Ոմանց հետաքրքրում է, թե արդյոք Աստծու գրավոր Խոսքը դարերի ընթացքում փոփոխության չի՞ ենթարկվել։ Եսայիա մարգարեն գրել է. «Աստծու խոսքը մնալու է հավիտյան» (Եսայիա 40։8)։ Բայց ինչպե՞ս կարող ենք համոզված լինել, որ Արարչի խոստումները ճշգրտությամբ են փոխանցվել մեզ։

Աստված ի զորու է պահպանել իր Խոսքը և թույլ չտալ, որ այն աղավաղվի։ Հին ժամանակներում, երբ սուրբ գրքերը ձեռքով արտագրվում էին, այդ գործը բծախնդրությամբ անող մարդիկ այնքան լրջորեն էին վերաբերվում իրենց հանձնարարությանը, որ անգամ հաշվում էին սուրբ տեքստերի բոլոր տառերը, որպեսզի արտագրելիս հանկարծ ու հանկարծ որևէ ավելացում, փոփոխություն կամ բացթողում չանեն։ Բայց մարդ արարածը անկատար է, ուստի որոշ ձեռագրերի մեջ, այնուամենայնիվ, աննշան սխալներ են սողոսկել։

Սուրբ Գրքի հազարավոր ձեռագրեր են պահպանվել ու հասել մեզ։ Եթե անգամ մի ձեռագրում աննշան փոփոխություններ են արվել, այն կարելի է համեմատել մյուս ձեռագրերի հետ և հեշտությամբ հայտնաբերել այդ թերությունները։ (Ավելին իմանալու համար jw.org կայքում կարդացեք «Արդյո՞ք Աստվածաշունչը աղավաղվել կամ փոփոխության է ենթարկվել» հոդվածը։)

Նկատի առնենք մի օրինակ։ 1947-ին բեդվինները Մեռյալ ծովի քարանձավներից մեկում հայտնաբերեցին, այսպես կոչված, Մեռյալ ծովի ձեռագրերը։ Դրանք Սուրբ Գրքից որոշ հատվածներ էին, որոնք ավելի քան 2 000 տարվա հնություն ունեին։ Մասնագետները այս հնամենի ձեռագրերը համեմատեցին Սուրբ Գրքի առկա օրինակների հետ։ Եվ գիտե՞ք, թե ինչ եզրակացության եկան։

Գիտնականները հայտնաբերեցին, որ այսօր առկա Սուրբ Գրքի բովանդակությունը բնագիր ձեռագրերից չի տարբերվում։ * Հին ձեռագրերի մանրամասն ուսումնասիրությունները ևս մեկ անգամ հաստատեցին, որ այսօր մենք Սուրբ Գրքում կարդում ենք հենց այն, ինչ դարեր առաջ ասել է Արարիչը։ Ուստի կարող ենք համոզված լինել. Աստված հոգ է տարել, որ իր Խոսքը առանց փոփոխությունների ենթարկվելու հասնի մեզ։

Այսպիսով՝ մենք կարող ենք հանգիստ խղճով կարդալ Աստծու Խոսքը և վայրկյան անգամ չկասկածել, որ այն ճշգրտությամբ է փոխանցվել մեզ։ Դա ի մտի ունենալով՝ եկեք հաջորդիվ տեսնենք, թե Աստծու մասին ինչ կարող ենք սովորել նրա մարգարեներից։