Peroveta tauna Mose ia gwau, bema Dirava ena taravatu ita kamonai henia, Dirava ena hanamoa do ita abia. (Deuteronomi 10:13; 11:27) Dirava kamonai henia ena badina be iena panisia karana dekenai ita gari dainai lasi. To, Dirava ena kara namodia ese ita ia hagoadaia ia ita kamonai henia badina ia ita lalokau henia bona ita ura lasi ena lalona do ia hahisia gauna ta ita karaia. “Dirava ita lalokau henia ena anina be inai, iena taravatu ita badinaia, bona iena taravatu be idia metau lasi.”​—1 Ioane 5:3.

To edena dala ai Dirava kamonai henia karana amo ita do ia hanamoa? Mani inai dala rua ita laloa.

“Lau inai [Iehova], emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.”​—ISAIA 48:17.

Iehova Dirava, iseda Havaraia Tauna, be ita ia diba bona ita dekenai hakaua herevadia ia henia. Bema ita ura iena hadibaia dalana ese ita do ia durua abia hidi maorodia ita karaia totona, namona be Baibel amo Dirava ia ura dahaka do ita karaia ita dibaia bena ita ia hadibaia gaudia ita badinaia.

“Dirava ena hereva idia kamonai bona badinaia taudia be idia moale!”​—LUKA 11:28.

Hari inai negai, Dirava ena Hereva idia kamonai henia taunimanima milioni momo be moale korikori idia davaria. Hegeregere, Spain ai ia noho tau ta ena haheitalai mani ita laloa. Ia be badu haraga tauna bona ma haida ia dagedage henia​—iena hahine danu. Nega ta ia be peroveta tauna Mose ese Iakobo ena natuna mero, Iosepa ena manada karana dekenai ia torea sivaraina ia duahia. Iosepa be igui hesiai tauna bamona idia hoihoilaia bona idia samania koikoi dainai dibura ruma ai idia atoa; to, ia manada, manau bona edia dika ia gwauatao. (Genese, karoa 37-45) Unai Spain tauna ma ia gwau: “Iosepa ena haheitalai lau lalohadailaia karana ese lau ia durua manau, hebogahisi, bona sibona biagua karana lau hagoadaia totona. Unai dainai, hari egu mauri lau moalelaia.”

Baibel ese ma haida kara henia dalana ena hakaua herevadia momo ia henia. Atikol ma ta ai inai do ita herevalaia.