Beth ia gwau: “Lau be tineija neganai anemia gorerena lau abia. Lau lahedo, hesiku haraga, egu turia idia hisihisi, bona lau laloa namonamo lasi. Egu doketa ese lau ia hamaoroa rara durua muramuradia o iron supplement do lau abia. Unai lau karaia, bona egu aniani lau naria namonamo danu. Daudau lasi egu hemami ia namo ia lao.”

 Beth ena gorere be momo dekenai ia vara danu. World Health Organization (WHO) ia gwau, taunimanima 2 bilioni—tanobada ena popiuleisen 30 pesen bamona be anemia gorerena idia abia. Tano haida dekenai, rogorogo hahinedia 50 pesen bona natudia maragidia 40 pesen bamona be mai edia anemia gorerena.

 Anemia gorerena ese dika bada ia havaraia diba. Gorere badadia hegeregere, kudou gorerena (heart failure) ia havaraia diba danu. Tano haida dekenai, WHO ia gwau, anemia gorerena ese “rogorogo sinadia 20 pesen ia hamasea.” Sinadia edia rara lalonai sel kakakaka ia bada lasi neganai, idia havaraia beibi be do ia premature bona weight be maragi momokani. Natudia mai edia anemia gorere edia tubu be do ia metaira bona gorere idia abia haraga diba. To iron-deficiency anemia, eiava rara lalonai sel kakakaka ia bada lasi gorerena amo idia namo diba o idia koua diba. a

Anemia be Dahaka?

 Anemia be gorere ta. Ita gwau diba, anemia gorere idia abia taudia edia rara ena sel kakakakadia be sisina sibona. Unai gorere ena badina be idauidau. Saiens taudia ese anemia gorere idauidau 400 mai kahana idia davaria! Ta dekenai unai gorere ia ore haraga diba, do ia noho daudau, eiava do ia namo diba lasi.

Dahaka ese Anemia Gorere ia Havaraia?

 Badina toi be inai:

•   Rara halusia karana ese tauanina lalonai sel kakakakadia ena namba ia hamaragia.

•   Tauanina ese rara ena sel kakakakadia momo ia havaraia lasi.

•   Tauanina ese rara ena sel kakakaka ia hadikaia.

 Iron-deficiency anemia be tanobada ena gabu momo dekenai ia vara gorerena. Tauanina lalonai iron be hegeregere lasi neganai, rara ena sel kakakaka lalonai ia noho hemoglobin ese tauanina dekenai oksijen do ia henia namonamo lasi.

Iron-deficiency Anemia Ena Toa Idauidau be Dahaka?

 Matamanai, anemia gorerena be do ia goada momokani lasi, bona unai gorere idia abia taudia be do idia mamia haraga lasi. Unai gorere ena toa be idauidau, iron-deficiency anemia ena toa haida be inai:

•   Do oi hesiku momo

•   Imana o aena idia keru

•   Goada ia ore

•   Tauanina ena toana be gorere bamona

•   Kwarana ia hisihisi bona ia metau

•   Kemena ia hisihisi, kudouna ia pidipidi haragaharaga, hahodi namonamo lasi

•   Imana koukou idia manoka

•   Aniani namonamo lasi, nega momo beibi bona natu maragidia dekenai ia vara

•   Nega momo aisi, starch, hegeregere raisi o unai bamona aniani o tano ia ura ania.

Daidia Ia Hadikaia Diba?

 Hahine Taudia be hua gorere idia abia neganai rara momo idia halusia, unai dainai iron-deficiency anemia gorere idia abia diba. Rogorogo hahinedia danu be unai gorere idia abia diba, bema edia aniani dekenai folate o folic acid, B vitamin be hegeregere lasi.

 Beibi idia vara neganai idia be premature eiava edia weight be maragi momokani, badina idia inua rata ena milika be iron ia bada lasi.

 Tauanina ia durua aniani namodia idauidau idia ania lasi natudia.

 Vamu idia ania lasi taudia (Vegetarian) edia aniani lalonai iron momo ia noho lasi.

 Nega daudau idia gorere taudia, edia rara lalonai gorere ia noho, kensa, kidney gorere, toto ai rara ia diho (slow-bleeding ulcers), o gorere ma haida idia abia taudia.

Anemia Gorere Hanamoa Dalana

 Anemia gorere haida be ita hanamoa o koua diba lasi. To edia rara lalonai iron o vitamin ia noho lasi taudia be unai gorere amo idia namo diba, bema inai bamona aniani maorodia idia abia:

 Iron. Vamu, bini, lentil, bona uma edia raurau hegeregere moringa, sesame edia raurau bona spinach lalonai ia noho. b Tahua gaukara haida ese idia hahedinaraia iron cookware eiava stainless auri pani danu be namo aniani nadua totona, badina karaia taudia idia gwau, unai ese aniani lalonai iron ia habadaia diba.

 Foleit. Inai be frut, uma ena raurau grin gaudia, green peas, kidney beans, cheese, gatoi, gwarume, almond, pinati, bona vitamin ia habadaia aniani hegeregere beredi, cereal, pasta bona raisi lalonai do oi davaria. Unai aniani lalonai Foleit ia noho, to Foleit totona taunimanima ese folik asid idia karaia.

 Vitamin B-12. Miti, bona milika amo idia karaia gaudia lalonai idia noho.

 Vitamin C. Siporo, orenisi, bona unai bamona frut amo idia karaia juice, pepper, broccoli, tomato, meloni, bona strawberrieslalonai idia noho. Aniani mai ena vitamin C ese emu tauanina do ia durua iron ia abia namonamo totona.

 Aniani haida be gabu haida dekenai do oi davaria lasi. Unai dainai emu gabu ai helt ia durua diba aniani namodia oi dibaia be namo. Bema oi be hahine ta, bona oi rogorogo o natuna havaraia ena palani oi karaia unai be mai anina bada. Emu helt oi naria namonamo karana amo, emu beibi be anemia gorere do ia abia lasi. c