Taunimanima haida idia laloa, bema Dirava ena Hereva be idia haidaua. Peroveta tauna Isaia ia gwau, Dirava ena hereva be do ia “noho ela bona hanaihanai.” (Isaia 40:8) Edena bamona ita diba Dirava ena gwauhamata idauidau be idia torea maoromaoro?

Dirava be mai ena siahu ena Hereva ia gimaia totona, bona hadikaia gaudia amo ia koua diba. Idaunegai, imana amo idia torea kopi idia karaia neganai, revareva idia torea hanai taudia ese Baibel ena hereva ibounai idia duahia namonamo, unai amo idia diba hereva ta idia atoa kau lasi, haidaua, eiava kokia. To, taunimanima be goevadae lasi, bona revareva idia torea hanai taudia haida be edia hahanaia gaukarana ai kerere maragidia haida idia karaia diba.

Baibel ai idaunega maniuskrip ena kopi ibounai be tausen momo idia noho. Bema kopi ta be ia idau sisina, vadaeni kopi ma haida ida idia hahegeregerea diba hereva momokani idia torea totona.​—Diba ma haida abia totona, jw.org ai inai atikol, “Has the Bible Been Changed or Tampered With?” oi itaia.

Hegeregere, Bedouin taudia ese lagani 1947 ai, Mase Davara kahirakahira idia noho kohua (cave) ta lalonai, idaunegai toretoredia, Mase Davara Lokua Toretoredia unai, idia davaridia. Inai idaunega toretoredia ai lagani 2000 gunanai idia torea Baibel ena kahana haida idia noho. Diba bada taudia ese inai idaunega maniuskrip be hari ita gaukaralaidia Baibel ida idia hahegeregeredia. Dahaka idia davaria?

Diba bada taudia idia davaria hari Baibel ai idia noho herevadia be toretore korikoridia ida idia hegeregere. * Maniuskrip gunadia tahua namonamo karana ese ia hahedinaraia Baibel ai ita duahia herevadia be Dirava ena hereva. Ita diba momokani Dirava be ita totona Baibel ia gimaia namonamo.

Unai dainai, Dirava ena Hereva ita duahia neganai, ita abidadama henia bona ita diba momokani ia be maoromaoro. Dirava ena peroveta taudia amo Dirava dekenai dahaka ita dibaia do ita herevalaia.