Manau taudia be ma haida idia matauraia. Idia hekokoroku lasi, eiava idia laloa lasi ma haida ese do idia lalodia bada. To, manau tauna be ma haida ia laloa bada bona ia ura idia amo diba ia abia.

Haida idia laloa manau tauna be ia hegeregere lasi, gau ta karaia totona. To unai be momokani lasi, badina manau karana ese ta ia durua ena kerere ia lalopararalaia bona ia karaia diba lasi gaudia ia dibaia.

• Manau karana ese hetura karana ia hagoadaia. Buka ta ladana, The Narcissism Epidemic ia gwau: “Manau taudia be momo ese idia tura henidia diba.” Ma ia gwau, idia be “taunimanima idauidau ida idia herevahereva bona hetura namonamo diba.”

• Manau karana ese emu natuna ena vaira nega maurina ia durua diba. Manau karana ese emu natuna do ia durua hari bona vaira nega ai​—hegeregere, moni gaukara ia tahua neganai. Doketa ta ladana, Leonard Sax, ia gwau: “Bema matamata tauna ta be sibona ia laloa bada bona ia karaia diba lasi gaudia ia lalopararalaia lasi, reana moni gaukara totona idia karaia intaviu dekenai do ia kwalimu lasi. To, bema ia ese intaviu tauna ena hereva ia laloa bada, reana unai moni gaukara do ia abia diba.” a

Emu natuna oi durua sibona ia laloa bada lasi totona.

BAIBEL ENA HAKAUA HEREVANA: “Bema ta ia laloa ia be mai anina bada, to momokani ia be anina lasi, ia be sibona ia koia noho.”​—Galatia 6:3.

• Anina lasi herevadia gwauraia loulou lasi. Inai bamona herevadia hegeregere, “Oi ura henia gaudia ibounai do oi abia diba” bona “Oi ura henia gaukara oi abia diba” ese natudia ia hamoalea diba, to nega momo unai gaudia be idia vara momokani lasi. Emu natudia do idia kwalimu diba bema tahua gaudia idia atoa bona idia gaukara goada unai gaudia idia hagugurua totona.

• Edia kara namodia dainai idia oi hanamoa. Bema emu natudia oi hamaoroa idia be “hereadae,” unai ese idia do ia durua lasi manau karana idia hahedinaraia totona. Namona be edia kara namona ta dainai oi hanamodia.

• Intanet gaukaralaia karana dekenai nega idia gaukaralaia namonamo. Nega momo, intanet dekenai taunimanima be sibodia edia ladana  idia abia isi​—hegeregere ta be ena diba eiava ia hagugurua gaudia do ia hahedinaraia​—to unai be manau karana lasi.

• Emu natuna oi durua sori herevana ia gwauraia. Emu natuna oi durua ena kerere ia lalopararalaia bona ia gwauraia hedinarai totona.

Tanikiu karana hahedinaraia.

BAIBEL ENA HAKAUA HEREVANA: “Tanikiu karana do umui hahedinaraia.”​—Kolose 3:15.

• Havaraia gaudia laloa bada. Namona be natudia ese havaraia gaudia idia laloa bada bona idia laloparara unai gaudia ese iseda mauri idia durua. Ita ese hodahoda, ranu bona aniani ita abia be namo. Unai haheitalai oi gaukaralaia unai amo natudia ese Havaraia Tauna bona ia karaia gau namodia do idia laloa bada.

• Taunimanima laloa bada. Emu natuna oi hadibaia gau haida dekenai ma haida ese iena diba idia hereaia, unai dainai ia mama lasi to idia amo diba ia abia be namo.

• Tanikiu karana hahedinaraia. Emu natudia oi hadibaia mai edia lalona ibounai ida tanikiu herevana idia gwauraia. Tanikiu karana ese ita ia durua ita manau totona.

Emu natudia oi hadibaia ma haida durua karana be mai ena namo.

BAIBEL ENA HAKAUA HEREVANA: “Mai manau ida do umui laloa ma haida ese umui idia hereaia, umui sibona emui namo do umui laloa lasi, to ma haida edia namo danu do umui laloa.”​—Filipi 2:3, 4.

• Emu natuna oi durua ruma gaukaradia ia karaia totona. Bema emu natuna oi koua ruma gaukaradia ia karaia lasi totona, do ia laloa ruma gaukaradia be mai anina bada lasi. Namona be ruma gaukaradia ia karaia guna, gabeai ia gadara. Oi hadibaia ruma gaukaradia ia karaia neganai, ia be ruma taudia ia durua bona unai kara dainai ma haida ese ia do idia hanamoa bona matauraia.

• Oi hahedinaraia ma haida durua karana be mai ena namo. Ma haida durua karana ese natudia ia durua diba taunimanima badadia bamona idia kara totona. Unai dainai emu natuna oi hadibaia heduru idia ura abia taudia ia tahua bona durua. Ma haida durua totona, ia karaia diba gaudia umui herevalaia hebou. Unai ia karaia neganai namona be ia oi hanamoa bona durua.