Iesu be tanobada ai ia noho neganai, ena turana Lasaro ia mase. Lasaro be Betania ai ia noho—Betania be Ierusalema kahirakahira. Iesu be Betania ai ia ginidae neganai, ia kamonai Lasaro ena tauanina be dina 4 guria gabuna ai ia noho vadaeni. Iesu be guria gabuna ia lao neganai, Lasaro ena taihuna ruaosi, Mareta bona Maria, ese ia idia bamoa. Nega sisina murinai, taunimanima hutuma idia ginidae. Inai buklet ena laulau ai oi itaia hegeregerena, Iesu ese Lasaro be mase amo ia hatorea isi neganai, Mareta bona Maria be idia moale bada.—Ioane 11:21-24, 38-44 duahia.

Mareta be mase taudia edia sivarai namona ia diba vadaeni. Oibe, ia diba, Iehova ese mase taudia do ia hatorea isi bena tanobada ai do idia noho lou.—Iobu 14:14, 15 duahia.

Dirava ese tano ena kahu amo taunimanima ia karaia. (Genese 2:7; 3:19) Taunimanima edia tauanina lalonai lauma ta ia noho lasi. Ta ia mase neganai, tauanina ibounai ia mase danu. Anina be, iena kwarana harana ia mase, bona ena lalohadai ia ore. Momokani, mase taudia be gau ta idia diba lasi. Unai dainai, Lasaro be ena mase lalonai dahaka idia vara be ia herevalaia lasi.—Salamo 146:4; Hadibaia Tauna 9:5, 6, 10 duahia.

 Taunimanima idia mase murinai, Dirava ese lahi lalonai idia ia hahisia, a? Baibel ese ia hahedinaraia, mase taudia be gau ta idia diba lasi; anina be, hel lahina (hellfire) be hahediba hereva koikoina. Unai lalohadai kererena dainai, momo ese Dirava ladana idia hadikaia kava. Lahi lalonai taunimanima idia hisihisi noho lalohadaina be Dirava ese ia inai henia.—Ieremia 7:31 duahia.

Mase taudia idia hereva diba lasi bona gau ta idia kamonai diba lasi. (Salamo 115:17) To, demoni haida be idia koikoi, mase taudia edia toana bamona ai idia lao, bena mauri taudia idia hereva henidia. (2 Petero 2:4) To, mase taudia hereva henia toho karana be Iehova ese ia taravatua.—Deuteronomi 18:10, 11 duahia.

Guria gabunai, taunimanima milioni momo be mase amo do idia toreisi lou, bena tanobada ai do idia noho. Danu, Dirava idia diba lasi taudia haida, bona kara dikadia idia karaia noho lalonai idia mase taudia haida, be mase amo do idia toreisi lou.—Salamo 37:9; Kara 24:15 duahia.

Mase amo do idia toreisi lou taudia ese Dirava ena sivarai momokanina do idia dibaia, bona Iesu idia badinaia o abidadama henia karadia do idia karaia. (Apokalupo 20:11-13) Bema idia ese kara namodia idia karaia, tanobada ai mauri hanaihanai idia moalelaia diba.—Ioane 5:28, 29 duahia.

Mase taudia be mai edia helaro ena badina be inai: Dirava ese Natuna ia siaia, bena ita dainai ia mase. Unai helaro dainai ita diba, Iehova be lalokau bona hariharibada Diravana. Mase taudia idia toreisi lou neganai, oi ura daika oi hedavari henia?—Ioane 3:16; Roma 6:23 duahia.