Oi laloa vaira nega ai mauri be do ia namo ia lao, a? Ena be hari negai problem momo ita davaria, to momo be lalohadai maorona idia ura abia. To momokani gau ibounai do idia namo idia lao, a? Oibe! Baibel ese vaira nega ena helaro korikorina ia herevalaia.

•  Dahaka helaro be Baibel ese ia herevalaia?

•  Baibel ese ia herevalaia helaro be do idia vara momokani, a?

•  Edena dala ai inai helaro do ia vara?

•  Edena nega ai helaro do ia guguru?

•  Edena dala ai Baibel ia gwauraia helaro ese hari ita ia durua diba?

 Baibel ia gwau, taunimanima dekenai metau badadia do idia vara. To ia gwauhamata, inai hekwakwanai ese ita do idia hahisia hanaihanai lasi. Baibel siri haida itaia.

•   Hekwakwanai: Ruma Lasi

   Baibel ia gwau: “Ruma do idia haginia bona do idia noholaia.”​—Isaia 65:21.

   Unai ena anina vaira nega totona: Taunimanima be mai edia ruma dainai do idia moale.

•   Hekwakwanai: Moni Gaukara Lasi Bona Ogogami

   Baibel ia gwau: “Egu abia hidi taudia edia ima gaukara idauidau do idia moalelaia bada.”​—Isaia 65:22.

   Unai ena anina vaira nega totona: Taunimanima ibounai ese edia gaukara ena anina namona do idia moalelaia.

•   Hekwakwanai: Kara Gageva

   Baibel ia gwau: “Gunalaia taudia be kota maoromaoro totona do idia lohia.”​—Isaia 32:1.

   Unai ena anina vaira nega totona: Kara gageva be do ia ore, badina ibounai be maka tamona ai do idia kara henia, herevana idia be bese, o noho dala idauidau taudia, bona taunimanima be do idia ogogami lasi.

•   Hekwakwanai: Aniani Namonamo Lasi Bona Hitolo

   Baibel ia gwau: “Tanobada ai aniani be do ia momo herea, ororo latanai witi be do idia momo herea.”​—Salamo 72:16.

   Unai ena anina vaira nega totona: Taunimanima ibounai be aniani namodia momo do idia ania. Ta be mai hitolo ida do ia mahuta lasi, eiava aniani ena hekwakwanai do ia davaria lasi.

•   Hekwakwanai: Taravatu Utua Karana Bona Dagedage

   Baibel ia gwau: “Idia ta ta be edia vain bona fig au henunai do idia helai, bona tau ta ese idia do ia hagaria lasi.”​—Mika 4:4.

   Unai ena anina vaira nega totona: Dika taudia do idia noho lasi bona taunimanima ibounai be do idia gari lasi, badina “kara maoromaoro taudia be tanobada do idia abia.”​—Salamo 37:10, 29.

•   Hekwakwanai: Tuari

   Baibel ia gwau: “Bese ta ese bese ma ta do ia tuari henia lasi, bona tuari do idia dibaia lou lasi.”​—Isaia 2:4.

   Unai ena anina vaira nega totona: Tanobada ibounai ai maino do ia vara. (Salamo 72:7) Tuari ai lalokau tauna ia mase dainai ia vara lalohisihisi karana be do ia ore bona taunimanima be tuari dainai heau mauri gabuna do idia tahua lasi.

•   Hekwakwanai: Gorere Idauidau

   Baibel ia gwau: “Ta do ia gwau lasi: ‘Lau gorere.’”​—Isaia 33:24.

   Unai ena anina vaira nega totona: Taunimanima be gorere dainai idia hegeregere lasi gau haida idia karaia totona eiava ta do ia gorere lasi. (Isaia 35:5, 6) Baibel ia gwauhamata—“mase, . . . be do idia ore.”​—Apokalupo 21:4.

•   Hekwakwanai: Tanobada Bona Mauri Gaudia Hadikaia Karana

   Baibel ia gwau: “Taunimanima lasi gabuna bona ranu lasi tanona do idia moale, bona tano kaukau palakana do ia moale bona flaoaflaoa amo do ia honu.”​—Isaia 35:1.

   Unai ena anina vaira nega totona: Tanobada ibounai be paradaiso gabu hairaina ai do ia lao, taunimanima ese idia noholaia totona Dirava ena ura ginigunana hegeregerena.​—Genese 2:15; Isaia 45:18.

 Reana do oi mamia unai be momokani lasi. Emu lalohadai ai lalopararalaia, to oi ai hagoadaia Baibel ese ia herevalaia vaira negana oi stadilaia totona. Dahaka dainai? Baibel ena gwauhamata be taunimanima edia gwauhamata bona peroveta herevadia amo idia idau. Baibel ai idia noho gwauhamata herevadia be Dirava ese ia gwauraia. Ena badina be inai:

•   Dirava ena hereva be momokani. Baibel ia gwau Dirava ia “koikoi diba lasi.” (Tito 1:2) Danu Dirava sibona ese vaira negana ia perovetalaia diba. (Isaia 46:10) Dirava ena peroveta herevadia idia guguru ena haheitalai momo be Baibel lalonai idia noho. Infomeisen ma haida totona, inai vidio, Edena Bamona Ita Diba Baibel Ena Hereva be Momokani? oi itaia.

•   Dirava be mai ena siahu iseda problem idauidau ia hamaoromaoroa totona. Baibel ia gwau Dirava be mai ena siahu “iena ura hegeregerena gau ibounai ia karaia” totona. (Salamo 135:5, 6) Ita gwau diba, gau ta ese Dirava do ia koua lasi iena gwauhamata ia hagugurua totona. Danu, Dirava ia ura ita ia durua badina ita ia lalokau henia.​—Ioane 3:16.

 Reana do oi laloa, ‘Bema dirava ia ura ita ia durua bona ia be mai ena siahu ita ia durua totona, vadaeni dahaka dainai problem momo ita davaria noho?’ Unai henanadai haerelaia totona, inai vidio, Dahaka Dainai Dirava ese Hisihisi Ia Koua Lasi? oi itaia.

 Dirava ese iena Basileia, unai be guba gavamanina do ia gaukaralaia iena gwauhamata hagugurua totona. Iesu Keriso ia abia hidi, ia be unai Basileia ena Lohia Tauna, bona ia dekenai siahu ia henia tanobada bona taunimanima naria totona. Iesu be tanobada ai ia noho neganai, gorere taudia ia hanamoa, hitolo taudia ia ubudia, weda ia biagua bona mase taudia ia hatoreaisi lou danu. (Mareko 4:39; 6:41-44; Luka 4:40; Ioane 11:43, 44) Ia be Dirava ena Basileia ena King dainai do ia karaia gaudia ia hahedinaraia.

 Dirava ena Basileia ese oi dekenai do ia havaraia gau namodia oi diba namonamo totona inai vidio, Dirava ena Basileia be Dahaka? oi itaia.

 Kahirakahira! Dahaka dainai unai ita abia dae diba? Baibel ese toa idauidau ia perovetalaia bona unai ese do ia hamomokania Dirava ena Basileia ese kahirakahira tanobada ibounai do ia lohiaia. (Luka 21:10, 11) Hari idia vara noho gaudia be Baibel ena peroveta herevadia hegeregerena.

 Diba ma haida totona inai atikol “Edena Negai Dirava Ena Basileia ese Tanobada Do Ia Lohiaia?” oi duahia.

 Baibel torea tauna ta ese Baibel ia gwauraia helarona be “mauri ena dogo” ida ia hahegeregerea. (Heberu 6:19) Lai bada negadia ai dogo ese bouti ia dogoatao auka, unai hegeregerena Baibel ese vaira nega totona ia gwauraia helaro be ita ia durua hari ita davaria noho hekwakwanai ita haheaukalaia totona. Iseda helaro ese lalomaino, moale, laloa maoromaoro karana bona helt ia durua.​—1 Tesalonika 5:8.