1, 2. Pasova ia ore murinai, Iesu be dahaka ia karaia?

 NISAN 14, 33 C.E. hanuaboina ai, Iesu be ena aposetolo taudia 12 ida Pasova aria ginigabena ia karaia. Unai aria idia karaia neganai, idia be Dirava ese Aigupito amo edia sene taudia ia hamauria karana idia laloa. To, Dirava ese Iesu ena hahediba taudia be do ia “hamauria ela bona hanaihanai.” Kerukeru dabai (unai be do Nisan 14) edia Gunalaia Tauna, Iesu be ena inai taudia ese do idia hamasea. To, unai kara dikana amo hahenamo badana ta do ia vara. Iesu ena rara ese taunimanima be kara dika bona mase amo do ia ruhaia.—Heb. 9:12-14.

² Unai hahenamo ita laloatao totona, Iesu ese lagani ta ta ai do ita karaia aria ta ia hamatamaia. Unai aria ese Pasova ariana ena gabu ia abia. Iesu ese hatubua lasi paraoa ia makohia bona ena aposetolo taudia 11 dekenai ia henia, bena ia gwau: “Inai be egu tauanina ia laulaulaia, umui totona do lau henia. Inai bamona do umui karaia noho lau umui laloatao totona.” Unai hegeregerena, wain ena kapusi ia abia bona ia gwau: “Inai kapusi ese kontraka matamatana ia laulaulaia, egu rara dainai ia vara bona umui totona do ia bubua.”—Luka 22:19, 20.

3. (a) Iesu ia mase murinai dahaka ia vara? (b) Iesu ena guriguri Ioane karoa 17 ai ita laloa neganai, edena henanadai ita lalodia be namo?

³ Dirava ese Israela besena ida ia karaia Taravatu kontraka gunana be kahirakahira do ia ore. Bona Iehova ese Iesu ena horoa tadikaka ida ia karaia kontraka matamatana ese ena gabu do ia abia. Iesu ia ura lasi horoa oreana be Israela besena bamona do idia karaia. Israela besena be edia mauri bona tomadiho dalanai idia lalotamona lasi dainai, Dirava ena ladana helagana idia hadikaia. (Ioa. 7:45-49; Kara 23:6-9) Iesu ia ura ena horoa  tadikaka be do idia lalotamona, unai amo do idia gaukara hebou bona Dirava ena ladana do idia imodaia. Vadaeni, Iesu be dahaka ia karaia? Ia ese Iehova dekenai guriguri hereadaena ta ia gwauraia. (Ioa. 17:1-26; laulau ginigunana itaia.) Unai guriguri ita laloa neganai, namona be sibona ita nanadaia: “Dirava ese Iesu ena guriguri ia haerelaia vadaeni, a? Lau be Iesu ena guriguri hegeregerena lau kara, a?”

4, 5. (a) Iesu ena guriguri matamana amo dahaka ita dibaia? (b) Edena dala ai Iehova ese Iesu ena guriguri ia haerelaia?

⁴ Iesu be iena hahediba taudia dekenai Dirava amo ia mai diba ia hadibadia ela bona hanuaboi momokani. Bena guba ia itaia bona ia guriguri: “Tamagu e, nega be ia ginidae vadaeni, emu natuna oi hanamoa, unai amo emu natuna ese oi do ia hanamoa diba, vadaeni oi ese ia dekenai taunimanima ibounai biagua siahuna oi henia hegeregerena, ia danu ese taunimanima ibounai dekenai, oibe, ia dekenai oi henia taudia dekenai, mauri hanaihanai ia henia diba. . . . Tanobada dekenai oi lau hanamoa bona lau dekenai oi henia gaukarana lau karaia haorea vadaeni. Vadaeni Tamagu e, tanobada ia do noho lasi neganai oi badinai lau noho bona lau abia hairaina be mani lau dekenai oi henia.”—Ioa. 17:1-26.

⁵ Unai guriguri matamanai, Iesu ese ia laloa bada gaudia ia gwauraia. Ginigunana be, iena guba Tamana ia hanamoa, bona ena hahediba taudia ia hadibaia gurigurina lalonai unai ia gwauraia danu. Ia gwau: “Tamana e, namona be ibounai ese oiemu ladana do idia hahelagaia.” (Luka 11:2) Iharuana be, ena hahediba taudia dekenai ‘mauri hanaihanai do ia henia.’ Unai murinai Iesu be sibona ena ura gauna ta totona ia guriguri, ia gwau: “Tamagu e, tanobada ia do noho lasi neganai oi badinai lau noho bona lau abia hairaina be mani lau dekenai oi henia.” Iehova be ena Natuna ese ia gurigurilaia gaudia bona ma gau haida ia henia. Oibe, Dirava ese Iesu dekenai ia henia ladana ese aneru ibounai “edia ladana ia hereaia momokani.”—Heb. 1:4.

6. Aposetolo taudia be mauri hanaihanai idia abia totona, dahaka idia karaia be namo? Bona edena dala ai ita diba unai idia karaia?

⁶ Iesu ena guriguri lalonai, ita ese mauri hanaihanai abia totona do ita karaia gaudia ia gwauraia danu. (Ioane 17:3 duahia.) Ia gwau namona be Dirava bona Keriso dekenai ‘diba do ita abia noho.’ Unai ita karaia dalana ta be duahiduahi bona kamonai karana amo. Dala ma ta be ita dibaia gaudia be eda mauri lalonai ita badinaia. Aposetolo taudia be unai dala rua idia badinaia dainai Iesu ia guriguri neganai, ia gwau: “Lau dekenai oi henia hereva ibounai be idia dekenai lau henia, bona idia ese idia abia.” (Ioa. 17:8) To, mauri hanaihanai idia abia totona, namona be hanaihanai Dirava ena Hereva idia laloa dobu, bona edia mauri dinadia lalonai idia badinaia. Aposetolo taudia be unai bamona idia karaia, a? Oibe. Unai ita diba badina, idia ta ta edia ladana be guba ena Ierusalema Matamata ena badina nadidia 12 latanai idia koroa, bona do idia noho ela bona hanaihanai.—Apok. 21:14.

7. Dirava dekenai ‘diba do ita abia noho’ ena anina be dahaka? Bona dahaka dainai unai be mai anina bada?

⁷ Bema ita ura ita mauri hanaihanai, namona be Dirava dekenai ‘diba do ita abia noho,’ eiava ia do ita dibaia noho. To, Iehova ena kara bona ura ita dibaia sibona be hegeregere lasi. Namona be Ia bona eda tadikaka taihu ita lalokau henidia bona tura henidia. Baibel ia gwau: “Lalokau  ia hahedinaraia lasi tauna be Dirava ia diba lasi.” (1 Ioa. 4:8) Danu, Dirava ita dibaia ena anina ma ta be ia do ita badinaia. (1 Ioane 2:3-5 duahia.) Iehova ita dibaia be hahenamo badana ta! To ita ura lasi Iuda Iskariote bamona, eda hetura karana namona Iehova ida ita haboioa. Namona be ita gaukara goada unai hetura karana ita hagoadaia totona. Unai bamona ita karaia neganai, do ita hegeregere mauri hanaihanai ita abia totona.—Mat. 24:13.

8, 9. Iesu be tanobada ai ia noho neganai dahaka ia laloa bada, bona edena sene karana ia dadaraia?

⁸ Iesu ena guriguri Ioane karoa 17 ai ita duahia murinai, ita gwau diba Iesu be iena aposetolo taudia sibona lasi, to ita ibounai danu ia lalokau henia. (Ioa. 17:20) Danu, namona be ita laloparara, Iesu be ita ia hamauria dalana sibona ia laloa lasi. To, ena tanobada maurina ibounai lalonai ia laloa bada gauna be ena Tamana ena ladana do ia hahelagaia bona hanamoa. Hegeregere, Nasareta ena sinagoga lalonai, Iesu be ena gaukara ia herevalaia neganai, Isaia ena lokua toretore ia kehoa bona ia duahia. Ia gwau: “Iehova ena lauma be lau latanai ia noho, badina lau ia horoa, ogogami taudia dekenai sivarai namona do lau gwauraia.” Momokani, Iesu be unai siri ia duahia neganai, Dirava ena ladana ia gwauraia hedinarai goevagoeva.—Luka 4:16-21.

⁹ Iesu be tanobada ia do mai lasi neganai, Iuda tomadiho gunalaia taudia be edia sene herevadia hegeregerena, taunimanima idia koua Dirava ena ladana do idia gaukaralaia lasi. To, ita diba Iesu be unai sene karana ia dadaraia. Badina tomadiho gunalaia taudia dekenai, ia gwau: “Lau be egu Tamana ena ladanai lau mai, to lau umui abia dae lasi. To bema ta be sibona ena ladanai ia mai, unai tauna do umui abia dae.” (Ioa. 5:43) Iesu be ena mase dinana ia kahirakahira neganai, guriguri ta amo ia laloa bada gauna ia hahedinaraia. Ia gwau: “Tamagu e, emu ladana oi hanamoa.” (Ioa. 12:28) Unai dainai, hari ita stadilaia guriguri lalonai ita itaia Iesu be iena Tamana ena ladana hanamoa karana ia laloa bada.

10, 11. (a) Edena dala ai Iesu ese Tamana ena ladana be ma haida dekenai ia hadibaia? (b) Dahaka dainai Iesu ena murinai idia raka taudia be ma haida dekenai Iehova ena ladana idia harorolaia?

 ¹⁰ Iesu ia guriguri, ia gwau: “Tanobada amo lau dekenai oi henia taudia dekenai oiemu ladana lau gwauraia hedinarai vadaeni. Idia be oiemu, bona lau dekenai oi henia, bona idia ese emu hereva idia badinaia. Danu, lau be tanobada dekenai lau noho lasi, to idia be tanobada dekenai idia noho bona lau be oi dekenai do lau mai. Tamana Helagana e, oiemu ladana, lau dekenai oi henia gauna dainai idia do oi gimaia, unai amo do idia tamona, ita ruaosi ita tamona bamona.”—Ioa. 17:6, 11.

¹¹ Iesu be iena hahediba taudia dekenai ena Tamana ena ladana gwauraia dalana ia hadibaia sibona lasi. To, idia ia durua unai ladana ena anina do idia lalopararalaia. Hegeregere, idia dekenai Dirava ena kara namodia bona ita ia kara henia dalana ia hadibaia. (Eso. 34:5-7) Hari, ia be guba dekenai ia lohia noho, bona ia ese ena murinai idia raka taudia ia durua Iehova ena ladana be tanobada hegegemadai idia harorolaia totona. Dahaka dainai unai idia karaia? Badina idia ura inai tanobada dokona ia do ginidae lasi lalonai, taunimanima momo do idia durua Iehova idia dibaia totona. Unai murinai, Iehova ese ena ladana idia harorolaia taudia do ia hamauria bona iena ladana do ia abia isi!—Ese. 36:23.

12. Iesu ese ia hamatamaia gaukarana ita hagugurua totona, dahaka gaudia toi ita karaia be namo?

¹² Iesu be tanobada ai ia noho neganai, ena aposetolo taudia ia durua edia manoka gaudia idia hanaia totona. Unai be mai anina bada idia dekenai, badina unai amo idia ese Iesu ia hamatamaia gaukarana do idia hagugurua. Iesu ia guriguri, ia gwau: “Oi ese tanobada dekenai lau oi siaia mai hegeregerena, lau danu ese tanobada dekenai idia lau siaia lao.” Unai gaukara idia hagugurua totona, Iesu ese ia herevalaia mai anina bada gaudia toi idia karaia be namo. Ginigunana be, ia guriguri ena hahediba taudia be Satani ena tanobada amo do idia gini siri. Iharuana be, ia guriguri Dirava ena Hereva do idia badinaia bona do idia helaga. Ihatoina be, ia guriguri do idia lalotamona, ia bona ena Tamana idia lalotamona hegeregerena. Namona be ita sibona eda kara ita tahua bona ita henanadai: ‘Lau be Iesu ese ia gwauraia mai anina bada gaudia toi lau badinaia noho, a?’ Iesu ia diba bema ena hahediba taudia be unai gaudia toi idia badinaia, idia harorolaia sivaraina be taunimanima ese do idia abia dae.—Ioane 17:15-21 duahia.

13. Edena dala ai aposetolo edia negai, Iehova ese Iesu ena guriguri ia haerelaia?

¹³ Kara bukana ita stadilaia neganai, do ita itaia Iehova ese Iesu ena guriguri ia haerelaia. Aposetolo edia negai idia noho Keristani taudia be Iuda taudia, Idau Bese Taudia, taga taudia, ogogami taudia, igui hesiai taudia bona igui hesiai taudia edia biagudia, unai dainai hepapahuahu ia vara diba. To, idia ibounai be idia lalotamona, hegeregere tauanina ena kahana idauidau idia gaukara hebou namonamo, bona edia kwarana be Iesu. (Efe. 4:15, 16) Momokani, Satani ena heiriheiri tanobadana lalonai, unai be hoa gauna! To, namona be Iehova ita hanamoa, badina ena lauma helaga siahuna amo unai ibounai ia havaraia.—1 Kor. 3:5-7.

14. Edena dala ai iseda negai, Iehova ese Iesu ena guriguri ia haerelaia?

¹⁴ To madi, aposetolo taudia idia mase murinai, unai lalotamona karana be ia ore. Unai negai, aposteit karana ia bada ia lao dainai, Kerisendom ena dubu idauidau momo idia vara. (Kara 20:29, 30) To, lagani 1919 ai, Iesu ese ena horoa tadikaka be tomadiho koikoi edia igui amo ia ruhadia,  bona “hatamonaia gauna hereadaena” amo idia ia hatamonaia. (Kol. 3:14) Idia edia haroro gaukara ese tanobada dekenai dahaka namo ia havaraia? Taunimanima milioni seven mai kahana, “bese ibounai, iduhu ibounai, kopina bona gado idauidau amo,” bona horoa taudia be mai lalotamona ida Dirava idia tomadiho henia noho. (Ioa. 10:16; Apok. 7:9) Unai ese Iesu ena guriguri ia haerelaia, ia gwau: “Tanobada do ia diba oi [Iehova] ese lau oi siaia bona idia oi lalokau henia, lau oi lalokau henia hegeregerena”!—Ioa. 17:23.

15. Iesu be ena horoa tadikaka totona dahaka ia gurigurilaia?

¹⁵ Nisan 14 ena adorahi ai, Iesu ese ena aposetolo taudia dekenai “hanamoa” ia henia, badina idia ida kontraka ta ia karaia ia ida ena guba Basileia ai do idia lohia totona. (Luka 22:28-30; Ioa. 17:22) Iesu be ena horoa tadikaka totona ia guriguri neganai, ia gwau: “Tamagu e, lau ura lau dekenai oi henia taudia be lau noho gabuna dekenai idia danu do idia noho, unai amo lau dekenai oi henia hairaina do idia itaia, badina taunimanima be tanobada ai idia vara negana amo, lau oi lalokau henia.” (Ioa. 17:24) Iesu ena “mamoe ma haida” be unai idia kamonai neganai, idia mama lasi to idia moale. Unai ese ia hamomokania hari, Keristani taudia korikoridia ibounai be mai lalotamona ida idia noho.

16, 17. (a) Iesu ena guriguri dokonai, ia gwau dahaka do ia karaia noho? (b) Dahaka ita karaia noho be namo?

¹⁶ To, tomadiho gunalaia taudia edia hahediba kereredia dainai, momo idia ura lasi abia dae, tanobada ai Iehova be mai ena lalotamona oreana bona idia be Iehova idia diba. Iesu ena negai unai ia vara danu. Unai dainai, iena guriguri dokonai ia gwau: “Kara Maoromaoro Tamana e, tanobada taudia be oi idia diba lasi, to lau be oi lau diba, bona hahediba taudia idia diba oi ese lau oi siaia mai. Bona lau ese emu ladana be idia dekenai lau gwauraia hedinarai vadaeni, bona do lau gwauraia hedinarai, unai amo lau dekenai oi hahedinaraia lalokauna be idia dekenai do ia noho, bona lau be idia ida do lau hakapua.”—Ioa. 17:25, 26.

¹⁷ Oibe, Iesu be ma haida dekenai iena Tamana ena ladana ia hadibaia. Bona hari ia be kongrigeisen ena Kwarana dainai, ia ese ita ia durua noho ma haida dekenai ena Tamana ena ladana bona ena ura ita hadibaia totona. Iena kwara dagina henunai ita noho totona, namona be haroro gaukara do ita karaia goadagoada bona taunimanima be hahediba taudia ai ita halaoa. (Mat. 28:19, 20; Kara 10:42) Danu, namona be ita gaukara goada mai lalotamona ida ita noho totona. Unai bamona ita karaia neganai, ita be Iesu ena guriguri hegeregerena ita kara, Iehova ena ladana ita hanamoa bona do ita moale hanaihanai.