Anpil Temwen Jewova kontan preche lòt moun pa mwayen lèt. Eksperyans ki vin apre yo Temwen Jewova nan peyi Etazini fè montre ekri lèt se yon bon mwayen pou gaye mesaj rekonfò ki nan Bib la.

Sè Carlee Ruggles gen 13 an e l ap viv nan Blou Ach, nan Owayo. Li te vin rann li kont lèt li ekri yo kapab vrèman ede moun yo lè li te jwenn yon repons li pa t atann pou youn nan lèt li te ekri yo.

Yon aprèmidi, Carlee te devan lakay li lè yon motosiklèt rantre kote l la. Mesye ki te sou moto a desann moto a, li kenbe yon anvlòp epi li di byen fò: “Ki moun ki voye lèt sa a ban mwen?” Carlee wè se youn nan lèt li te voye yo pandan li t ap preche.

Paran Carlee yo ki wè sa ap kouri soti vin kote l la. Men, avèk kouraj, Carlee gentan reponn mesye a, li di l: “Se mwen menm mesye.”

Carlee ak paran l yo sezi lè mesye a di: “Lèt ou a se egzakteman sa m te bezwen!” Apre sa, mesye a fè konnen fason enfòmasyon ki nan lèt la te konsole l paske li te santi l poukont li akoz pandemi an. Epitou, li esplike sa pa gen lontan li te gen frè l ki mouri, e lèt Carlee te ekri a te konsole l anba lapenn li te ye.

Men sa l di pou l fini: “Pa sispann ekri moun yo. Lèt ou yo touche kè moun yo, kit yo reponn, kit yo pa reponn.”

Carlee gen plis detèminasyon kounye a pou l kontinye ekri vwazen l yo. Li di: “Mwen kontan paske Jewova te itilize m pou m ankouraje yon moun. Sa nou ekri yo vrèman ka touche kè yon moun.”

Sè Myrna Lopez, nan Senntè, nan Tegzas, te kòmanse mande tèt li si lèt li ekri yo rive touche kè moun yo. Apre sa, li te fè yon eksperyans ak yon moun nan fanmi l. Myrna te aprann yo te arete neve l la. Li te deside ekri jèn gason sa a ki te konn asiste reyinyon kongregasyon yo lè l te timoun. Li te fè l konnen Jewova pa bliye l.

Neve Myrna a te ekri Myrna pou l reponn li. Li te esplike l apre yo te fin arete l la, li te santi l panike e lavi l pa gen sans. Pandan li nan prizon an, li te reflechi sou lè l te piti, e li te kòmanse li Bib la epi priye Jewova. Pou li menm, lèt Myrna te ekri a se yon fason Jewova reponn priyè l e sa montre aklè Jewova toujou gen sousi pou li.

Sè Natalie Bibbs, nan Nòkwòs, nan Jeyòji, te resevwa mesaj yon dam ki te jwenn youn nan lèt li te ekri yo pandan dam nan t ap fè yon ti kouri. Dam nan te wè lèt la arebò wout la tou chifonnen. Lè l fèk wè lèt la, li te pase l ale. Men, li pa konnen pou ki rezon li te deside retounen epi pran lèt la.

Men sa dam nan te ekri Natalie: “Semèn nan pa t fasil pou mwen, e mwen te jis bezwen yon bagay pou fè m santi m byen. Ebyen, lèt sa a se te egzakteman sa m te bezwen an!’”

Natalie di: “Repons dam nan konvenk mwen kèlkeswa metòd nou itilize pou n preche a, Jewova ap ede nou.”

Sè Laura Martinez, nan Atenns, nan Tegzas, te bay moun k ap travay nan yon makèt ki nan zòn bò lakay li lèt pandan yo pote manje li achte yo mete nan machin li. Youn nan moun k ap travay yo, yon dam, te di Laura lèt li an te touche l anpil. Annapre, Laura te ekri l de lòt lèt. Kounye a, l ap kondui yon etid Labib avè l.

Eksperyans konsa fè nou sonje byenke nou ka pa konnen si semans verite nou simen yo “ap leve”, Jewova ka sèvi ak nenpòt metòd nou itilize pou nou preche pou l ka konsole moun ki tankou mouton epi ba yo espwa. — Eklezyas 11:6.