1. Edena dala ai Keristani taudia be au ta ida ita hahegeregerea diba? (Laulau itaia danu.)

 “LAI lalonai ia davea lao davea mai auna be do ia makohia lasi.” Unai aonega herevana ese ia hahedinaraia au haida be lai ia toa goada neganai, idia marere to idia makohia haraga lasi. Ita danu bema iseda mauri ai metau ita davaria, ita lalomanoka lasi to namona be ita laloa maoromaoro unai amo mai moale ida Iehova do ita hesiai henia noho. Edena dala ai? Laloa maoromaoro karana ita hahedinaraia, bema iseda mauri dekenai idia vara gaudia ita abia dae bona danu ma haida edia lalohadai bona disisen ita matauraia.

2. (a) Iseda mauri dekenai idia vara gaudia ita abia dae totona, dahaka kara ese ita do idia durua? (b) Inai stadi ai dahaka do ita herevalaia?

² Ita be Iehova ena hesiai taudia dainai, ita laloa maoromaoro be gau badana. Danu, manau bona hebogahisi karadia do ita hahedinaraia. Inai stadi ai, Keristani taudia haida be hekwakwanai idia davaria neganai, unai kara ese idia ia durua dalana do ita herevalaia. Danu, unai kara ese ita do idia durua diba dalana do ita herevalaia. To, Iehova bona Iesu edia laloa maoromaoro karana goevadaena mani ita herevalaia guna.

3. Dahaka ese ia hamomokania Iehova be laloa maoromaoro Diravana?

³ Baibel ia hahedinaraia Iehova be “Nadi Badana” badina ia gini goada bona ena kara ia haidaua lasi. (Deu. 32:4) To, ia laloa maoromaoro danu. Inai tanobada ia dika ia lao noho lalonai, Iehova be idia vara gaudia ia abia dae bona ia gaukara goada ia gwauhamatalaia gaudia ia hagugurua totona. Iehova ese  ita be iena toana hegeregerena ia karaia, unai dainai iseda noho dalana ia idau neganai, ita laloa maoromaoro diba. Herevana dahaka hekwakwanai ita davaria, to Baibel ai ita davaria hakaua herevadia ese ita do ia durua disisen maorodia ita karaia totona. Iehova ena haheitalai bona ena hakaua herevadia amo ita diba ena be Ia be “Nadi Badana,” to ia be laloa maoromaoro Diravana danu.

4. Iehova ena laloa maoromaoro karana ta herevalaia. (Levitiko 5:7, 11)

⁴ Iehova ena dala be goevadae bona maoromaoro, bona ia be taunimanima ia kara auka henidia lasi. Hegeregere, Iehova ese Israela taudia dekenai laloa maoromaoro karana ia hahedinaraia dalana ta mani ita laloa. Iehova be ogogami eiava taga taudia dekenai boubou gauna tamona do idia henia ena taravatu ia atoa lasi. To, idia dekenai ia noho gauna hegeregerena idia henia boubou gauna ia abia dae.​—Levitiko 5:7, 11 duahia.

5. Iehova ena manau bona hebogahisi karana ta herevalaia.

⁵ Iehova be manau bona hebogahisi tauna dainai, laloa maoromaoro karana ia hahedinaraia. Hegeregere, Iehova be Sodoma ai kara dika taudia ia hadikaia gwauraia neganai, manau karana ia hahedinaraia. Iehova be ena aneru rua amo kara maoromaoro tauna, Lota ia hamaoroa ororo gabudia dekenai do ia heau lao totona. Lota be ia gari unuseniai ia lao totona. Unai dainai, Iehova ia noia bema ia bona ena famili be do Ia hadikaia taoni maragina, Soara tanona dekenai do idia lao. Reana, Iehova ia gwau diba, Lota ese ena hadibaia herevana do ia badinaia sibona. To unai ia karaia lasi. Iehova be Lota ena noinoi ia kamonai bona Soara tanona ia hadikaia lasi. (Gen. 19:18-22) Lagani momo murinai, Iehova ese Nineva taudia dekenai hebogahisi ia hahedinaraia. Ia ese peroveta tauna Iona ia siaia Nineva taudia bona edia siti do ia hadikaia ena hadibaia herevana ia harorolaia totona. To Nineva taudia idia helalo-kerehai neganai, Iehova be idia ia hebogahisi henia bona siti ia hadikaia lasi.​—Iona 3:1, 10; 4:10, 11.

6. Iesu ese Iehova ena laloa maoromaoro karana ia tohotohoa daladia haida mani oi herevalaia.

⁶ Iesu ese Iehova ena laloa maoromaoro karana ia tohotohoa. Tanobada dekenai Iehova ese ia siaia “Israela besena ena boio mamoe” ia haroro henia totona. To taunimanima ia haroro henia neganai, laloa maoromaoro karana ia hahedinaraia. Nega ta, idau bese hahinena ta ena natuna kekeni be “demoni ese ia biagua” dainai, Iesu ia noia ena natuna ia hanamoa totona. Iesu be mai hebogahisi ida ena noinoi ia kamonai bona ena natuna kekeni ia hanamoa. (Mat. 15:21-28) Mani haheitalai ma ta ita laloa. Iesu ena haroro gaukara ia matamaia neganai, ia gwau: “Taunimanima vairanai lau ia gwauraia hedinarai lasi tauna, be . . . , do lau gwauraia hedinarai lasi.” (Mat. 10:33) Ena be Petero be nega toi Iesu ia gorea, to Iesu be Petero ia dadaraia lasi. Iesu ia diba Petero be abidadama tauna bona ia karaia karana dainai ia lalohisihisi bada. Iesu ia toreisi lou  murinai, Petero dekenai ia hamomokania iena dika ia gwauatao bona ia lalokau henia.​—Luka 24:33, 34.

7. Filipi 4:5 hegeregerena, ita ura taunimanima ese edena bamona ita do idia laloa?

⁷ Ita itaia Iehova Dirava bona Iesu Keriso be laloa maoromaoro taudia. To, ita be edena bamona? Iehova ia ura taunimanima ese iseda laloa maoromaoro karana do idia itaia. (Filipi 4:5 duahia.) Sibona do ita nanadaia: ‘Haida idia laloa lau be laloa maoromaoro, ma haida edia ura lau abia dae bona haida edia kara lau haheaukalaia tauna, a? Eiava lau be kara auka bona haida edia hemami lau laloa lasi tauna, a? Eiava haida lau doria egu ura hegeregerena gaudia do idia karaia totona, a? Bema dala ia noho, haida edia lalohadai lau kamonai henia bona lau abia dae, a?’ Bema laloa maoromaoro karana ita habadaia, ita hahedinaraia Iehova bona Iesu ita tohotohoa noho. Mani laloa maoromaoro ita hahedinaraia daladia rua ita herevalaia: (1) Iseda noho dalana ia idau neganai, bona (2) ma haida edia lalohadai bona disisen be iseda amo ia idau neganai.

8. Iseda noho daladia idia idau neganai, dahaka ese ita do ia durua ita laloa maoromaoro totona? (Futnout itaia danu.)

⁸ Laloa maoromaoro ita hahedinaraia diba, bema iseda noho dalana ia idau bona senisi haida do ita karaia. Iseda noho dalana ia idau neganai, unai ese hekwakwanai matamata ia havaraia diba. Hegeregere, reana gorere badana ta ita davaria, iseda moni ia ore, eiava gavamani ia senisi dainai hekwakwanai haida idia vara. (Had. 9:11; 1 Kor. 7:31) Danu, iseda hesiai gaukara ai asainmen idia haidaua karana ese ita ia tohoa diba. Herevana dahaka hahetoho idia vara, noho dalana matamatana ita manadalaia diba bema inai dala foa ita badinaia: (1) ia vara gauna oi abia dae, (2) vaira negana oi laloa, (3) idia vara gau namodia oi moalelaia, bona (4) ma haida oi durua. b Mani unai dala idia badinaia tadikaka taihu haida edia sivarai ita herevalaia.

9. Misinari headava tau bona hahine ese edena dala ai idia vara kava hekwakwanai idia haheaukalaia?

⁹ Ia vara gauna oi abia dae. Emanuele bona Francesca be idau tano dekenai idia siaia misinari gaukara idia karaia totona. Edia asainmen matamata dekenai kongrigeisen tadikaka taihu idia hedavari henidia bona edia gado idia dibaia lalonai, COVID-19 gorerena ia vara dainai, kongrigeisen idia bamoa diba lasi. Bena daudau lasi, Francesca ena sinana ia mase. Francesca ia ura dikadika ena famili ia itaia, to pendemik dainai ia lao diba lasi. Dahaka ese ia durua unai ia haheaukalaia totona? Ginigunana be Emanuele bona Francesca be aonega totona idia guriguri, unai amo dina ta ta ena hekwakwanai idia haheaukalaia diba. Iehova ese nega maorona ai ena orea amo edia guriguri ia haerelaia. Hegeregere, tadikaka ta ena intaviu ese idia ia hagoadaia, ia gwau: “Karaharaga noho dala matamatana ita abia dae neganai, do ita gaukara goada unai noho dalana ita manadalaia bona do ita moale.” c Iharuana be edia telefon haroro gaukara idia hanamoa bona Baibel stadi ta idia matamaia. Ihatoina be tadikaka taihu edia hagoadaia herevadia bona heduru idia abia dae. Hebogahisi ia hahedinarai taihu ta be lagani tamona lalonai, dina ta ta ai idia dekenai teks mesiji kwadogina mai ena Baibel siri ta ia siaia. Oibe, iseda noho dala matamatana ita abia dae neganai, ita karaia gaudia amo moale do ita davaria.

10. Edena dala ai ia vara gauna ta ese taihu ta ena mauri ia haidaua?

 ¹⁰ Vaira negana oi laloa bona idia vara gau namodia oi moalelaia. Japan ai ia noho Romania taihu ta ladana Christina ia moale lasi, badina ia lao henia English kongrigeisen idia koua. To, unai ia laloa momo lasi. Ia be abia hidi ia karaia Japan gado kongrigeisen do ia lao, bona ia gaukara goada Japan gado ai ia haroro totona. Guna, ia ida ia gaukara hahinena ia noia Japan gado ia hadibaia totona. Bona unai hahine ia lalotamona Baibel bona Mauri Moalelaia Hanaihanai! buklet do ia gaukaralaia. Unai dainai Christina be Japan gado ia diba namonamo, bona moale gauna be unai hahine ia ura hereva momokani ia dibaia. Oibe, ena be iseda noho dalana ia idau, to bema vaira negana ita laloa bona lalohadai namodia ita abia, hahenamo momo ita davaria diba.

11. Dahaka ese tadikaka ta mai ena adavana ia durua moni ena hekwakwanai idia haheaukalaia totona?

¹¹ Ma haida oi durua. Iseda gaukara idia taravatua tanona ai tadikaka ta mai ena adavana be moni ena hekwakwanai idia davaria, badina gavamani be mai ena abitorehai momo. Edena dala ai edia noho dalana idia haidaua? Dala ginigunana be kohu momo lasi maurina idia noholaia. Dala iharuana be edia hekwakwanai idia laloa momo lasi, to nega bada idia gaukaralaia haroro gaukara ai ma haida idia durua totona. (Kara 20:35) Tadikaka ia gwau: “Haroro gaukara dekenai ai bisi dainai emai hekwakwanai ai laloa momo lasi, to nega bada ai henia Dirava ena ura ai karaia totona.” Iseda noho dalana ia idau neganai, namona be haroro gaukara ai ma haida durua karana do ita laloa bada.

12. Edena dala ai aposetolo Paulo ena haheitalai ese ita ia durua haroro daladia idauidau ita gaukaralaia totona?

¹² Haroro gaukara ai dala idauidau ita tohoa be namo. Bese idauidau taudia ita davaria bona edia lalohadai Dirava dekenai be idauidau danu. Aposetolo Paulo ena haheitalai ita tohotohoa diba, ia be haroro daladia idauidau ia gaukaralaia. Iesu ese Paulo ia abia hidi “idau bese taudia edia aposetolo tauna” ai ia lao totona. (Roma 11:13) Unai dainai, Paulo be Iuda taudia, Grik taudia, diba bada taudia, hanua taudia, gavamani taudia bona lohia taudia ia haroro henidia. Paulo be ‘gau ibounai ia karaia’ edia lalona ia veria totona. (1 Kor. 9:19-23) Ia haroro henia taudia edia hanua, noho dalana bona idia abidadama henia gaudia ia laloa. Unai amo idia ta ta edia lalona ia veria dalana ai ia haroro henidia. Ita danu ese iseda haroro dalana ita hanamoa diba, bema taunimanima edia noho dalana ita laloa bona ita durua diba dalana ai ita haroro henidia.

13. Korinto Ginigunana 8:9 hegeregerena, ma haida edia lalohadai ita matauraia totona, edena kara do ita dadaraia?

¹³ Laloa maoromaoro karana ese ita do ia durua danu ma haida edia lalohadai ita matauraia totona. Hegeregere, iseda taihu haida idia ura edia vairana idia penia, to ma haida idia ura lasi. Keristani taudia haida be alkahol sisina idia inua, to haida be idia dadaraia momokani. Keristani taudia ibounai idia ura lasi idia gorere, to idia ta ta ese edia tauanina naria dalana idauidau idia abia hidi. Bema hanaihanai ita laloa gau ibounai ita karaia be maoro bona kongrigeisen taudia ita doria unai idia badinaia, idia ita hahekwakwanaia bona kongrigeisen ia parara diba. Ita ura lasi unai ia vara! (1 Korinto 8:9 duahia; 10:23, 24) Ita laloa maoromaoro bona maino ita habadaia totona, mani hakaua herevadia rua ita herevalaia.

14. Edena hakaua herevadia ese ita do idia durua dabua bona huina sitaelo maorona ita abia hidi totona?

¹⁴ Dabua bona huina sitaelo. Iehova ese  dabua hahedokilaia karana dekenai taravatu aukana ta ia atoa lasi, to ita dekenai hakaua herevadia ia henia ita badinaia totona. Namona be mai laloa maoromaoro bona “mai hemataurai ida,” Dirava do ia hanamoa dabua ita karaia. (1 Tim. 2:9, 10; 1 Pet. 3:3) Unai amo, iseda dabua ena toana dainai taunimanima be ita do idia raraia noho lasi. Danu, Baibel ena hakaua herevadia ese elda taudia do ia durua dabua bona huina sitaelo dekenai sibodia edia taravatu idia atoa lasi totona. Hegeregere, kongrigeisen ta ai elda taudia ese tanobada taudia edia huina sitaelo idia tohotohoa tadikaka matamata haida idia durua. Edena dala ai idia ese taravatu ta idia atoa lasi, to tadikaka matamatadia idia durua? Sekit naria tauna ese elda taudia ia hamaoroa tadikaka matamata do idia hadibadia: “Bema platfom ai tok oi henia bona helai taudia be emu toana sibona idia raraia, to emu tok idia laloa bada lasi, anina be emu dabua bona toana be ia maoro lasi.” Unai hereva amo, elda taudia be tadikaka matamata idia durudia bona taravatu idia atoa lasi. d

15. Gorere hanamoa dalana ta ita abia hidi totona, edena taravatu bona hakaua herevadia ese ita idia durua diba? (Roma 14:5)

¹⁵ Tauanina naria dalana. Keristani taudia ta ta ese abia hidi idia karaia diba sibodia edia tauanina idia naria totona. (Gal. 6:5) Keristani taudia idia ura medikol heduru ta idia abia hidi neganai, Baibel ena taravatu rara bona meamea dekenai idia badinaia be maoro. (Kara 15:20; Gal. 5:19, 20) To, medikol heduru ma haida dekenai sibodia totona abia hidi idia karaia diba. Tadikaka taihu haida be hospital dekenai heduru idia tahua, to haida be heduru daladia idauna idia abia hidi. Ena be ita diba momokani gorere hanamoa dalana ta be namo eiava ta be dika, to namona be tadikaka taihu  ese idia abia hidi dalana ita matauraia. Namona be inai point foa ita laloatao: (1) Dirava ena Basileia sibona ese gorere ibounai do ia haorea momokani. (Isa. 33:24) (2) Namona be Keristani taudia ta ta do idia “diba momokani” edia gorere hanamoa totona idia abia hidi dalana be maoro. (Roma 14:5 duahia.) (3) Ita ura lasi ma haida idia karaia abia hidi dainai, ita hahemaoro henia eiava gau ta ita karaia idia ita hahekwakwanaia totona. (Roma 14:13) (4) Keristani taudia idia diba sibodia edia lalohadai idia badinaia be gau badana lasi, to kongrigeisen lalonai lalokau bona maino idia habadaia be gau badana. (Roma 14:15, 19, 20) Bema unai point foa ita laloatao, kongrigeisen lalonai tadikaka taihu ida do ita hetura namonamo bona maino do ia noho.

16. Edena dala ai elda taudia ese ta ta dekenai laloa maoromaoro karana idia hahedinaraia diba? (Laulau itaia danu.)

¹⁶ Namona be elda taudia be laloa maoromaoro karana dekenai haheitalai namona idia hahedinaraia. (1 Tim. 3:2, 3) Hegeregere, namo lasi elda tauna ta ia laloa ena mauri lagani be bada dainai, hanaihanai ena lalohadai do idia badinaia. Ia laloparara Iehova ena lauma helaga ese elda oreana ai elda ta ia gaukaralaia diba lalohadai namona ta ia hahedinaraia totona, unai amo idia ese disisen maorona idia karaia diba. Danu bema elda taudia momo ese Baibel ena hakaua herevana ta ia utua lasi disisen ta idia karaia, ia laloa maoromaoro elda tauna be mai lalonamo ida unai disisen do ia abia dae, ena be unai be ena ura lasi.

17. Dahaka hahenamo do ita moalelaia bema laloa maoromaoro karana ita hahedinaraia?

¹⁷ Laloa maoromaoro karana ita hahedinaraia neganai, hahenamo momo do ita davaria. Iseda tadikaka bona taihu do ita tura henidia namonamo, bona kongrigeisen lalonai maino do ia noho. Ita moale badina Iehova ena orea lalonai taunimanima mai edia kara bona noho daladia idauidau ita bamoa bona lalotamona ai ita noho. To, gau badana be iseda laloa maoromaoro Diravana, Iehova, ita tohotohoa.