Rosie ia gwau, “Lau be gau momo lau laloa momo bona lau laloa idia be gau badadia, to lasi, idia be anina lasi.” Edena siri ese Rosie ia durua? Ta be Mataio 6:34, ia gwau, “Unai dainai, kerukeru totona umui lalohekwarahi lasi, badina kerukeru danu be mai ena lalohekwarahi. Dina ta ena metau be unai dina sibona ena.” Hari Rosie ia gwau, Iesu ena hereva ese ia durua kerukeru do idia vara gaudia totona ia lalohekwarahi lasi. Ma ia gwau, “Lau be mai egu hekwakwanai dainai, idia vara lasi gaudia—bona reana do idia vara lasi gaudia—ita laloa momo be anina lasi.”

Yasmine danu be ia laloa momo. Ia gwau, “Wiki lalonai, dina haida lau tai, bona hanuaboi haida lau mahuta lasi. Lalohadai kereredia ese egu goada idia haorea.” Edena siri ese Yasmine ia durua? Ia be 1 Petero 5:7 ia laloa, ia gwau: “Emui lalohekwarahi ibounai be [Dirava] dekenai umui negea, badina ia be umui ia laloa bada.” Yasmine ia gwau: “Gabeai, Iehova dekenai lau guriguri noho, bona ia ese egu guriguri ia haerelaidia. Lau mamia metau badana be Dirava ese egu pagana dekenai ia kokia vadaeni. Nega haida lalohadai kerere lau abia lou, to hari, lau diba edena bamona unai lau hanaia diba.”

Hahine matamata ta ladana Isabella ia gwau: “Lau laloa nega gaukaralaia namonamo lasi karana (procrastination)  be egu tamana amo lau dibaia. Lau ese mai anina bada gaudia be lau karaia lasi badina lau ura lau laga-ani o TV lau itaia guna. Bema nega ita gaukaralaia namonamo lasi, gabeai do ita lalohekwarahi bada bona gaukara do ita karaia namonamo lasi.” Isabella be 2 Timoteo 2:15 ese ia durua, ia gwau: “Do oi gaukara goada Dirava vairanai iena lalonamo oi abia totona, bona oi be ia karaia gaukara dekenai ia hemarai lasi tauna bamona.” Isabella ia gwau, “Lau ura lasi Iehova be lau karaia gaukarana dekenai ia hemarai badina be nega lau gaukaralaia namonamo lasi karana.” Isabella ese ena kara ia senisia.

Unai hegeregerena, Kelsey ia gwau: “Projek ta lau abia neganai, lau karaia haraga lasi ela bona last miniti ai lau karaia. Lau tai, mahuta lasi, bona lalohekwarahi bada. Lau dekenai unai be namo lasi.” Kelsey be Aonega Herevadia 13:16 ese idia durua, ia gwau: “Aonega tauna ese sibona do ia laloa namonamo guna, vadaeni kara do ia karaia, to kavakava tauna ese iena kavakava ia gwauraia hedinarai.” Kelsey ese unai siri ia laloa dobu bona ena namo be inai ia herevalaia: “Namona be oi ura karaia gaudia oi palanilaia namonamo. Hari, lau be noutbuk ta ai sediual lau torea, bona unai ese lau ia durua egu gaukara lau karaia o hagugurua namonamo diba, bona lau naria lasi ela bona last miniti lau karaia.”

Kirsten ia gwau: “Egu tau be emai headava ia rakatania, bona lau be natuna foa lau naridia.” Edena siri ese Kirsten ia durua? Aonega Herevadia 17:17 ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” Kirsten be Iehova idia hesiai henia taudia ia bamoa. Dahaka ia davaria? “Egu turana ese dala idauidau ai lau idia durua! Haida ese aniani bona flaoa be egu ruma ena iduara badinai idia rakatania. Nega toi, turadia haida ese lau bona egu natudia idia durua emai ruma ai rakatania bona ruma matamata dekenai ai hanaia. Egu turana ta ese lau ia durua moni gaukara lau davaria. Egu turadia be hanaihanai lau idia durua.”

Ataiai ia herevalaia hahinena, Delphine, be sibona ia noho dainai ia laloa momo. Ia gwau: “Lau mamia lau be sitoa ta murimurinai lau gini bona sitoa lalonai idia noho taudia lau itaia, idia moale noho. Lau mamia lau be sibona.” Delphine be Salamo 68:6 ese ia durua, ia gwau: “Dirava ese mai edia turana lasi taudia dekenai . . . mauri namona [“ruma ta,” NWT] idia dekenai ia henia noho.” Delphine ia gwau: “Lau diba unai siri be ruma korikorina ia herevalaia lasi. To, lau laloparara Dirava be orea namona ta ia henia, unai ese ita do ia hagoadaia bona gimaia, bona Iehova idia lalokau henia taudia do ita tura henidia. To lau diba ma haida kahirakahira do lau noho diba bema Iehova kahirakahira lau noho. Salamo 37:4 be lau ia durua, ia gwau: “Oiemu moale be [Iehova] dekena amo do oi tahua, vadaeni ia ese, oi ura henia gaudia be oi dekenai do ia henia.”

Delphine ia gwau: “Lau laloparara Iehova tura henia karana lau hagoadaia be namo. Ia be Turana hereadaena. Bema ma haida ida lau karaia diba gaukaradia be lista ta dekenai lau torea, unai amo idia ese lau do idia durua Dirava lau tura henia totona. Ma haida edia kara namodia laloa bada karana lau dibaia bona edia kerere maragimaragidia lau laloa momo lasi.”

Momokani, Iehova ena turadia be goeva dae taudia lasi danu. Iehova ena Witnes taudia be mai edia hekwakwanai danu, taunimanima ibounai hegeregerena. To Baibel ese taunimanima ia hagoadaia ma haida idia durua totona. Unai bamona turadia ita bamoa be aonega karana. To, bema eda gorere, lalohisihisi, eiava unai bamona hekwakwanai ma ta ia ore lasi, oi laloa Baibel be ita ia durua diba, a?