Èske Bondye ap kite lèzòm kontinye domine sou moun parèy yo? Èske y ap kontinye reprezante yon danje pou avni limanite? Non, jan nou deja wè sa, Bondye pral fè entèvansyon l e l ap mete fen nan mizè ak move tretman lèzòm ap sibi depi plizyè santèn ane. Kreyatè a, ki fè ni lèzòm ni tè a, vle w konnen moman pou l pase alaksyon an ap pwoche. Ki jan li fè moun jwenn konesans sa a ki trèzenpòtan?

Ann pran yon egzanp: Lè w ap vwayaje nan machin pou w al yon kote, toudabò, ou ka chèche gen yon kat jeyografi, nan kèk peyi, ou ka al sou Entènèt pou w ka jwenn kèk enfòmasyon ki endike w ki direksyon pou w pran. Apre sa, ofiramezi w ap kouri machin epi w ap gade kèk siy ak kèk bagay remakab ki koresponn ak esplikasyon yo te ba ou a, ou vin pi sèten ou prèske rive kote w prale a. Se menm jan an tou, Bondye ban nou Pawòl li a ki dekri tandans jeneral moun yo t ap genyen. Lè nou wè siy remakab sa yo k ap reyalize, nou vin gen plis konviksyon n ap viv nan epòk k ap mennen nan lafen an.

Bib la fè konnen monn nan gen pou l rive nan yon moman ki san parèy, yon moman desizif nan listwa k ap mennen nan lafen an. Nan moman sa a, pral gen yon seri evènman k ap pase sou tè a ak yon seri sitiyasyon k ap totalman diferan ak sa ki konn rive nan listwa lèzòm. Ann egzamine kèk nan bagay yo mansyone nan Bib la.

1. YON GWO KRIZ MONDYAL. Gen yon pwofesi nan Matye chapit 24 la ki bay lis yon seri evènman k ap pase sou tè a, evènman sa yo fè pati yon siy ki gen plizyè eleman. Siy sa a ap montre nou rive nan “fen sistèm nan” e l ap mennen nan epòk kote “lafen an ap vini” an (Vèsè 3, 14). Siy sa a gen ladan l gwo lagè, rate manje, tranblemanntè nan yon zòn apre yon lòt, mechanste k ap ogmante, moun yo t ap manke lanmou, epi chèf relijye yo t ap fè efò avèk riz pou yo twonpe moun (Vèsè 6-26). Se vre, nan yon sèten mezi, evènman sa yo te konn fèt sa gen plizyè syèk. Sepandan, toutotan lafen an ap pwoche, yo tout t ap rive nan menm epòk kote gen pwoblèm nan. Twa siy avètisman ki vin apre yo t ap rive nan menm epòk la tou.

2. KONPÒTMAN MOUN YO. Bib la di nan “dènye jou yo”, sètadi nan epòk k ap mennen nan lafen an, konpòtman moun yo t ap deteryore anpil. Men sa nou li: “Moun yo ap renmen pwòp tèt yo, y ap renmen lajan, y ap grandizè, y ap ògeye, y ap blasfeme, y ap dezobeyi paran yo, y ap engra, yo pap fidèl, yo pap gen afeksyon pou moun parèy yo, yo pap dispoze antann yo, y ap pale moun mal, y ap san metriz, y ap sovaj, yo pap renmen sa ki byen, y ap trèt, y ap gen tèt di, y ap gonfle ak ògèy, y ap renmen plezi olye yo renmen Bondye.” ​(2 Timote 3:1-4). Se vre, afè moun manke respè pou moun parèy yo a pa nouvo, men se nan “dènye jou yo” konpòtman sa a t ap rive nan yon degre ekstrèm konsa opwen Bib la gen rezon lè l dekri epòk la kòm yon ‘tan ki di, e ki difisil pou moun sipòte’. Èske w pa remake vye tandans sa a k ap deteryore a nan konpòtman moun yo?

3. MOUN YO AP DETWI TÈ A. Bib la di Bondye pral “detwi moun k ap detwi tè a”. (Revelasyon 11:18.) Nan ki sans moun yo ap detwi tè a? Bib la dekri epòk Noye t ap viv la menm jan ak epòk lafen an. Men sa l di: “Latè te fin pèvèti nan je vrè Dye a e latè te vin ranpli ak vyolans. Wi, Bondye te gade tè a, e li te wè l pèvèti, tout chè te pèvèti chemen yo sou tè a.” Konsa, men sa Bondye te di konsènan moun kòwonpi sa yo: “Mwen pral ravaje yo.” (Jenèz 6:11-13, NW). Èske w wè valè prèv ki montre jan tè a vin ranpli ak vyolans? Anplis de sa, lèzòm rive nan yon moman san parèy nan listwa: Yo gen kapasite pou yo detwi tè a yon fason literal piske yo ka elimine lavi tout moun ki sou tè a. Yo gen gwo kantite zam nan men yo. Mete sou sa, yo detwi tè a yon lòt fason ankò. Sistèm ki fè gen lavi sou tè a, anpalan  de lè n ap respire a, bèt yo, plant yo ak lanmè a, kontinye ap deteryore akoz move jesyon lèzòm.

Mande tèt ou: ‘Sèlman yon syèk anvan sa, èske lèzòm te gen pouvwa pou yo detwi tèt yo nèt?’ Men kounye a, lèzòm vin gen pouvwa sa a paske yo fè gwo pwogrè nan fè zam pou lagè, e paske yo devaste anviwònman an. Devlopman rapid teknoloji a fè sanble depase kapasite lèzòm genyen pou yo konprann konsekans bagay sa yo genyen oubyen pou yo kontwole yo. Sepandan, se pa lèzòm k ap deside avni tè a e se pa yo k ap kontwole l. Anvan lèzòm rive elimine tout lavi sou tè a, Bondye ap gentan detwi moun k ap detwi tè a. Se pwomès sa a li fè nou!

4. YON TRAVAY MONDYAL PREDIKASYON. Nan yon lòt pati nan siy lafen an, yo te anonse gen yon travay moun t ap fè nan epòk sa a ki t ap san parèy. Men sa Bib la di: “Yo pral preche bon nouvèl sa a konsènan wayòm nan sou tout tè a, kòm yon temwayaj pou tout nasyon. Apre sa, lafen an ap vini.” ​(Matye 24:14). Kanpay predikasyon sa a pa menm ditou ak aktivite pifò relijyon ap fè depi plizyè syèk pou yo konvèti moun. Pandan dènye jou yo, yo t ap mete aksan sou yon mesaj byen presi: ‘Bon nouvèl wayòm nan.’ Èske w konnen yon gwoup relijye ki atire atansyon moun sou mesaj presi sa a? Epi, menmsi gen kèk moun ki preche yon mesaj konsa, èske yo se yon gwoup ki nan yon zòn sèlman oubyen èske yo gaye bon nouvèl sa a “sou tout tè a, kòm yon temwayaj pou tout nasyon”?

Sit Entènèt www.pr2711.com la mete aksan sou ‘bon nouvèl wayòm nan’. Sit Entènèt sa a gen piblikasyon nan plis pase 700 lang ki esplike mesaj Wayòm nan. Èske w konnen yon lòt sit Entènèt ki met aksan sou bon nouvèl Wayòm nan e ki simaye l toupatou nan monn nan nan degre sa a? Byen lontan anvan Entènèt te alamòd, tout moun te konnen Temwen Jewova yo kòm moun k ap fè efò pou yo simaye bon nouvèl konsènan Wayòm Bondye a. Depi 1939, kouvèti peryodik Toudegad la toujou gen pawòl sa yo sou li: “K ap anonse Wayòm Jewova a.” Gen yon liv ki pale de relijyon ki te fè yon kòmantè, li di travay predikasyon Temwen Jewova yo ap fè a ‘prèske san parèy ni nan kantite efò Temwen yo fè ni nan kantite kote yo gaye mesaj la’. Mesaj sa a mete aksan sou yon bon nouvèl ki fè konnen talè konsa “lafen an ap vini” grasa aksyon Wayòm Bondye a pral fè.

Èske w remake jan toule kat siy avètisman sa yo Bib la bay nou sot egzamine nan atik sa a ap vin byen klè pandan w vivan an? Pandan plis pase santan, peryodik sa a bay lektè l yo enfòmasyon sou  evènman k ap ede yo verifye jan nou toupre lafen an. Se vre, gen kèk moun ki gen dout ki pa dakò, yo di enfòmasyon yo ak chif estatistik yo baze sou opinyon pèsonèl e moun ka manipile yo. Mete sou sa, yo fè konnen, etandone rezo mondyal kominikasyon yo kontinye ogmante, se sèlman parèt sitiyasyon monn nan parèt pi mal. Sepandan, chak jou, gen plis prèv ki montre n ap viv nan fen yon peryòd ki san parèy nan istwa limanite.

Gen kèk espesyalis ki panse n ap pwoche toupre moman kote pral gen kèk gwo chanjman sou tè a. Pa egzanp, nan ane 2014, gen yon jounal ki te bay Konsèy sekirite Nasyonzini an avètisman sou kèk bagay ki reprezante gwo menas pou egzistans lèzòm (Science and Security Board of the Bulletin of the Atomic Scientists). Men sa syantifik sa yo te di: “Apre nou fin byen egzamine menas sa yo, nou rann nou kont risk pou gen yon katastwòf teknolojik sou sivilizasyon an fò anpil.” Chak jou, anpil moun vin pi kwè nou rive nan yon moman ki enpòtan anpil nan istwa monn nan. Moun ki pibliye peryodik Toudegad la ak anpil moun ki li peryodik sa a pa gen okenn dout peryòd san parèy n ap viv la se dènye jou yo toutbonvre e lafen an toupre. Men, olye pou w pè lavni, se pou w kontan pito pou jan sa pral fini an. Sa k fè nou di sa? Se paske ou ka chape lè lafen an!