Yon fason klè, Bib la fè nou konnen sa Jewova ansanm Jezi Kris, Pitit li a, pral fè kont soufrans Satan Ledyab lakòz yo. Bib la di: “Men pou ki sa Pitit Bondye a te parèt aklè: pou l kraze travay Dyab la.” (1 Jan 3:8). Yo pral kraze sistèm ki la kounye a ki baze sou avidite, lahèn ak zak mechanste. Konsènan Satan Ledyab, “chèf monn nan”, Jezi pwomèt ‘yo pral mete l deyò’. (Jan 12:31.) Pral gen yon monn nouvo ki jis, e tè a pral vin yon kote ki pezib, lè sa a Satan pap gen okenn enfliyans ankò. — 2 Pyè 3:13.

Ki sa k pral rive moun ki refize chanje fason y ap viv e ki pèsiste nan fè move bagay? Fè yon ti reflechi sou pwomès sa a ki dirèk: “Se moun ki dwat yo ki pral abite sou tè a, e se moun ki entèg yo ki pral rete sou li. Kanta mechan yo, y ap rache yo nan tè a, e trèt yo menm, y ap derasinen yo ladan l.” (Pwovèb 2:21, 22, NW). Tout enfliyans moun mechan yo ap disparèt. Nan yon kondisyon pezib konsa, tikras pa tikras, moun ki obeyisan yo pral libere anba enpèfeksyon yo te eritye a. — Women 6:17, 18; 8:21.

Ki jan Bondye pral elimine mechanste nan monn nouvo a? Li pap pran kado li te bay lèzòm nan, sètadi libète pou yo deside a, epi pou l fè yo tankou wobo. Okontrè, li pral anseye moun ki obeyisan yo chemen l yo, l ap ede yo elimine move panse yo genyen, l ap ede yo chanje yo pap fè move zak ankò.

Ki sa Bondye pral fè kont malè ki konn rive san moun pa t prevwa yo? Li pwomèt, talè konsa, gouvènman l lan, sètadi Wayòm li an, pral pran kontwòl tè a. Se Jezi Kris Bondye chwazi kòm Wa pou dirije Wayòm nan, e li gen pouvwa pou l geri moun ki malad (Matye 14:14). Anplis de sa, Jezi gen pouvwa pou l kontwòl fòs natirèl yo (Mak 4:35-41). Se sa k fè, tout ‘evènman ki konn rive san moun pa t prevwa’ e ki konn lakòz moun soufri pral sispann (Eklezyas 9:11). Anba dominasyon Kris la, pa gen okenn malè k ap frape lèzòm. — Pwovèb 1:33.

Ki sa n ka di konsènan plizyè milyon moun inosan ki mouri yon fason ki trajik? Men sa Jezi te di yon ti tan anvan l te resisite Laza, yon zanmi l: “Mwen se rezirèksyon an e mwen se lavi a.” (Jan 11:25). Wi, Jezi gen pouvwa pou l resisite moun ki mouri oswa pou l reba yo lavi!

Si lide pou w viv nan yon monn kote move bagay pap rive bon moun atire w, poukisa w pa fikse objektif pou w etidye Labib pou w ka aprann plis bagay sou vrè Dye a ak sou objektif li? Temwen Jewova ki nan zòn bò lakay ou ap byen kontan ede w gen konesans sa a. Se ak tout kè n nou envite w pran kontak avèk yo nan zòn ou rete a oubyen ekri òganizasyon ki pibliye peryodik sa a.