SOU Lalwa, Jewova te aksepte Izrayelit yo ba l toutrèl ak pijon kòm ofrann. Nan lwa ki te gen rapò ak sakrifis yo, yo te toujou site de zwazo sa yo ansanm, e yo te kapab ofri youn nan plas lòt (Lev. 1:14; 12:8; 14:30). Poukisa se te yon bon bagay? Youn nan rezon yo se paske yo pa t konn toujou jwenn toutrèl. Sa k fè sa?

Toutrèl se zwazo ki konn deplase al lòt kote, men, gen toutrèl toupatou nan peyi Izrayèl nan mwa ki fè cho yo. Chak mwa oktòb, yo deplase al nan direksyon sid nan peyi ki fè pi cho yo, e yo retounen ann Izrayèl nan sezon prentan (Chan. 2:11, 12; Jer. 8:7). Se sa k fè, nan Izrayèl tan lontan an, li te difisil pou Izrayelit yo ofri toutrèl kòm sakrifis nan sezon ivè.

Yon lòt bò, pijon se pa zwazo ki konn deplase al lòt kote. Se sa k fè te toujou gen pijon ann Izrayèl pandan tout ane a. Epitou, moun yo te konn gade pijon. (Konpare ak Jan 2:14, 16.) Selon liv ki rele Plant ak bèt ki nan Bib la (anglè), “nan tout bouk ak nan tout vil nan peyi Palestin, moun yo te konn gade pijon. Chak moun te gen kalòj lakay yo, oswa twou nan mi kay yo, kote zwazo yo te kapab rete”. — Konpare ak Ezayi 60:8.

Kidonk, Jewova te montre l gen lanmou e li rezonab lefètke l te aksepte Izrayelit yo bay zwazo yo te ka jwenn byen fasil pandan tout ane a kòm ofrann.