Tanobada ai mauri gaudia ibounai do idia mauri lasi bema dina ena diari be lasi. Dina ena diari ese au idauidau ia durua, raurau, flaoaflaoa, huahua bona uhe ia havaraia totona. Danu au idauidau be tano ai edia ramuna amo ranu idia abia daekau edia raurau dekenai bona kwalahu (o water vapor) bamona ia raka-lasi.

Medu be Dirava amo ia mai harihari gauna dainai, tano ia durua aniani ia havaraia ita ania totona. Dirava ese medu bona aniani momo negadia ia henia, vadaeni aniani momo ita abia bona iseda kudouna ia hamoalea.

Tamadia momo be edia famili totona aniani bona dabua abia karana dekenai idia lalohekwarahi bada. Mani Baibel ena hereva oi laloa, ia gwau: “Guba manudia umui itaia namonamo, idia be uhe idia hadoa lasi, idia geigei lasi bona haboua rumana dekenai aniani idia haboua lasi. To emui guba Tamana ese idia ia ubua. Umui ese idia umui hereaia, ani?”​—Mataio 6:25, 26.

“Tano ena flaoaflaoa edia tubu dalana mani umui itaia . . . To umui lau hamaoroa, Solomona ena hairai ibounai danu ese unai herahera gaudia edia hairai ia hereaia lasi. Dirava ese tano ena tubutubu gaudia ia hahairaia . . . Vadaeni umui abidadama maragimaragi taudia e, Dirava ese umui dekenai dabua do ia henia lasi, a?”​—Mataio 6:28-30.

Dirava be ita dekenai aniani bona dabua ia henia diba dainai, ia ese mauri durua gaudia ma haida do ia henia danu. Bema Dirava ena ura ita tahua, iseda aniani hadoa gaukarana ia hanamoa diba o ita ia durua moni gaukara ita davaria diba, unai amo iseda dabu gaudia ita hoia diba.​—Mataio 6:32, 33.

Momokani, mai iseda badina namona dainai Dirava ita lalokau henia badina dina, medu, manu bona flaoaflaoa idauidau ia henia. Atikol ma ta ai eda Havaraia Tauna be taunimanima ida ia herevahereva dalana do ia herevalaia.