Jairo ia vara neganai, ia be cerebral palsy gorerena ta ladana, spastic quadriplegia ia davaria. a Unai dainai ena tauanina ibounai ia hamarerea diba lasi. Ena kwara harana ena varovaro idia gaukara namonamo lasi dainai, ena imana bona aena idia auka o ia hamarerea diba lasi. Nega haida, Jairo ia ura ena aena o imana ia hamarerea neganai, hisihisi bada ia abia. Bona ia badinai idia noho taudia idia naria namonamo lasi neganai, hisihisi idia abia danu. Unai dainai, ena imana bona aena be ena wilsea ai idia kwatua unai amo unai bamona aksiden ia davaria lasi.

Jairo ia tubu daekau lalonai hisihisi bada ia davaria. Ia be hua toi neganai, seizure ia abia bona ia maserea. Nega momo, egu sinana be Jairo do ia rosia bona kara haraga hospital dekenai do ia abia lao, bona ia laloa ia mase vadaeni.

Jairo be nega momo seizure ia abia momo dainai, ena turia idia goada lasi. Ena lagani be 16 neganai, ena koekoe turiana be gabu maoronai ia noho lasi dainai, ena mamuna bona koekoena ai opereisen ia abia. Lau laloatao, Jairo be unai opereisen murinai, hanuaboi momo ia taitai.

Jairo ena gorere dainai, dina ta ta ai do ia karaia gaudia hegeregere, aniani, dabua karaia bona mahuta totona be haida ese idia durua be namo. Nega momo unai gaudia be egu tama sina ese idia karaia. Ena be Jairo be heduru do ia abia hanaihanai, to egu tama sina ese hanaihanai idia hadibaia ia mauri totona, namona be taunimanima sibona lasi, to Dirava dekenai ia tabekau danu.

Emai tama sina be Iehova ena Witnes Taudia, bona Jairo ia beibi negana amo ia dekenai Baibel sivaraidia idia duahia. Hanaihanai inai idia laloa, bema ta be Dirava ia tura henia ena mauri be mai ena badina. Jairo be seizure ia abia loulou dainai, ena tauanina be goada lasi, to vaira negana ena helaro ia abidadama henia. To, nega haida ena tama sina idia laloa Jairo be Baibel ena hereva ia lalopararalaia diba eiava.

Nega ta Jairo be maragi neganai, tamana ese ia nanadaia, ia gwau: “Jairo, ia namo lau oi hereva henia?” Bena ma ia gwau: “Bema lau oi lalokau henia, do oi hereva!” Tamana ia ura Jairo be hereva ta ia gwauraia, to Jairo ia tai. Ena be ia ura dikadika ena hemami ia gwauraia, to ia hereva diba lasi. Jairo ia  tai dainai, tamana ena hemami ia dika. To iena kara ese ia hahedinaraia, tamana ena hereva ia lalopararalaia. To hekwakwanai be ia hereva diba lasi.

Daudau lasi murinai, emai tama sina be Jairo ena matana ia hamarerea haraga karana amo ena lalohadai bona hemami ia hahedinaraia dalana idia lalopararalaia. Nega momo ia idia lalopararalaia namonamo lasi neganai, ia badu. To, egu tama sina be Jairo ena matana ia hamarerea dalana idia lalopararalaia bona ena ura gaudia idia henia neganai, ia moale bada. Unai be ena tanikiu karana ena toana ia hahedinaraia.

Hereva namonamo karana ia hadibaia doketa ta (o speech therapist) be Jairo ida ai herevahereva namonamo dalana ta ia gwauraia. Bema ai ura ia ese emai henanadai ta ia haerelaia, emai imana ruaosi ai abia isi danu be namo. Anina be emai imana idibana be oibe, bona laurina be lasi. Jairo be emai imana idibana o laurina itaia karana amo ena ura ai dibaia.

Iehova ena Witnes taudia be lagani ta ta ai idia karaia hebou badadia toi be inai: Dina tamona sekit hebouhebou be nega rua idia karaia bona rijinol hebouhebou be dina toi idia karaia. Unai bamona negadiai taunimanima hutuma idia lao bona Baibel ena hereva idia kamonai. Jairo be nega momo bapatiso idia abia taudia totona idia henia tok ia kamonai neganai ia moale bada. Nega ta Jairo ena mauri lagani be 16 neganai, Tamana ese ia nanadaia ia gwau: “Jairo oi ura bapatiso oi abia, a?” Maoromaoro tamana ena imana idibana ia itaia amo ia hahedinaraia ia ura unai bamona ia karaia. Tamana ma ia gwau: “Guriguri amo Iehova dekenai oi gwauhamata vadaeni, Ia do oi hesiai henia hanaihanai, a?” Jairo be Tamana ena imana idibana ia itaia lou. Unai amo Jairo ia hahedinaraia guriguri amo Iehova dekenai ena mauri ia gwauhamatalaia vadaeni.

Nega sisina daudau bamona Jairo be Baibel ia stadilaia, bona ia diba dahaka dainai Keristani taudia be bapatiso idia abia be gau badana. Unai dainai, lagani 2004 ena hebou badana ai, inai mai anina bada henanadai: “Dirava ena ura oi karaia totona, sibona emu mauri oi gwauhamatalaia, a?” ia haerelaia totona, Jairo be guba ia itaia, anina be oibe. Ena mauri lagani be 17 neganai, ia bapatiso bona Iehova ena Witnes ta ai ia lao.

Lagani 2011 ai, Jairo ena herevahereva dalana durua totona, kompiuta matamata ta idia abia. Unai kompiuta ese matana ia hamarerea karana ia badinaia, unai amo kompiuta ena screen ai idia noho laulau  ia abia hidi diba. Kompiuta ena laulau ia raraia o matana ia hakapua be hegeregere kompiuta ena mouse ia klik bamona. Kompiuta ai laulau idia noho bona unai ese Jairo ena hereva karana ia durua. Laulau ta ia raraia bona ena matana ia hakapua neganai, ia itaia herevana be kompiuta ese ia gwauraia.

Jairo be Baibel ia lalopararalaia bona ena ura taunimanima durua totona ia habadaia. Emai ruma bese ena Baibel stadi negadiai, lau do ia itaia bena ena kompiuta do ia itaia lou. Unai amo lau ia hadibaia ena koment do lau torea, bona emai Keristani kongrigeisen heboudia, henanadai-bona-haere ai karaia neganai ena haere ia henia.

Kongrigeisen heboudia ai, kompiuta ai idia noho laulau do ia itadia namonamo, laulau maorona ia abia hidi bona itaia gauna be kompiuta ese ia gwauraia hedinarai, unai amo ibounai idia kamonai. Hanaihanai ena kiri toana amo kongrigeisen taudia ia hagoadaia. Jairo ena turana ta, Alex ia gwau: “Hanaihanai Jairo be Baibel ena topik ta ia haerelaia neganai, unai ese lau ia hamoalea.”

Danu, Jairo be ena matana ia gaukaralaia taunimanima dekenai ena abidadama ia herevalaia totona. Unai ia karaia dalana ta be kompiuta ai ia noho Paradaiso ena laulau ia klik. Unai ia karaia neganai, kompiuta do ia hereva ia gwau: “Baibel ia gwau tanobada be paradaiso ai do ia lao, gorere bona mase be do idia ore, Apokalupo 21:4.” Bema ta ia kamonai, vadaeni kompiuta ena kahana ma ta ia klik bona ia gwau: “Oi ura lau ida Baibel ita stadilaia, a?” Hoa gauna be, emai tubuna tauna ese Baibel stadi ia abia dae. Jairo be ena Witnes turana ta ida tubuna idia durua Baibel ia dibaia totona. Moale gauna be, August 2014 ena rijinol hebouhebou be Madrid ai idia abia neganai, tubuna be bapatiso ia abia.

Sikuli ai Jairo ese ena abidadama karana be tisa dekenai ia hahedinaraia. Jairo dekenai hereva namonamo karana ia hadibaia doketa ta ladana, Rosario ia gwau: “Bema lau ura tomadiho ta lalonai lau vareai, Iehova ena Witnes do lau abia hidi. Badina ena be Jairo be mai ena gorere, to lau itaia ena abidadama ese ia dekenai helaro korikorina ia henia.”

Hanaihanai Jairo ia moale bema ia dekenai Baibel ena gwauhamata lau duahia: “Aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.” (Isaia 35:6) Ena be nega haida ia lalomanoka, to hanaihanai ia moale. Unai ia vara badina Dirava ia hesiai henia bona Keristani tura namodia ia bamoa. Jairo ena moale toana bona abidadama goadana ese ia hamomokania, ena be mauri ia auka, to Iehova hesiai henia karana ese moale ia henia.