Tanobada ibounai, taunimanima milioni momo be Dirava ena Basileia idia abidadama henia. Idia be Iesu idia tohotohoa, ia ese ena hahediba taudia ia hadibaia idia guriguri: “Oiemu Basileia do ia mai. Oiemu ura gauna tanobada dekenai do ia vara.”​—Mataio 6:10.

Herevana taunimanima momo be Dirava ena Basileia idia laloa bada, to toana be dubu momo be unai bamona lasi. Unai dainai, histori ia torea tauna H. G. Wells ia gwau, Iesu ese “Guba Basileia ena hahediba herevana ia gwauraia badabada, to Keristani dubu edia naria taudia kahirakahira ibounai ese unai hahediba herevana idia gwauraia momo lasi.”

To, Iehova ena Witnes taudia be Dirava ena Basileia idia harorolaia momo. Mani oi laloa, emai Gima Kohorona be hari gado 220 ai idia halasia. Kahirakahira kopi 46 milion idia printaia dainai, tanobada ibounai dekenai idia hariharilaia. Inai magasin ena hereva badana be dahaka? Iena hereva kwarana ia gwau: Gima Kohorona Iehova Ena Basileia Ia Harorolaia.  a

Dahaka dainai Iehova ena Witnes taudia idia ura bada Dirava ena Basileia idia gwauraia hedinarai? Badina ta be, ai abia dae Dirava ena Basileia be Baibel ena hereva badana. Danu, ai abia dae Dirava ena Basileia ese taunimanima edia hekwakwanai ibounai do ia haorea.

Iehova ena Witnes taudia idia ura Iesu idia tohotohoa dainai, ma haida dekenai Dirava ena Basileia idia herevalaia. Iesu be tanobada ai ia noho neganai, iena mauri bona haroro gaukara lalonai Dirava ena Basileia ia atoa guna. (Luka 4:43) Dahaka dainai Iesu be Basileia ia laloa bada? Bona dahaka dainai oi laloa bada? Oi ai noia atikol gabedia oi duahia, bena Baibel ena haere do oi davaria.