Kako, kazongamburiro azehe nḓe ri tjimwe. Ombeibela i novihorera ovingi vyozongamburiro nḓe ha tjata ku Mukuru. Pe noviṋa vivari mbi tjita kutja ongamburiro ai ha tjata ku Mukuru.

Otjitenga: Okurikotamena koomukuru woposyo

 Ombeibela i hungira kutja okurikotamena koomukuru woposyo “oviporoporo” nu ‘kaku nombatero.’ (Jeremia 10:3-5; 16:19, 20) Jehova a Mukuru wa rakiza otjiwaṋa tja Israel kutja: “Ko nokukara ko noomukuru varwe posi yandje.” (Eksodus 20:3, 23; 23:24) Indu Ovaisrael tjaave rikotamene koomukuru varwe, “Muhona wa ṱomazenge tjinene na wo.”—Numeri 25:3; Levitikus 20:2; Ovapangure 2:13, 14.

 Mukuru ngunda u noumune tjingewo ohunga nokurikotamena ku imba “mbu ku za ‘oomukuru.’” (1 Ovakorinte 8:5, 6; Ovagalate 4:8) Eye u rakiza kutja imba mbu mave vanga okurikotamena ku ye ngave ise okukara pu na imba mbe norupa mozongamburiro zoposyo. Eye wa tja: “Zamoeye mokati kawo nu mu haṋike na wo!” (2 Ovakorinte 6:14-17) Andakuzu ozongamburiro azehe ze ri tjimwe nu ze twara ovandu ku Mukuru, eye katja yandja erakiza ndo.

Otjitjavari: Okurikotamena ku Mukuru watjiri momuano eye mbwe ha yakura

 Indu Ovaisrael tjaave rikotamene ku Mukuru momuano ozongamburiro zoposyo mu ze rikotamena koomukuru wawo, Jehova aa nakaura ongaro ndjo yokukondja okurunga ongamburiro youatjiri na indji oyoposyo. (Eksodus 32:8; Deuteronomium 12:2-4) Jesus wa nakaura ovanane vozongamburiro voruveze rwe mena romuano mave rikotamene ku Mukuru. Owo aave munika otjovandu vongamburiro, posi yokutja owo va ri ovanatjavivi nu kaave “ṱakamisa imbi oviṋa ovinanḓengu vyOmatwako otja ousemba notjari nongamburiro.”—Mateus 23:23.

 Momuano tjingewo, ndino ongamburiro imwe uriri ndja zikamena kouatjiri ondji eta ovandu popezu na Mukuru. Ouatjiri mbwi u ri mOmbeibela. (Johanes 4:24; 17:17; 2 Timoteus 3:16, 17) Omahongero wozongamburiro nḓe pirukira Ombeibela ze humburura ovandu kokure na Mukuru. Omahongero omengi ovandu ngu ve nangarasi ye ri mOmbeibela tjimuna oomukuru vetatu mumwe, omuinyo mbu ha koka, nokukapya nga aruhe motjomuriro, ya za komerikotameneno woomukuru woposyo. Omerikotameneno nge kurisa omahongero ngo “omungandjo” poo oviporoporo, mena rokutja ye pingenisa omirari vya Mukuru ku nomahongero wovandu.—Markus 7:7, 8.

 Mukuru u yaukisiwa i yotjavivi tjozongamburiro zoposyo. (Titus 1:16) Ongamburiro youatjiri i vatera ovandu okutumbuka popezu na Mukuru. Oyo kai zikamene kotuzo poo ozombazu, nungwari oyo i tuṋa kehupo rovandu. Otjotjihorera, Ombeibela i tja: “Omundu tji ma tjangovasi u karera Ndjambi nu a ha tjaere eraka re, indino otjiungura tje tjongamburiro opouriri, neye me ripukisa omuini. Ihi tji tji ri otjoukarere waNdjambi, otjikohoke notjipwe komurungu waNdjambi Tate, otjo hi: Okuvarura ozosewa novahepundu mouzeu wawo, nokuritjevera kouye mbwa zunḓaka.” (Jakobus 1:26, 27)