Iseda Havaraia Tauna ese taunimanima ia havaraia negana amo, aneru bona peroveta tatau bona hahine ia gaukaralaidia, taunimanima ia hereva henia totona. Danu, ia ura ena hereva bona ia gwauhamatalaia hahenamodia be Baibel ai idia torea diho. Dirava ena gwauhamata idauidau ese vaira negana ai ita dekenai moale ia henia diba. To, hari Dirava ena gwauhamata idauidau be edeseniai oi davaria diba?

Dirava ena hereva ita dekenai be Toretore Helagadia lalonai idia noho. (2 Timoteo 3:16) Edena dala ai Dirava ese peroveta taudia ia gaukaralaia ena hereva idia torea totona? (2 Petero 1:21) Dirava ese ena lalohadai be Baibel idia torea taudia edia lalona dekenai ia atoa, bena idia ese ena hereva idia torea diho. Unai be bisinesi tauna ena haheitalai hegeregerena. Ia be seketere tauna ta ia gaukaralaia, ia gwauraia hereva ia torea totona, ita gwau diba seketere ia torea herevana be bisinesi tauna ena hereva. Unai hegeregerena, ena be Dirava ese taunimanima ia gaukaralaidia ena hereva idia torea totona, to ia be Toretore Helagadia ia Torea Tauna.

Dirava ena hereva be mai anina bada dainai, ia ura taunimanima ibounai ese idia duahia bona lalopararalaia be namo. Hari, ena “noho hanaihanai sivarai namona” be “bese ibounai bona iduhu ibounai, gado idauidau, bona kopi idauidau taudia ibounai” ese idia kamonaia diba. (Apokalupo 14:6) Dirava ese Baibel ia hanamoa dainai, hari ena kahana ibounai o haida sibona be gado 3,000 mai kahana idia noho, tanobada ena buka momo amo ia idau.