia neganai, maoromaoro Satani bona ena demoni be tanobada ai ia negea diho. Satani ia badu dikadika dainai, tanobada ibounai latanai dika bada ia havaraia. (Apokalupo 12:7-10, 12) Unai lagani amo ema bona hari, taunimanima idia hahisia gaudia be idia bada idia lao noho. Tuari, hitolo, gorere, bona tano mareremarere be “toa”—unai toa ese ita ia hadibaia, Dirava ena Basileia be kahirakahira inai tanobada do ia lohiaia.—Luka 21:7, 10, 11, 31 duahia.

Dirava ena Basileia be haroro gaukara amo, bese idauidau ia hatamonaia noho. Manau taudia milioni momo ese Iesu be edia King ai idia halaoa. Dirava ena Basileia ese inai tanobada ena oromana dikana do ia haorea neganai, ia ese unai manau taudia do ia gimaia. Bema taunimanima idia ura unai Basileia amo namo idia abia, namona be hari Iesu kamonai henia karana idia dibaia.—Apokalupo 7:9, 14, 16, 17 duahia.

Basileia be lagani 1,000 lalonai do ia lohia neganai, ia ese Dirava ena ura gauna be tanobada ai do ia havaraia. Anina be, tanobada ibounai be paradaiso ai do ia lao. Lagani 1,000 ena dokonai, Iesu ese Basileia be Tamana dekenai do ia henia lou. (1 Korinto 15:24-26) Oi ura Basileia sivaraina be daika dekenai do oi herevalaia?—Salamo 37:10, 11, 29 duahia.